MATIU 11 - Ngowili Yekpei Numu Kpɛlɛɛ Va

Jɔn Nguamɔi Lutuisia

¹ Kia Yesu i kpɔyɔni a kaa ji kpɛlɛɛ gɛla a ngi gaalopo puu maahu felesia i gbuailɔ yeehindei na i li Galili yeetaa wekeisia hu nunga gaava kɛɛ Ngewɔ yiɛi leva.

² Ji Jɔn Nguamɔi i loni kpindiwelɛi bu i hindei nasia mɛni Kristi i yɛ pie, i ngi gaalopoisia lɛɛnga loilɔ ngi gama.

³ Ti ngi mɔlilɔ tɛɛ, “Bia lɔ Jɔn i ndeni yɛ biaa wama ɔɔ mu numu weka gulɔgbe?”

⁴ Yesu i kpɛmboilɔ yɛ, “A yaama wu hugɛ a Jɔn gbɔɔ wu mɛnima kɛɛ na wu tɔma:

⁵ pumublɛisia lɔ hinda lɔma gbɔma, kpɔɔkpɔblɛisia ta jia, kpɔukpɔublɛisia ta bawo ti luwui a yɛ sɛwɛ, ngolihu-lutublɛisia ta njia mɛni, haableisia ta wu hee hu, Ngowili Yekpei a le fɛɛliblɛisia ma.

⁶ Kohunɛ lɔ nasia ma nya hinda ɛɛ ti kiti!”

⁷ Kia Jɔn gaalopoisia ti wounveni yamava, Yesu i tɔtoilɔ a yɛpɛla fahii gama kɔlooni Jɔn ma yɛ, “Gbɔɔ wu lii i yɛ ma tɔva ji wu lini wolova Jɔn ma ndɔgbɔ lambɛi ma? Konipɔwɛi fɛfɛi a sɛɛjia?

⁸ Gbɔɔ wu lini tɔvaa? Hindoi ngi mayilingɔ guyɔɔ? Nungei nasia ta ti mayili guyɔɔ ta yɛ maha wɛleisia bu lɔ.

⁹ Gbɔɔ hɔɔ wu lini tɔma? Ngewɔ lutui? A tɔnya, ngi hugɛ a wue, wu numu lɔilɔ tewengɔ Ngewɔ lutu ma.

¹⁰ Jɔn lɔ Ngewɔ Gɔlɛi i yɛpɛni ngi va yɛ, ‘Nga nya lutui lolɔ bi gulɔ i bi welei gbatɛ bi gulɔ.’

¹¹ Gbɛɛ ngi hugɛ a wue, a tɔnya, kɛ Jɔn i leweni nasia gbi ma nyahangaa ti ti leni dunyei ji hu, kɛɛ numui na kulongɔ tewengɔ nasia gbi ma ti Ngelegoohu Mahayɛi hu i leweni ngi ma.

¹² I hiye watii na ma Jɔn i ngi Yewɔ yiɛi leni, Ngelegoohu Mahayɛi kpalɛ gboto hulɔnga tawao ndapiblaa lɔ lapima houva a kpaya.

¹³ Pɛiŋ Jɔn watii i yaa hiti, Ngewɔ lutuisia gbi kɛɛ Mojisi Jawei ti kulɔmayia leilɔ kɔlooni Ngelegoohu Mahayɛi walei ma;

¹⁴ tawao wu lumangaa wu la a ti wowili, Ilaija na ti ndeni tɛɛ a wa, tamia a Jɔn.

¹⁵ Ina ngoli gbi lɔ numu ma njia mɛniva, i wolo ji ma.

¹⁶ “Kɛɛ nga haableisia huma gbɛ lɔ ma? Ti gbuangɔ a jialeengeisia lɔ ti heini njɔpɔwaahu ta ti mbaangɛisia loli

¹⁷ tɛɛ ‘Mu nyaha-gɔli-gomɛi yee ngulei yaanga kɛɛ wuii lumani waa looli; mu haa-wuleisia yaanga kɛɛ wuii lumani waa wɔɔ.’

