LUKI 16 - Ngowili Yekpei Numu Kpɛlɛɛ Va

Bɔilopo Gasongɔi

¹ Yesu i gbɔma ndeilɔ ngi gaalopoisia ma yɛ, “Kpatɛmɔ yila i yɛlɔ wɔɔ na bɔilopo i ngi yeya, ngi yeyahani gbi loko i yeebɔilopoi yeya; kɛɛ ti hugɛilɔ a ngie kɛ bɔilopoi ji lɔ ngi navoei hunyanima.

² Faale kenɛi i ngi lolilɔ i nde ngi ma yɛ, ‘Gbɔɔ a ji ngi mɛnima kɔlooni bi ma? Wa a kɔlɛi nasia ba nya navoo hindei gbi yayenge hu bi gona, ajifa bɛɛ ya yɛ a nya yeyahanisia gbi mahumɔ.’

³ Kɛ bɔilopoi i ndenga nɛmahu yɛ, ‘Gbɔɔ nga pie ji na nya lemɔi i nya gbuama tomɛi ji? Ngii gbayani ndɔma wujava, tawao nga wufelɔ a fɛlifɛli wiela.

⁴ Ngi kɔɔlɔ na gbɔɔ nga pie aako nungaa ti ya loko hei nya bu ji ta nya gbua tomɛi na.’

⁵ I ngi lemɔi gbablɛisia kpɛlɛɛ lolilɔ a ngilangila i yeehaalayei mɔli yɛ, ‘Gbɔɔ nya lemɔi gba le i bi ma?’

⁶ Kɛ i potenga yɛ, ‘ngulɔ pani hɔndɔɔ yila.’ Kɛ i ndenga ngi ma yɛ, ‘Bi gba-gɔlɛi wumbu, bi hei kaakaa, bi nyɛi ma bɛɛ ngulɔ pani numu fele gbɔyɔngɔ mahu puu.’

⁷ Na wooma i pekei mɔlilɔ yɛ, ‘Gbɛ jɔngɔ lɔ i bi ma?’ Kɛ i potenga yɛ, ‘Mba busɛ hɔndɔɔ yila.’ Kɛ i ndenga ngi ma yɛ, ‘Bi gba-gɔlɛi wumbu bi numu naani gbɔyɔngɔ nyɛi ma.’

⁸ Ndemɔi i bɔilopo gavangɔi ji latoilɔ ngi nɛmahulewei va; ajifa dunyei ji hubleisia ti gasongɔ wa le a ti hindeisia hugbatɛla i lewe fofoi hubleisia ma.

⁹ “Tawao ngi nde wu ma, a ndiamɔya gbatɛ wua yekpe wɛ a dunyei yeekpatɛi, aako i gbɔyɔngaa, ta loko heilɔ wu bu kunafɔ heimisia.

¹⁰ Numui na ngi lɔnyangɔ hinda wulo hu, ngi lɔnyangɔe hinda wa bɛɛ hu; numui na ii lɔnyani hinda wulo hu, ii lɔnyani hinda wa hu.

¹¹ Ina wuii lɔnyani dunya gbatei yayengelɛi hu, ye lɔ a kpatɛi yeetɔnyangɔi loko wua wu yeya?

¹² Tawao ina wuii lɔnyani hani na mahu numu weka woo le, ye lɔ a na ve wu wɛ i na wua vulii va?

¹³ “Bɔilopo yila ɛɛ yɛ a ndemɔ fele ti luwɔ; ajifa a lololɔ a yeengila i lo a yeepekei ɔɔ a vɛfɛlɔ yeengila ma i lɛɛ yeepekei hu. Wɛɛ gu wa yenge Ngewɔ wɛ kɛɛ kpatɛi.”

Yesu Layie Lɛɛnga

¹⁴ Kia Farisiisia ti ji kpɛlɛɛ mɛnini, ti ngi gbafailɔ ajifa ti longɔ yɛla wa a navoei.

¹⁵ Kɛɛ i ndeilɔ ti ma yɛ, “Wua mia wa wua yekpe wote a pɔɔnablaa nungaa yaama kɛɛ Ngewɔ i wu liisia hugɔɔlɔ. Gbamaile hani nasia nuuvu a ba gɔɔ ma wa, baa ii ma Ngewɔ yaama.

