MATIU 20 - Ngowili Yekpei Numu Kpɛlɛɛ Va

Dɔmii kɔlooni Ngengeblɛisia Ma Ti Kpalɛi Hu

¹ “Ngelegoohu Mahayɛi gbuangɔ a kena yila lɔ i humbuni njɔpɔwaahu aako i ngengeblaa pawa yengeva ngi gbalei hu.

² I lumɛilɔ ti pawava a folo yila pawɛi, i ti yoyo yengeva ngi gbalei hu.

³ Kia foloi i lɛni, i yamɛilɔ njɔpɔwaahu, i hiingaa lɛɛnga male na ti heini gbama.

⁴ Kɛ i ndenga ti ma yɛ, ‘Wua bɛɛ a li wu yenge nya gbalei hu. Nga wu pawalɔ a na gbi lekee pɔɔnangɔ.’ Kɛ ti ya.

⁵ Hii lɔɔ i gbɔma pieni a fologundiɛi kɛɛ kpɔkɔvolei.

⁶ Foloi i loni te i gula kɛ i gbɔma ya njɔpɔwaahu i nungaa lɛɛnga lɔ na ti looni gbama; kɛ i ti mɔlinga yɛ, ‘Gbɛe wu luvanga looni gbama mbei?’

⁷ Ti kpɛmboilɔ tɛɛ, ‘Numu gbi ii yaa ngenge veni mu wɛ mu pawava.’ Kɛ i ndenga ti ma yɛ, ‘Kɛ wua bɛɛ a li hɔɔ nya gbalei hu.’

⁸ “Kia foloi i gulani kɛ kpalamɔi i ndenga ngenge mahumɔi ma yɛ, ‘Ngengeblɛisia loli bi ti pawɛisia ve, bi tɔtoo nasia ma ngi gɛlɛni ma a ti wumbula, bi gɛlɛ nasia ma ngi tɔtoni ti ma.’

⁹ Nasia ti gɛlɛni ma a walaa ngengemɛi yeengila gbi i folo yila pawa lavengɔ lɔ majɔɔni.

¹⁰ Faale kia nasia ti humbuni ngengemɛi ti wani pawa wumbumɛi, ti giliilɔ kɛ ti nda pawɛi a lewelɔ kɛlɛmableisia ti ndɛi na ma; kɛɛ tia bɛɛ ti folo yila pawɛi lɔ majɔɔni a ngilangila.

¹¹ Ji ti yeepawei na majɔɔni, ti gbonyɛilɔ a kpalamɔi

¹² tɛɛ, ‘Nungei jisia ti gɛlɛni ma a walaa ti yengeni hawa yakpe, mua foloi i luvanga mu mɔma kpɛiŋ kɛɛ na hu gbi bi mua tieni pawanga mahɔɔngɔ.’

¹³ Kpalamɔi ndeilɔ yeengila ma yɛ, ‘Wolo lɛɛ, ndiamɔ, ngii yaa wu gavani. Folo yila pawa ii le mua wueni mua gɛlɛma?

¹⁴ Bi pawɛi hou bi li; ajifa nya liima le ngi wua kɛlɛmamɔi ji pawa mahɔɔngɔ.

¹⁵ Hinda nyamu mia nga pie ji nga nya yeyahani yayenge kia a nɛɛla mbɛ? Ɔɔ tolei mia bi kpuama bi mbaa ngengeblɛi jisia ma kpekpei ji va ngi pienga a tie?’ ”

¹⁶ Kɛ Yesu i ngi yɛpɛi yakpuanga yɛ, “Faale nasia kɛlɛmablaa a tie ta yɛlɔ a haalablaa tawao nasia haalablaa a tie ta yɛlɔ a kɛlɛmablaa.”

