LUKI 4 - Ngowili Yekpei Numu Kpɛlɛɛ Va

Yesu Gɔlɛlei

¹ Yesu i gbuailɔ Jɔdan lateisia hu Ngewɔ Yafei i ngi lavengɔ, kɛ yeengafei i pienga i li ndɔgbɔ lambɛi ma,

² Seitana i ngi gɔlɛ na njii numu fele gbɔyɔngɔ va. Lɔwɔi na hu kpɛlɛɛ ii mɛhɛɛ gbi mɛni tawao yeekɛlɛmɛi ndɔlei i ngi lɔilɔ.

³ Seitana ndeilɔ ngi ma yɛ, “Ina Ngewɔ Hindoloi mia a bie, kɛ nde kɔtii ji ma i wote a bledii.”

⁴ Kɛɛ Yesu i ndeilɔ ngi ma yɛ, “Ngewɔ Gɔlɛi ndeilɔ yɛ, ‘Bledii yakpe ii le nuuvu lɛɛvui aa hɛlɛ la.’ ”

⁵ Kɛ Seitana i lɛnga a ngie ngeleya, i dunyei hu gbi gɛ a ngie ngama,

⁶ i nde ngi ma yɛ, “Kpayei ji gbi kɛɛ yeekpatɛi nga felɔ bi wɛ, ajifa fengɔe nya wɛ tawao numu gbi lekee nya longɔ a ngie nga felɔ ngi wɛ.

⁷ Ina ba lumalɔ bi gula nya gɔwɔbu, kpɛlɛɛ a yɛlɔ a bi woo.”

⁸ Yesu i poteilɔ yɛ, “Ngewɔ Gɔlɛi i ndeilɔ yɛ, ‘Ba gula Ndemɔi bi Yewɔɛi lɔ gɔwɔbu, tawao ta yakpe lɔ ba hɛɛ ngi ma.’ ”

⁹ Kɛ Seitana i ya a ngie Jelusalɛm i ngi lɛ Ngewɔ Wɛlei yeeveenii hu, i nde ngi ma yɛ, “Ina Ngewɔ Hindoloi lɔ a bie, gbenda mbei bi gbuja.

¹⁰ Ajifa Ngewɔ Gɔlɛi yɛ, ‘Ngewɔ a ndelɔ ngi malikeisia ma ti bi mahugbe pandawanda.’

¹¹ I gbɔma ndeilɔ yɛ, ‘Ta bi houlɔ yeya tawao bi gɔwɔi vulii bɛɛ ɛɛ hɔwɔ kɔtu ma.’ ”

¹² Kɛɛ Yesu i poteilɔ ngi ma yɛ, “Ngewɔ Gɔlɛi yɛ, ‘Baa Ndemɔi bi Yewɔɛi tɛgu.’ ”

¹³ Kia Seitana i kpɔyɔni a Yesu gɔlɛla a pelei gbi, i gbeilɔ ngi ma watii lɛɛnga va.

Yesu Lɔ Ngi Yengei Lɔtoma Galili

¹⁴ Na wooma Yesu i yamɛilɔ Galili tawao Ngewɔ Yafei gbayei i yɛ ngi wooma lɔ. Ngi malɔwɔi i vayɛilɔ tatei na hu gbi.

¹⁵ I yɛlɔ a nungaa gaa ti hɛɛ wɛleisia bu tawao numui gbi ti yɛlɔ a ngi lato.

Tia Gbelema Yesu Ma Nasalɛti

¹⁶ Kɛ Yesu i ya Nasalɛti, mia wɔɔ ti ngi gbuani hu na, i li ti hɛɛ wɛlei bu Juubleisia ti lɛɛvu volei ma kia kungɔ yɛla ngi hu pieva. I hiyeilɔ i lo Ngewɔ Gɔlɛi gavaa.

¹⁷ Kɛ ti Ngewɔ lutui Aisaya Gɔlɛi venga ngi wɛ. I yeekɔlɔ-gotongɔi huvomboilɔ, i mia lawo nyɛingɔ na tɛɛ,

¹⁸ “Ndemɔi Yafei yeingɔe nya ma, ajifa i loko longa nya ma wava a Ngowili Yekpei fɛɛliblɛisia gama. I nya longa ndeva leeŋ kɛ ta gbelɔ nasia ma ti jɔwɔi ya, pumublɛisia ti hinda lɔ, hinda gbɔundableisia ti wote a mahaleengaa,

¹⁹ aako ngi nde leeŋ kɛ foi i hitinga Ndemɔi a ngi nungeisia bawo.”

²⁰ Yesu i kɔlɛi goteilɔ, i fe hɛɛ wɛlei yeengengemɔi wɛ, i hei. Numui gbi ti yɛ hɛɛ wɛlei bu ti yamɛi gbakpangɔ yɛla ngi ma,

²¹ ji i yɛ ndema ti ma yɛ, “Ngewɔ Gɔlɛi yeekakɛi ji la hounga a foloi ji, kia wu mɛnini ngi kaani.”

²² Ngi hinda i boeilɔ wa ti gbi ma, ti wuhu wungɔ nɛmahulewe yɛpɛi nasia va i ndeni. Kɛ ti ndenga tɛɛ, “Josɛfi loi ya a ngie?”