¹⁶ “Mojisi jawei kɛɛ Ngewɔ lutuisia ti gɔlɔ nyɛingɔisia ti gɛlɛni a Jɔn Nguamɔi lɔ; na wooma Ngowili Yekpei hu lɔ gɛma kɔloongɔ Ngewɔ Mahayɛi ma, tawao numui gbi lɔ lapima wuavaa na a kpaya.

¹⁷ Kɛɛ aijɛnɛ kɛɛ dunya ti gbɔyɔlaa i bɛwɛbɛwɛni i lewe sawei yeepɛpɛ bɛɛ hunyanila ma.

¹⁸ “Hindo gbi lekee a gbele ngi nyahɛi ma, i nyaha weka gɔli, i pue gbuanga; tawao hindoi na a nyahɛi na gɔli ti gbeelenga ma, i pue gbuanga.

Kpatɛmɔi Tia Lasarɔs

¹⁹ “Kpatɛmɔ yila yɛlɔ wɔɔ na a ngi mayili a kula ba gbangɔ lekee folo gbi tawao i yɛ luva komɛ waawaa lɔ gulama.

²⁰ Ti yɛlɔ a wa a fɛɛlimɔ yila, ngi la a Lasarɔs, ta ngi la yeekpatɛmɔi gatei la, ngelei gungɔ ngi luwuma gbi.

²¹ Mani a yɛlɔ wɔɔ nyanimɔi ji ma mɛhɛɛ gbukpui nasia mɛva ti yɛ a gbua kpatɛmɔi tebii ma ta gula kɛɛ ngilangɛisia vulii bɛɛ ti yɛlɔ a wa ta ngi gbalɛmɛisia yagɔmi.

²² Fɛɛlimɔi i hailɔ kɛ malikeisia ti ya a ngie Ebraham yakahu aijɛnɛ. Kpatɛmɔi bɛɛ i hailɔ kɛ ti ngi gbɔwunga.

²³ I lini jahama lɔ, i wili kpalɛ wa hu. I ngi wui wumbuilɔ kɛ i Ebraham lɔnga kuhama pɔɔ, Lasarɔs i heini ngi gblanga.

²⁴ Kɛ i tolii wienga ngeleya yɛ, ‘Kɛkɛ Ebraham! Manu nya ma bi Lasarɔs lo i ngi lokoyiwoi yeengumbɛi hitɛ njɛi hu i hitɛ nya nɛi ma ajifa nya liima vɔɔningɔ wa le ngɔmbui ji hu.’

²⁵ Kɛɛ Ebraham ndeilɔ yɛ, ‘I hitɛ bi wɛ, nya loi, kɛ watii wɔɔ ndɛvu i bi hokpala, hani yekpei gbi i yeilɔ bi ma, Lasarɔs ta hinda nyamu lekee mia i yɛ ngi male. Kiahuna na ta kohunɛ hu, bia biaa ndiimavɔɔni hu.

²⁶ I baa na ma, ndowa hubɔngɔ wa lɔ mua wueni luahu, aako nasia ta yɛ loni ti gbua mbei ti li wu gama, tɛɛ gu, tawao numu gbi ɛɛ gu a fola mu ma aa gbua mia wu na.’

²⁷ Kɛ kpatɛmɔi i ndenga yɛ, ‘Kɔnɛɛ bɛɛ le, Kɛkɛ Ebraham, Lasarɔs lo hɔɔ nya kɛkɛ wɛlei bu.

²⁸ Nya ndewehingɛisia lɔ na lɔɔlu. I li i ti lahii aako tia yelɔ bɛɛ ta wa mbei ndiimavɔɔni ji hu.’

²⁹ Ebraham ndeilɔ yɛ, ‘Bi ndewehingeisia tia Mojisi ni le kɛɛ Ngewɔ lutuisia ti wilingɔhu ti lahiiva; mahoungɔ bi ndewengɛisia ti wolo ti layie ma.’

³⁰ Kpatɛmɔi i poteilɔ yɛ, ‘Na ɛɛ gu, Kɛkɛ Ebraham! Kɛɛ numu i hiyengaa hee hu i li ti gama, ta wounvelɔ ti jumbuisia ma.’

³¹ Kɛɛ Ebraham ndeilɔ yɛ, ‘Tii woloilɔ Mojisi ma kɛɛ Ngewɔ lutuisia, tɛɛ wolo ina bɛɛ numu i hiyeilɔ hee hu.’ ”