LUKI 7 - Ngowili Yekpei Numu Kpɛlɛɛ Va

Yesu Lɔ Roma Gugbɛi Bɔilopoi Bawoma

¹ Kia Yesu i kpɔɔyɔni a njɛpɛi jisia kpɛlɛɛ lela nungeisia ma kɛ i ya Kapaniɔm.

² Roma gugbɛi na i yɛ na, bɔilopo yɛlɔ ngi yeya ngi longɔ la gbouŋ; yeebɔilopoi heegbɛngɔ yɛla a lo te i haa.

³ Kia Kugbei i Yesu malɔwɔi mɛnini, i Juubleisia yee kpakoleisia lɛɛnga loilɔ Yesu lolima yɛ i wa i ngi bɔilopoi bawo.

⁴ Ti wɛilɔ Yesu gama ti ngi manɛnɛ gbouŋ tɛɛ; “Mahoungɔ vulii bi gbɔ taamɔi ji ma.

⁵ Ngi longɔe a mu bondeisia tawao ta vulii i hɛɛ wɛlɛ longa mu wɛɛ.”

⁶ Faale Yesu i toilɔ ti ma tia tieni ti li. Kia i foni Kugbei wɛlei gbla, kɛ Kugbei i ngi ndiamɔisia longa Yesu gama yɛ, “Kaamɔ, ba bia yekpe mɔnɛ. Nya ma ii houni bi wua nya wɛlei bu,

⁷ tawao nya langɔe la kɛ ngii gbekpeni lova bi gulɔ. Bia kpua lekee la bɛɛ nya bɔilopoi i bawo, a bawolɔ.

⁸ Nya bɛɛ ngi Kugba waawangaa ti gbayei bu lɔ tawao sojeisia lɔ nya bu. Nga ndelɔ yeeji ma ngɛɛ ‘Li’ kɛ i ya; ngɛɛ yeena ma ‘Wa!’ kɛ i wanga; tawao nga ndelɔ nya luwei ma ngɛɛ ‘Ji wie!’ kɛ i pienga.”

⁹ Ji Yesu i ji mɛnini, i gualɛilɔ ngi ma; kɛ i wotenga i nde fahii na ma ti yɛ to ngi ma yɛ, “Ngi hugɛ a wue, kia wɔɔ gba ngii ya lala a Ngewɔ bondei ji lɔni, Isrɛl goohu vulii bɛɛ!”

¹⁰ Tutuisia ti yamɛilɔ Kugbei yeepɛlɛbu tawao ti maleni ngi bɔilopoi bawongɔ.

Yesu Lɔ Ponyahɛi Hindoloi Wuma Hee Hu

¹¹ Hugutungɔ na wooma, Yesu i liilɔ taa yila hu ta toli a Neen, ngi gaalopoisia kɛɛ faha wa ti ngi wooma.

¹² Kia lekee i foni tei yeekatei lama, i tɔilɔ haa-gbɔwu vahɛi a gbua. Pomɛi ji yakpe mia i yɛ ngi nje yeya a ndo tawao yeenyapoi ponyaha yɛla; faha wa ta gbua tei na gooma gbi ti yɛlɔ ngi woma.

¹³ Kia Ndemɔi i ngi lɔni, ngi mamamau i ngi lɔilɔ hulewengɔ, kɛ i ndenga ngi ma yɛ, “Baa wɔɔ.”

¹⁴ Kɛ i ya i ja a hakei, kɛ nasia ti yɛ looni mbu ti longa. Kɛ Yesu i ndenga pomɛi ma yɛ, “Foningei! Ngɛɛ bi ma, hiye!”

¹⁵ Pomɛi i hiyeilɔ i hei, i tɔtoo a yɛpɛlaa, kɛ Yesu i ngi yamanga ngi nje ma.

¹⁶ Nduwɛi i ti gbi huveilɔ, ti Ngewɔ lato tɛɛ, “Ngewɔ lutui wa i gbɔkunga mu lia! Ngewɔ i wanga ngi nungeisia bawova!”

¹⁷ Yesu malɔwɔi ji i vayɛilɔ tatei na hu gbi kɛɛ ndɔlei na i yɛ ti galangɔ.

Jɔn To Wienga Yesu Gama

¹⁸ Kia Jɔn gaalopoisia ti yeehindei jisia gbi hugɛni a ngie, i ti fele lolilɔ

¹⁹ i ti lo Ndemɔi gama ngi mɔliva tɛɛ, “Bia lɔ Jɔn i bi wa-yiɛi leni ɔɔ mu numu weka gulɔ gbe?”