Yesu Lɔ Ngi Haalei Hugɛma Heima Yeesawei

¹⁷ Kia Yesu i yɛ lima Jelusalɛm i ngi gaalopoisia lekee wumbuilɔ i yɛpɛ tia lekee gama ji ti yɛ pelei hu

¹⁸ yɛ, “A wolo, mua lima Jelusalɛm tawao ta nya nya Numu Hindoloi velɔ Saagbuablaa wɛ kɛɛ Sawei Yeekaamɔisia. Ta ngi lɛɛlɔ ngi waavaa,

¹⁹ ti ngi ve kaafii mahangei nasia wɛ Juungaa yaa a tie, yee mahangeisia ta ngi gbafa lɔ ti ngi lewe, ti ngi gbakpa krɔsii ma; kɛɛ lɔwɔi yeesawei ma a vululɔ i hiye hee hu.”

Na Jemisi kɛɛ Jɔn Ti Nje Fɛɛlini

²⁰ Na wooma kenɛi Sɛbidi hingaleengeisia ti nje i wɛilɔ a ngi hingaleengaa feleisia Yesu gama, i wombi gbakpa ngi gɔwɔbu, i hinda yila huvɛli ngi ma.

²¹ Yesu i ngi mɔlilɔ yɛ, “Gbɔɔ bi longɔ la” Kɛ nyaapoi i kpɛmbonga yɛ, “Nya longɔ bi pie nya hingaleengaa felei jisia yeengila i hei bi yejahui, yeepekei i hei bi gɔwɔhui ji ba mahayɛi mɛ.”

²² Yesu i ndeilɔ nyapoi leengeisia ma yɛ, “Wuii na gɔɔ wu fɛɛlima. Kpalɛi na i bolei hu ngi wama kpɔlima waa lumalɔ wu kpɔle?” Ti kpɛmboilɔ tɛɛ, “Ma lumalɔ.”

²³ Yesu ndeilɔ ti ma yɛ, “Tɔnya le, kpalɛi na i wama lama nya ma a lalɔ wu ma, kɛɛ nasia gɛva ta hei nya yejahui kɛɛ nya gɔwɔhui, yeekpayei ii nya wɛ. Heimi nasia ti nasia va lɔ nya Kɛkɛ i kpatɛnga ti va.”

²⁴ Ji kaalopo puu wekeisia ti ji humɛnini ti liileweilɔ ndewehinga felei jisia ma.

²⁵ Kɛɛ Yesu i ti kpɛlɛɛ lolilɔ ngi gama, i nde yɛ, “Wu kɔɔlɔ kɛ nasia tii lani a Ngewɔ ti mahangeisia ta temaya lɔ gɛ a tie tawao ti gulɔbleisia ta kpayei lɔ yayenge ti maahu.

²⁶ Ɛɛ yɛ hii wu lia; kɛɛ numui na i wu lia ngi longɔ i yɛ a numu waa, i yɛ a yeemɔniisia ti bɔilopoi;

²⁷ tawao numui i wu lia ngi longɔ i yɛ a haalamɔ, i yɛ a wu luwɔi;

²⁸ kia nya Numu Hindoloi i na, ii wani aako numu i yenge ngi wɛ kɛɛ aako i yenge tawao i ngi lɛɛvui ve a ngumawohani numu gboto va.”

Yesu Lɔ Pumublaa Fele Bawoma

²⁹ Kia Yesu tia ngi gaalopoisia ti yɛ gbuama Jɛliko, faha waa ti toilɔ ti ma.

³⁰ Pumublaa fele, ti heini pelei gbla, ti mɛnilɔ kɛ Yesu mia i lewema kɛ ti tɔtonga a yelei gulala tɛɛ, “Mahɛi Devidi Hindoloi! Mu mamamau lɔ!”

³¹ Fahii ti jɔlɛilɔ ti ma tɛɛ ti londo. Kɛɛ ti yelei gulailɔ tewengɔ na ma tɛɛ, “Devidi Hindoloi! Mu mamamau lɔ!”

³² Kɛ Yesu i longa i ti loli yɛ, “Gbɔɔ wu longɔ ngi pie wu wɛ?”

³³ Ti kpɛmboilɔ tɛɛ, “Ndemɔi, mu longɔ bi pie mu hinda lɔ.”

³⁴ Ti mamamau i Yesu lɔilɔ, kɛ i jaanga a ti yamɛisia; kɛ ti hinda lɔnga ngaama, ti to Yesu ma.