LUKI 10 - Ngowili Yekpei Numu Kpɛlɛɛ Va

Yesu Lɔ Numu Sawa Gbɔyɔngɔ Mahu Puu Mahu Fele Loma

¹ Ji wooma Ndemɔi i loko loilɔ numu sawa gbɔyɔngɔ mahu puu mahu fele ma, i ti lo a fele-fele yɛ ti li ngi gulɔ tei gbi hu kɛɛ mia lekee gbi i wama foma na.

² I ndeilɔ ti ma yɛ, “Mba-bei huwɔlɔngɔe kɛɛ mba lewebleisia ti ya sɛkɛ. A kpalamɔi manɛnɛ aako i ngengeblaa yoyo ti ngi bei lewe, ti mbeelɛ.

³ A li! Nya wu loma kia numu a mbala leengaa wili kɔlinga lia.

⁴ Waa li a navoo ɔɔ kpafa ɔɔ kɔɔwa; waa lo fama wieva numu gbi ma pelei ma.

⁵ Wu wuangaa pɛlɛ gbi bu, a nde pɛiŋ wɛ, ‘Ndiilɛli i yɛ pɛlei ji bu.’

⁶ Ina pɛlɛmɔi i yɛni a numu lɔ ngi longɔ a ndiilɛli, kɛ wu vamɛi yeendilɛlii i yɛ ngi ma; ina na ii le, wu vamɛi yeendilɛlii i lo wu yeya.

⁷ A lo yeepɛlei na yakpe bu, wa mɛhɛɛ na mɛ kɛɛ kpɔle-hani na ta fe wu wɛ, ajifa mahoungɔ ngengemɔi i ngi pawɛi majɔɔ. Waa lewe-tewenga, wa gbua pɛlei yee ji bu wa li na bu.

⁸ Wu wuanga taa gbi hu, ti loko hei na wu bu, a na mɛ ta hei wu gɔwɔbu,

⁹ a heegbɛbla bawo yeetei na hu, wu nde yeetaablɛisia ma wɛɛ, ‘Ngewɔ Mahayɛi i lalanga wu gbla.’

¹⁰ Kɛɛ watii gbi lekee wu wuangaa taa hu, tii loko heillɔ wu bu, a gbua na wu nde wɛɛ,

¹¹ ‘Wu lɛi ji yeefufulei ji i mu gɔwɔma, mua kpukpulɛma aako i yɛ a seli wu lɛɛva. Kɛɛ i yɛ wu nɛmahu kɛ Ngewɔ Mahayɛi i lukpenga wu gbla!’

¹² Gbɛɛ ngi tɔnyɛi hugɛ a wue, kpɛmbo-volei ma kuna, Ngewɔ a manulɔ Sɔdɔmblaa ma i lewe yeetei na ma!

Tei Nasia Tii Lani A Ngewɔ

¹³ “A nyamu kpa wu va, Kolasibleisia! A nyamu kpa wua bɛɛ va Bɛtsaidablɛisia! Ajifa ina kabande yengei kpɛlɛɛ i wieni wu hu i wieilɔ Taya kɛɛ Saidɔn, wɔɔ kpɔlɔ yeenungeisia ti yɛ heilɔ vuu, ti bɛki yili ti nduvui jia, kɛva kɛ ti wounvenga ti jumbuisia ma!

¹⁴ Ngewɔ a manulɔ Taya ma kɛɛ Saidɔn kpɛmbo-volei ma kuna i lewe wu ma.

¹⁵ Kapaniɔm bia! Bi longɔ yɛla bi bia yekpe lɛ aijɛnɛ? Ba gulalɔ bi yei jahama!”

¹⁶ Yesu i ndeilɔ ngi gaalopoisia ma yɛ, “Numu gbi lekee a wolo wu ma, i wooloni nya lɔ ma; numu gbi lekee a gbele wu ma, i gbeleni nya lɔ ma; tawao numu gbi lekee a gbele nya ma, i gbeleni nya lomɔi lɔ ma.”

Numu Sawa Gbɔyɔngɔ Mahu Puu Mahu Felei Lɔ Yamama

¹⁷ Topoomabla numu sawa gbɔyɔngɔ mahu puu mahu feleisia ti yamɛilɔ a kohunɛ wa ti gona tɛɛ, “Kaamɔ, ngafa nyamuisia vulii bɛɛ ti yɛlɔ a golo mu wɛ ji mu yɛ njia gbi le ti ma bi biyei hu!”

¹⁸ Yesu i ndeilɔ ti ma yɛ, “Ngi Seitana lɔilɔ i gbua aijɛnɛ i gula kia ngelei a yɛ miamia!

¹⁹ A wolo! Ngi kpaya venga wu wɛ aako wu gu a nyimila kalingaa ma kɛɛ kekemanga kɛɛ Seitana gbayei gbi, hinda ɛɛ wu wie.

²⁰ Na hu gbi waa goohunɛɛ ajifa ngafa nyamuisia ti golongɔ wu wɛ, a goohunɛɛ ajifa wu biyeisia ti nyɛingɔ aijɛnɛ.”

Yesu Lɔ Goohunɛma

²¹ A watii yakpei na, Ngewɔ Yafei goohunɛɛi i Yesu laveilɔ kɛ i ndenga yɛ, “Kɛkɛ, aijɛnɛ kɛɛ dunya yeemahɛi, ngi siɛgbua bi ma ajifa bi hindei jisia lɔwunga nɛmahuleweblɛisia ma kɛɛ kaableisia bi hugɛnga a ndolangaa. Tɔnya le, Kɛkɛ, hii i nɛni bi wɛ pieva.