¹⁸ Ji Jɔn i wani, i yɛlɔ a sui hou tawao ɛɛ ndɔ gboli, kɛ numui gbi ti ndea tɛɛ, ‘Ngafa nyamui lɔ ngi woma’;

¹⁹ Nuuvu Hindoloi i wɛilɔ, a mɛhɛɛ mɛ a ndɔ gboli, kɛ numui gbi ti ndea tɛɛ, ‘A taamɔi ji lɔ lɛɛ! Ndiimɔ mia a ngie kɛɛ ndɔ gbolimɔ gbama, pawa wɔyɔblɛisia kɛɛ jumbubleisia ti ndiamɔi!’ Na hu gbi Ngewɔ nɛmahulewei yengeyii lɔ a ngi lɔnyayii gɛ.”

Tei Nasia Tii Yɛ Lani A Ngewɔ

²⁰ Tei nasia Yesu i ngi gabande yengei gbotoma wieni na, yeenungeisia tii wounveni ti jumbuisia ma, faale i tɔtoilɔ a yialaa ti ma.

²¹ I ndeilɔ yɛ, “I wama nyamuma kpa wu va Kolasi! I wama nyamuma kpa wua bɛɛ va Bɛtsaida! Ajifa ina kabande yengei nasia ti wieni wu hu i wieilɔ Taya kɛɛ Saidɔn, yeenungeisia taa bɛki yililɔ, ti nduvui gbɛkpɛi wumba kɛva kɛ ti wounvenga ti jumbuisia ma.

²² Gbɛɛ ngi hugɛ a wue a tɔnya, kpɛmbo-volei ma kɛyila, Ngewɔ a manulɔ Tayablɛisia ma kɛɛ Saidɔnblɛisia i lewe wu ma.

²³ Wu Kapaniɔmblɛisia! Wu yɛ loni wu wua yekpe lɛ wu fo Ngelegoohu. Ngewɔ a wu yeilɔ jahama. Ajifa ina kabande yengei nasia ti wieni bi hu ti wieilɔ Sɔdɔm, aa yɛlɔ na kiahuna bɛɛ.

²⁴ A la la kɛ kpɛmbo-volei ma kɛyila, Ngewɔ a manulɔ Sɔdɔmblɛisia ma i lewe wu ma.”

A Wa Nya Gama Wu Lɛɛvu

²⁵ A watii na Yesu i ndeilɔ yɛ, “Kɛkɛ, ngelegoohu kɛɛ dunya yee Ndemɔi, ngi siɛgbua bi ma ajifa bi hindei jisia lɔwunga nɛmahulewebleisia ma kɛɛ hinda hugɔɔ blɛisia bi hugɛnga a ndolangaa.

²⁶ Hii i na, Kɛkɛ, ajifa hii i nɛni bi wɛ pieva.

²⁷ “Nya Kɛkɛ i hani gbi loko wuaanga nya yeya. Numu gbi ii Hindoloi gɔɔ kɛlee Kɛkɛi tawao numu gbi ii Kɛkɛi gɔɔ kɛlee Hindoloi kɛɛ nasia a nɛɛ ngi wɛ ngi gɛva a tie.

²⁸ “A wa nya gama wua wu gahu gbɔyɔngɔ tawao kiti gbangɔngaa ti wu ma, nga yeekitiisia gbualɔ wu ma.

²⁹ A nya gaiŋ wumbu kɛɛ kaa na nga kɛ; ajifa nya lii gɔlɛngɔ tawao ngii mamanini, na wiengaa wu yafeisia ta ndiilɛli majɔlɔ.

³⁰ Gbamaile kaiŋ nasia nga fe wu wɛ ti bɛɛbɛɛngɔ li va la; tawao ngengei nasia nga fe wu wɛ tii kpaukpauni pieva.”