²⁰ Kia ti wani Yesu gama, ti ndeilɔ ngi ma tɛɛ, “Jɔn, Nguamɔi mia i mu longa bi mɔliva ina bia mia i ndeni yɛ bia wama ɔɔ ina mu numu weka gulɔ gbe?”

²¹ Yeewatii na vulii ma, Yesu i numu gboto bawoilɔ ti heegbɛisia hu kɛɛ ngafa nyamuisia ti ti woma, i pie pumublaa gboto ti hinda lɔ.

²² I poteilɔ i nde Jɔn gaalopoisia ma yɛ, “A yama wu hugɛ a Jɔn gbɔɔ wu tɔnga kɛɛ na wu mɛninga: pumublaa ti gunga a hinda lɔla, kpɔɔkpɔbla ti gunga a jiala, kpɔukpɔubla ti luwui i yɛnga sɛwɛ, ngolihu-lutubla ti gunga a njia mɛnila, pomɛisia ti hiyenga hɛi hu, tawao Ngowili Yekpei i lenga fɛɛlibla ma.

²³ Nasia ti lubangɔe ti sekangɔ ii le nya-hinda hu!”

²⁴ Kia Jɔn gaalopoisia ti wounveni, Yesu i tɔtoilɔ a yɛpɛla fahii gama kɔlooni Jɔn ma yɛ, “Ji wu lini Jɔn gama ndɔgbɔ lambei ma, gbɔɔ wu lii i yɛ ma tɔvaa? Kpitii yeendawɛi fɛfɛi a koto?

²⁵ Gbɔɔ wu lini tɔvaa? Hindoi ngi mayilingɔ guyɔɔ? Nasia ta ti mayili hii, ta mɛhɛɛ mɛ, ta yɛ maha-wɛleisia bu lɔ!

²⁶ A hugɛ a nge, gbɔɔ wu lini tɔvaa? Ngewɔ lutui? A tɔnya, wu numu loilɔ tewengɔ poloŋ Ngewɔ lutui ma.

²⁷ Gbamaile Jɔn lɔ Ngewɔ Gɔlɛi i ndeni ngi va yɛ, ‘Ngewɔ yɛ, Nga nya lutui lolɔ i pelei lawo bi gulɔ.’

²⁸ Gbɛɛ ngi hugɛ a wue, Jɔn i leweni hindo gbi ma ti ngi lenga dunya. Kɛɛ numui na ngi gulongɔ i lewe ti gbi ma Ngewɔ mahayɛi hu i leweni Jɔn ma.”

²⁹ Numui gbi ti Jɔn woo mɛnini, kakaye pawa wɔyɔblɛisia, ti yɛ kɔɛilɔ kɛ Ngewɔ liima hindei lɔ pɔɔnangɔ, ti lumai lɔ Jɔn i ti wua.

³⁰ Kɛɛ Farisiisia tia Sawei Yeekamɔɛisia ti gbeilɔ na ma i yɛ Ngewɔ nɛmahu ti va, tii lumani Jɔn aa ti wua.

³¹ Yesu i liilɔ gulɔma a ngi yɛpɛi yɛ, “Nga foloi ji mableisia huma gbɔɔ ma? Ti gbuangɔ a gbɔɔ?

³² Ti wiengɔe kia ndeengɛisia ti na, ti heini njɔpɔwahu. Kɛ yeejisia ti yelei gulanga yeenasia gama tɛɛ, ‘Mu nyaha-gɔli-gomɛi yeengulei yanga wu ma kɛɛ wuii lumani wa looli! Mu haa-wuleisia yanga kɛɛ wuii lumani wa wɔɔ!’

³³ Jɔn, Nguamɔi, i wɛilɔ, ɛɛ ndɔ gboli tawao a sui hou, kɛ wu ndenga wɛɛ, ‘Ngafa nyamu mia i ngi hu!’

³⁴ Nuuvu Hindoloi i wanga, a mɛhɛɛ mɛ, a ndɔ gboli, kɛ wu ndenga wɛɛ, ‘A taamɔi ji lɔ lɛɛ! Ngi liingɔ tawao a ndɔi gboli, pawa wɔyɔblɛisia kɛɛ jumbubleisia ti ndiamɔi a ngie!’