²² “Nya Kɛkɛ i hani gbi venga nya wɛ. Numu gbi ii Hindoloi gɔɔ kɛlee Kɛkɛi tawao numu gbi ii Kɛkɛi gɔɔ kɛlee Hindoloi kɛɛ nasia a nɛɛ Hindoloi wɛ ngi hinda hugɛva a tie.”

²³ Kia Yesu tia ngi gaalopoisia ti ma i geleni, i woteilɔ ti gama i nde ti ma yɛ, “Wu hɛjangɔ wa le hindei nasia hulɔvaa wu hulɔma.

²⁴ Ngi hugɛ a wue, Ngewɔ lutui gboto kɛɛ maha waawaa gboto ti longɔ yɛla ti na hulɔ wu hulɔma kɛɛ tii guni tawao ti longɔ yɛla ti na mɛni wu humɛnima kɛɛ tii mɛnini.”

Dɔmii Kɔlooni Sameliamɔ Yekpei Ma

²⁵ Sawei Yeekaamɔ yila i wɛilɔ Yesu gama ngi longɔ i ngi hou kpulanga yɛpɛ leva. I Yesu mɔlilɔ yɛ, “Kaamɔ, gbɔɔ mahoungɔ ngi pie aako ngi kunafɔ lɛɛvui majɔɔ?”

²⁶ Yesu i kpɛmboilɔ yɛ, “Gbɔɔ Ngewɔ Gɔlɛi i ndeni? Yeembui a gbɔɔ bia bi wɛ?”

²⁷ Taamɔi i kpɛmboilɔ yɛ, “Lo a Ndemɔi bi Yewɔɛi a bi lii gbi kɛɛ bi yafei gbi kɛɛ bi gahui gbi kɛɛ bi nɛmahui gbi, bi lo a bi heinyɔui kia bi longɔ a bia yekpe.”

²⁸ Yesu i poteilɔ yɛ, “Bi gbɛmboi wɔnangɔe, bi ji wienga ba kunafɔ lɛɛvui majɔlɔ.”

²⁹ Kɛɛ Sawei Yeekaamɔi longɔ yɛla i kɛ kɛ pɔɔnamɔ lɔ a ngie, faale i Yesu mɔlilɔ yɛ, “Ye lɔ nya heinyɔui le?”

³⁰ Yesu kpɛmboilɔ yɛ, “Taamɔ yila i gbuɛilɔ wɔɔ Jelusalɛm a li Jɛliko, kɛ humablaa ti gbundɛnga ngi ma, ti ngi magbua, ti ngi lewe-ndewe, ti ngi lo a lɛɛvu a ngilangila.

³¹ I wieilɔ na kɛ Saa Gbuamɔ yila i ya a yeepelei na; kɛɛ kia i taamɔi lɔni, i ngi magbukpuilɔ i li ngiɛ.

³² Hii Livaimɔ yila bɛɛ i pieni ji i foni na. I liilɔ i taamɔi gbe, i ngi magbukpuu, i li ngiɛ.

³³ Kɛɛ Sameliamɔ yila, ji i yɛ jiama a pelei na, i gomɛilɔ taamɔi ji ma, tawao kia i ngi lɔni, ngi mamamau i ngi lɔilɔ hulewengɔ.

³⁴ Kɛ i ya ngi gama, i haleisia wu ngi gbalɛmɛisia, i na yilingili, i ngi lɛ ngi joi mahu, i li a ngie hota-wɛlei bu, a ngi mahugbe na.

³⁵ Kia ngele i woni, i kani gbaa gɔpɔ fele gbuɛilɔ i fe hotakɛi wɛ yɛ, ‘Taamɔi ji mahugbe; kpemɛi nga yama a mbei wee, na gbi ba majia ngi va ji wooma, nga ngama lɔ bi ma.’ ”

³⁶ Yesu i ngi yɛpɛi yakpuɛilɔ yɛ, “Bi nɛmahu numu sawei jisia yeegbɔɔ taamɔi na humabla ti gbundɛni ngi ma ngi heinyɔu le?”

³⁷ Sawei Yeekaamɔi i kpɛmboilɔ ye; “Yeena i ngi mamamau lɔni.” Kɛ Yesu I ndenga ngi ma yɛ, “Li bi nyɔkɔ wie.”

Yesu Lɔ Fama Laloma Mata Gɔɔma Tia Meri

³⁸ Kia Yesu tia ngi gaalopoisia ti yɛli ma, i wuailɔ fuula yila hu kɛ nyapo yila ngi la a Mata, i ya a ngie ngi yeepɛlɛbu.

³⁹ Mata ndewenyahaloi i yɛlɔ na ngi la a Meri. Meri i liilɔ i hei Ndemɔi gɔwɔbu a wolo kaai na ma i yɛ kɛ.

⁴⁰ Kɛɛ Mata lii gbuangɔ yɛla ngi goohu ngengei gbotoyii va i yɛ ngi ma pieva, faale i wɛilɔ i nde yɛ, “Ndemɔi, ii gbeweni bi ma ji nya ndewei i gbenga ngengei kpɛlɛɛ ma nya yakpe yeya? Nde ngi ma i wa i gbɔ nya ma!”

⁴¹ Ndemɔi i poteilɔ i nde ngi ma yɛ, “Mata, Mata! Bi lii gbuangɔe bi goohu hani gboto va,

⁴² kɛɛ hani yakpe lɔ mahoungɔ bi gbewe fa. Meri i yeehani lɔ wumbunga tawao ɛɛ gbua ngi yeya.”