MATIU 4 - Ngowili Yekpei Numu Kpɛlɛɛ Va

Seitana Lɔ Yesu Gɔlɛma

¹ Hugutungɔ na wooma Ngewɔ Yafei i pielɔ Yesu i li ndɔgbɔ lambɛi ma aako Seitana i ngi gɔlɛ.

² Kia i folo numu fele gbɔyɔngɔ kɛɛ kpindi numu fele gbɔyɔngɔ gbɔyɔni na ii mɛhɛɛ gbi mɛi, ndɔlei i ngi lɔilɔ.

³ Kɛ Numu Gɔlɛmɔi i wanga ngi gama yɛ, “Ina Ngewɔ Hindoloi lɔ a bie, kɛ nde kɔtii jisia ma ti wote a bledii.”

⁴ Kɛɛ Yesu i poteilɔ yɛ, “Ngewɔ Gɔlɛi yɛ, ‘Nuuvu lɛɛvu ii hɛlɛni a mɛhɛɛ lekee, kɛ na lee gbi njɛpɛ le a gbua Ngewɔ laa.’ ”

⁵ Kɛ Seitana i ya a ngie Jelusalɛm, ta magayemangɔi, i ngi lɛ Ngewɔ Wɛlei Wai yeeveenii hu,

⁶ i nde ngi ma yɛ, “Ina Ngewɔ Hindoloi lɔ a bie, gbenda bi gbuja, ajifa Ngewɔ Gɔlɛi i ndeilɔ yɛ, ‘Ngewɔ a bi malaahi wualɔ ngi malikeisia ma; ta bi gbawolɔ a loko, aako bi gɔwɔi vulii aa hɔwɔ kɔtu ma.’ ”

⁷ Yesu i ndeilɔ ngi ma yɛ, “Kɛɛ Ngewɔ Gɔlɛi i gbɔma ndeilɔ yɛ, ‘Baa Ndemɔi bi Yewɔɛi gɔlɛ.’ ”

⁸ Na wooma Seitana i pieilɔ tia Yesu ti lɛ ngiye guha wa wumba, i mahawuisia kpɛlɛɛ gɛ a ngie dunyei hu kɛɛ ti gbateisia,

⁹ i nde ngi ma yɛ, “Nga ji gbi velɔ bi wɛ ina bi wombi gbakpangaa bi nya vɛli.”

¹⁰ Kɛ Yesu i ndea ngi ma yɛ, “Hiye nya wooma Seitana! Ajifa Ngewɔ Gɔlɛi i ndeilɔ yɛ, ‘Ba Ndemɔi bi Yewɔɛi lɔ vɛli, tawao ta yakpe lɔ mahoungɔ bi ngi magbewe gbua.’ ”

¹¹ Kɛ Seitana i hiyenga Yesu wooma; kɛ malikeisia ti wanga gbɔva ngi ma.

Yesu Lɔ Ngi Yengei Lɔtoma Galili

¹² Kia Yesu i mɛnini kɛ ti Jɔn wunga kpindiwɛlei bu, i gbuailɔ, i lɛ Galili lɔlei hu.

¹³ I liilɔ Nasalɛti kɛɛ ii lɛmbini na; i lini Kapaniɔm lɔ i hei na, Galili Wopei gbla, Sɛbiulɔn kɛɛ Naftali yeembondeisia ti nda lɔlei hu.

¹⁴ Ji i wieilɔ aako na la i hou Ngewɔ i puni ngi lutui Aisaya la yɛ,

¹⁵ “Sɛbiulɔn lɔlei kɛɛ Naftali lɔlei, i laani gboyei gblanga, Jɔdan yɛi yeengejahui, yeendɔlɛi la a Galili, mia nasia tii yɛni a Juublaa ti heini na!

¹⁶ Nungei nasia ti yɛ heini kpindi hu ti foofo wa lɔnga tawao foofo i wunga nasia ma ti yɛ heini hɛi yeenɛnɛi yeekpindii hu.”

¹⁷ I hiye watii na ma Yesu i tɔtoilɔ a ngi wowili yekpei lela yɛ, “A wounve wu jumbuisia ma ajifa Ngelegoohu Mahayɛi lɔ na kpla!”

Yesu Lɔ Nyɛɛ Gbɛbla Naani Lolima

¹⁸ Kia Yesu i yɛ jiama Galili Wopei gblanga, i ndeehinga fele lɔilɔ nyɛɛ gbɛbla a tie, Saimɔn na ti yɛ toli a Pita kɛɛ ngi ndewei Andru ta nyɛi gbɛ a ti bomɛi.

¹⁹ Yesu i ndeilɔ ti ma yɛ, “A to nya wooma, nga wu gaalɔ a nuuvungaa houla wava a tie tova nya wooma.”

²⁰ Ti ti bomɛisia lɔilɔ ti to ngi ma ngama.

²¹ I liilɔ kulo gbɔma kɛ i ndewehinga weka fele lɔnga, Jemisi kɛɛ Jɔn, Kenɛi Sɛbidi leengeisia. Ti yɛ ndɛndɛi hu lɔ tia ti kɛkɛ Jɛbidi-ni ta ti bomɛisia hugbatɛ, kɛ Yesu i ti lolinga.

²² Ngama kɛ ti ndɛndɛi longa kɛɛ ti kɛkɛ ti to ngi ma.

Yesu Lɔ Nungaa Gaama, A Nungaa Bawo, A Ngewɔ Yiɛi Le

²³ Yesu i jiɛilɔ Galili lɔlei hu gbi a nungeisia gaa ti hɛɛ wɛleisia bu, a Ngowili Yekpei lekɔlongo Ngelegoohu Mahayɛi ma, a nungei nasia bawo heegbɛ laasi gbi lekee i yɛ ti ma.

²⁴ Ngi malɔwɔi i vayɛilɔ ndɔlei hu gbi kɛɛ Siria lɔlei bɛɛ, na hii nungaa ti wɛilɔ ngi gama a heegbɛbla gbi, nasia heegbɛ kɛɛ kpalɛ gɛwɛgɛwɛisia ti yɛ ti ma; nasia ngafa nyamuisia ti yɛ ti hu kɛɛ kpɔgbɔniblɛisia kɛɛ kpɔɔkpɔblɛisia, tawao i ti gbi bawoilɔ.

²⁵ Faha waa ti yɛlɔ a to Yesu ma ta gbua Galili kɛɛ Taa Puisia hu kɛɛ Jelusalɛm kɛɛ Judia kɛɛ ndɔlei na i Jɔdan yɛi wooma.