MATIU 3 - Ngowili Yekpei Numu Kpɛlɛɛ Va

Jɔn Nguamɔi Yewɔ Yia Lelei

¹ A watii na, Jɔn Nguamɔi i wɛilɔ Judia yeendɔgbɔ lambɛi ma i tɔtoo a Ngewɔ yiɛi lɛla

² yɛ, “A wounve wu jumbuisia ma ajifa Ngelegoohu Mahayɛi ma i gutua!”

³ Jɔn lɔ wɔɔ Ngewɔ layie lemɔi Aisaya i ngi yɛpɛ leni ji i ndeni yɛ, “Numu yila lɔ hee lama ndɔgbɔ lambɛi ma yɛ, ‘A pele la Ndemɔi wɛ; wu pele wɔnangɔ la ngi jiava la!’ ”

⁴ Jɔn maguleisia ti gbatɛngɔ yɛla a nyɔma yomboi lɔ, hua-gɔlɛi yeehakpɛi i ngi lia, tawao ngi mɛhɛɛ lɔ wɔɔ a kondeisia kɛɛ kɔmii.

⁵ Nungaa ti yɛlɔ a wa ngi gama ta gbua Jelusalɛm kɛɛ Judia lɔlei hu gbi kɛɛ ndɔlei na i yɛ Jɔdan yɛi gblanga.

⁶ Ti yɛlɔ a gaye a ti jumbuisia, a ti wua a Ngewɔ yɛi Jɔdan hu.

⁷ Kia Jɔn i Farisii gboto lɔni kɛɛ Sadusiisia ta wa ngi gama ti wuavaa, i ndeilɔ ti ma yɛ, “Wu kaalingɛi jisia kaasoo va! Yee lɔ wu lahii wila va kpaalɛi ma Ngewɔ i njeima hugutungɔ?

⁸ A hindei nasia wie ta kɛ kɛ wu wounvenga wu jumbuisia ma.

⁹ Tawao waa gili la kɛ kpaalɛi a veelalɔ wu ma ji wa nde wɛɛ, ‘Mu gbuanga Ebraham hu lɔ’; gbamaile, gbɛɛ ngi nde wu ma, Ngewɔ gungɔe a piela kɔtii jisia ti ndeengaa le Ebraham wɛ.

¹⁰ Kiahuna koonii lɛngɔenga nguliisia ti hapiisia mahu; ngulu gbi ii wuɛilɔ a nguluwa yekpengaa Ngewɔ a pɔlɔ i pili ngɔmbui hu.

¹¹ Nga wu wua a njɛi lɔ kɛva kɛ wu wounvenga wu jumbuisia ma, kɛɛ numu lɔ wama nya wooma i leweni nya ma poloŋ, ngi gɔwɛi vulii ngii gbekpeni houva mba. A wu wua a Ngewɔ Yafei lɔ kɛɛ ngɔmbui.

¹² Ngi vɛɛlei lɔ ngi yeya witii kpɛlɛɛ yafɛva. A witi yekpei lɛlɔ ngi gbuwui la, i yeekɛi mɔ a ngɔmbui na ɛɛ lufe kunafɔ.”

Jɔn Lɔ Yesu Wuama

¹³ A watii na Yesu i gbuailɔ Galili i wa Jɔn gama Jɔdan yɛi la aako Jɔn i ngi wua.

¹⁴ Kɛɛ Jɔn longɔ yɛla i pie ngi lii i wote, faale i ndeilɔ yɛ, “Bia mia mahoungɔ bi nya wua. Gbɛe na bɛɛ ngi bi wua?”

¹⁵ Yesu i ndeilɔ ngi ma yɛ, “I wie hii a watii ji. Gbamaile hii ma pie aako mu Ngewɔ liimɛi wie.” Kɛ Jɔn i lumanga.

¹⁶ Kia lekee Jɔn i Yesu wuani, i gbuani njɛi hu, ngelei i lawoilɔ kɛ i Ngewɔ Yafei lɔnga a yei kia bomukuloi na, i hei ngi ma;

¹⁷ kɛ ngoo i gbuanga ngelegoohu yɛ, “Nya liima Hindoloi lɔ a ji, ngi hinda i nya goohu nɛngɔ wa le.”