MAAKI 16 - Ngowili Yekpei Numu Kpɛlɛɛ Va

Yesu Lɔ Hiyema Hee Hu

¹ Kia Ndɛvu Volei i leweni, Meri Magdalamɔi kɛɛ Meri, Jemisi ngi nje kɛɛ Salomi ti ngulɔ gu nɛnɛɛngaa yeyɛilɔ liva la aako ti sia Yesu womɛi ma.

² A ngenda tɛtei Sɔndei ma, ji foloi i yɛ lawoma, ti liilɔ kambɛi gama.

^3-4 Ji ti yɛ pelei hu, ti yɛlɔ a ti nyɔunyɔ mɔli tɛɛ, “Ye lɔ na a kɔtii na gilikili i kpua mu wɛ kambɛi la?” ajifa kɔtu lakpa wa yɛla. Kɛɛ kia ti ti wui wumbuni, ti tɔilɔ kɛ kɔtii gilikilingɔi kpuangɔ kambɛi la.

⁵ Faale ti wuailɔ yeekambɛi goohu, ti foninge hindo yila male na i heini a ngejahui wee, ndoma gowei i ngi ma, kɛ ti wuhu i wunga.

⁶ Kɛ i ndenga ti ma yɛ, “Wu wuhu aa wu, ngi kɔɔlɔ kɛ wu Yesu Nasalɛtimɔi lɔ gɔkɔlima, na ti kpakpani krɔsii ma. I hiyenga hee hu, ii yaa mbe. A tɔlɛ, mbe mia ti ngi lani na.

⁷ A li na wu yeevei ji gɛ a ngi gaalopoisia, kpɛɛngɔ Pita ma, wɛɛ, ‘Ta lima wu gulɔ Galili; na lɔ wa ngi lɔ na, kia i ndeni la wu ma.’ ”

⁸ Kɛ ti gbuanga kambɛi goohu, ti li a piimɛ, ti lii nyaningɔ, ti luwangɔ. Tii njɛpɛ gbi leni numu gbi ma ajifa ti luwangɔ yɛla. [

Yesu Lɔ Gɛma A Meri Magdalamɔi

⁹ Ji Yesu i hiyeni hee hu Sɔndei ma, i gɛni yese a Meri Magdalamɔi lɔ, na wɔɔ i ngafa nyamu wɔfleisia gbuani ngi hu.

¹⁰ Meri i liilɔ i hugɛ a Yesu woomableisia. I ti maleni ta wɔɔ a ndiinyani;

¹¹ tawao ji i hugɛni a tie yɛ Yesu i vulunga tawao yɛ ta vulii i ngi lɔnga a yaama, tii lani a ngie.

Yesu Lɔ Gɛma A Ngi Woomablaa Fele

¹² Ji wooma Yesu i gɛilɔ a pele weka hu wee a ngi woomablaa fele ji ti yɛ pelei hu ta li fuula yila hu.

¹³ Ti yamɛilɔ ti hugɛ a yeepekeisia kɛɛ tii lani la.

Yesu Lɔ Gɛma A Ngi Gaalopo Puu Mahu Yileisia

¹⁴ Kɛlɛmɛi, Yesu i gɛilɔ a ngi gaalopo puu maahu yileisia ji ti yɛ mɛhɛɛ mɛma. I yiɛilɔ ti ma ajifa tii lani a ngi vulula tawao ti woohu gbɔndangɔ wa yɛla lava a nasia ti ngi lɔni ngi vulungɔ.

¹⁵ I ndeilɔ ti ma yɛ, “A li dunyei hu gbi wu Ngowili Yekpei le numui kpɛlɛɛ ma.

¹⁶ Numu gbi lekee i langaa la, wu ngi wua, a bawolɔ; numu gbi lekee ii lɛilɔ la, a ndɛɛ jɔlɔ kuna kpɛmbo-volei ma.

¹⁷ Nasia ta la la ta kpaya majɔɔlɔ kabandei jisia nyɔkɔ wieva: ta ngafa nyamuisia gbualɔ nungaa hu nya biyei hu; ta yɛpɛlɔ kɛnyɛyia wekangaa hu;

¹⁸ kalingaa bɛɛ ti ti nyi ɔɔ ti hubɔnɔ gboli, hinda gbi ɛɛ ti wie; ta loko wɛlɛlɔ heegbɛbla ma, yeeheegbɛbla ti bawo.”

Yesu Lɔ Lɛma Ngelegoohu

¹⁹ Kia Yesu tia ngi gaalopoisia ti kpɔyɔni a yɛpɛla, i wumbuilɔ ndɔma, i lɛ ngelegoohu, i hei Ngewɔ yejei hu.

²⁰ Ngi gaalopoisia ti liilɔ ti Ngowili Yekpei le hu gbi tawao tia Ndemɔi Yesu-ni lɔ ti yɛ yenge, a kɛ kɛ ti Wowili lɔnyangɔe kabande hindei nasia va ti yɛ pie.]