²³ Kɛ i ndenga ti ma yɛ, “Ngi kɔɔlɔ vulii kɛ wa salei ji heilɔ nya ma wɛɛ, ‘Halemɔi, bia yekpe bawo.’ Wa gbɔma ndelɔ nya ma wɛɛ ngi hindei nasia wie nya lemɛi ji ngi pieni Kapaniɔm wu mɛnini.

²⁴ Gbɛɛ ngi hugɛ a wue, tɛɛ loko hei Ngewɔ lutui bu ngi lemɛi.

²⁵ A wolo nya ma: tɔnya le kɛ ponyahangɛisia ti gbotongɔ yɛla Isrɛl, Ilaija watii hu, watii na nja gbi ii wuani foo sawa kɛɛ yeekutu va kɛ ndɔlɛ yagbalɛngɔ wa i gulanga ndɔlei hu gbi.

²⁶ Na hu gbi Ngewɔ ii Ilaija loni numu gbi gama Isrɛl i ngi loni ponyaha yakpe lɔ gama Serɛpita, Saidɔn lɔlei hu.

²⁷ Tawao gbɔma kpɔukpɔublaa gboto ti yɛlɔ heini Isrɛl Ngewɔ lutui Ilaisa watii hu; na hu gbi ti yilayee bɛɛ ii bawoni, kɛlee lekee Neama, Siriamɔi.”

²⁸ Ji nungei nasia ti yɛ hɛɛ wɛlei bu ti ji mɛnini, ti lii i leweilɔ kpe.

²⁹ Ti hiyeilɔ, ti lo Yesu lalama ti gbua a ngie tei hu, ti li a ngie ngiyei na wumba ti lɛi i yɛ looni na. I yɛ ti nɛmahu lɔ ngi lukpeva i gula gondogondoi hu,

³⁰ kɛɛ i jiɛilɔ fahii lia i li ngiɛ.

Taamɔi Yila Ngafa Nyamui I Ngi Hu

³¹ Na wooma Yesu i liilɔ Kapaniɔm, Galili lɔlei hu, i nungaa gaa Ndɛvu Volei ma.

³² Ti gbi ti wuhu i wuilɔ pelei na va i ti gani la, ajifa i yɛ yɛpɛ a kpaya lɔ.

³³ Taamɔi yila i yɛlɔ hɛɛ wɛlei bu ngafa nyamu i ngi hu; i yele wa gulailɔ yɛ,

³⁴ “Aa! Gbɛɛ bi loko wilima mu mahinda hu, bia Yesu Nasalɛtimɔi? Bi wanga mu jukuluvaa lɔ? Ngi bi gɔɔlɔ: Ngewɔ lutui magayemangɔi lɔ a bie!”

³⁵ Kɛ Yesu i gbandɛnga ngafei la yɛ, “Londo, bi gbua taamɔi ji hu!” Ngafei i tamɔi gulailɔ ndɔmɛi ti gbi yama, i gbua ngi hu, ii hinda nyamu gbi wieni a ngie.

³⁶ Numui gbi ti wuhu i wuilɔ, ta nde ti nyɔunyɔ ma tɛɛ, “Gbɛ mɔnɛ walɔ a kaai yeeji bonda? Taamɔi a nde ngafa nyamuisia ma a kpaya yɛ ti gbua, ta gbua!”

³⁷ Kɛ Yesu malɔwɔi i vayanga taatei na hu gbi.

Yesu Lɔ Numu Gboto Bawoma

³⁸ Yesu i gbuailɔ hɛɛ wɛlei bu i li Saimɔn yeepɛlɛbu. Kɔlɛ wa i yɛlɔ Saimɔn ngi yemɔi ma, kɛ ti Yesu manɛnɛnga gbɔva ngi ma.

³⁹ I liilɔ i lo nyapoi gbukɔi gbla, i nde kɔlɛi ma a kpaya yɛ i gbua ngi ma. Kɔlɛi gbuɛilɔ ngi ma, kɛ i hiyenga i mɛhɛɛ ve ti wɛ.

⁴⁰ Kia foloi i gulani, nasia gbi heegbɛ gɛwɛgɛwɛblaa ti yɛ ti yeya, ti wɛilɔ a tie Yesu gama; i jailɔ a ti gbi, i ti gbi bawo.

⁴¹ Ngafa nyamuisia bɛɛ ti gbuɛilɔ numu gboto hu, ta yelei gula tɛɛ, “Ngewɔ Hindoloi lɔ a bie!” Yesu i yɛpɛilɔ a kpaya ngafa nyamuisia ma, ɛɛ luma ta yɛpɛ ajifa ti yɛ kɔɔlɔ kɛ Ngewɔ Maha Heingɔ lɔ a ngie.

Yesu Lɔ Ngowili Yekpei Lema Hɛɛ Wɛleisia Bu

⁴² Kia ngele i woni Yesu i gbuailɔ tei hu i li hinda yila na yɛngɔ louŋ. Nungeisia ti tɔtoilɔ a ngi gɔkɔlila, tawao kia ti ngi lɔni, ti lapilɔ pieva aa ya li.

⁴³ Kɛɛ i ndeilɔ ti ma yɛ, “Mahougɔe ngi Ngowili Yekpei hugɛ kɔloongɔ Ngewɔ Mahayɛi ma taa wekeisia hu bɛɛ, gbɛ va na mia Ngewɔ i nya loni pieva.”

⁴⁴ Faale i Ngowili Yekpei leilɔ hɛɛ wɛleisia bu ndɔlei na hu gbi.