³⁵ Ngewɔ nɛmahulewei lɔnyala a gɛlɔ nasia gbi hu ta loko hei mbu.”

Yesu Lɔ Saimɔn Farisiimɔi Yeepɛlɛbu

³⁶ Farisiimɔ yila i Yesu lolilɔ mɛhɛɛ ma, kɛ Yesu i ya yeefarisiimɔ yeepɛlɛbu, i hei yeemɛhɛi mɛva.

³⁷ Tei na hu, nyaha yila yɛlɔ na jumbumɔ wa a ngie. I mɛnilɔ kɛ Yesu lɔ mɛhɛɛ mɛma Farisiimɔi yeepɛlɛbu, faale i wɛilɔ a babɔɔ-jani, ngulɔ gu nɛnɛɛ i hu,

³⁸ i lo Yesu wooma a ngi gɔyahuwee, a wɔɔ, ngayɛi a wu Yesu gɔwɔisia ma. Kɛ i Yesu gɔwɔisia mayilanga a ngi wundiei, i ti magɔmi, i yeengulɔ gunɛnɛ wuti ma.

³⁹ Kia Farisiimɔi i ji hulɔni, i ndeilɔ nɛmahu yɛ, “Ina taamɔi ji i yɛni vulii a Ngewɔ lutui lɔ, aa kɔɔlɔ ye lɔ a nyapoi ji i jaama a ngie; aa kɔɔlɔ jumbu hindei kinɛiŋ wɔɔ i piema!”

⁴⁰ Yesu i yɛpɛilɔ i nde ngi ma yɛ, “Saimɔn, njɛpɛ lɔ nya la ndeva bi ma.” Saimɔn ndeilɔ yɛ, “Kaamɔ, gbɛ le?”

⁴¹ Kɛ Yesu i tɔtonga yɛ, “Kpa wilimɔ yila ngi gbɛi yɛlɔ taamɔ fele ma. Ngi gbɛi i yɛ yeengila ma kani gbaa gɔpɔ hɔndɔɔ lɔɔlu, i yeepekei ma kani gbaa gɔpɔ numu fele gbɔyɔngɔ mahu puu.

⁴² Hani gbi ii yɛ ti veenjɔ kpɛlɛɛ yeya kpɛi nasia gbuava, faale kpa wilimɔi i gbeilɔ kpɛi na veenjɔɔ kpɛlɛɛ ma. Kpabla felei jisia yeegbɔɔ a lo a kpa wilimɔi i lewe ngi mbaa ma?”

⁴³ Kɛ Saimɔn i kpɛmbonga yɛ, “Nya langɔ la a yɛlɔ a numui na ti gbeni ngi ma kpɛi yeesɛmbɛi va.” Yesu ndeilɔ yɛ, “Bi ndenga tɔnya ma.”

⁴⁴ Kɛ i wotenga nyapoi gama i nde Saimɔn ma yɛ, “Bi nyapoi ji lɔnga? Ngi wuanga ha bi wɛlei ji bu, bii nja gbi veni mbɛ nya gɔwɔmɛi wuava, kɛɛ i nya gɔwɔma wuanga a ngayɛi, i ti mayilanga a ngi wundiei.

⁴⁵ Bii nya guluni ba nya lagɔmi, kɛɛ i hiye ha nya wangɔi ma ii ya gbeni a nya gɔwɔisia magɔmila.

⁴⁶ Bii sia-wulɔ gbi wuni nya wui hu kɛɛ i nya gɔwɔisia malinga a ngulɔ gunɛnɛ.

⁴⁷ Gbɛɛ ngi hugɛ a bie, ndoma wai ji i kɛnga, i selinga kɛ Ngewɔ i manunga ngi jumbuisia ma kia bɛɛ ti gbotongɔ. Kɛɛ numu gbi ta manu ngi ma kulo, a ndoma wulo lekee lɔ gɛ.”

⁴⁸ Kɛ Yesu i ndenga nyapoi ma yɛ, “Bi jumbuisia ti kafainga bi ma.”

⁴⁹ Nungaa wekei nasia ti yɛ heini tebii ma ti tɔtoilɔ a ndela ti nyɔunyɔ ma tɛɛ, “Ye lɔ a ji, a manu jumbuisia ma?”

⁵⁰ Kɛɛ Yesu i ndeilɔ nyapoi ma yɛ, “Bi lalɛi a Ngewɔ i bi bawonga; li ndiilɛli hu.”