JEMISI 3 - Ngowili Yekpei Numu Kpɛlɛɛ Va

Gula Numu Bi Nɛi Ma

¹ Nya mbaa Kristimableisia, wua wu longɔ wu yɛ a Ngewɔ hindei yeekaamɔngaa, waa gboto, ajifa wu kɔɔlɔ kɛ Ngewɔ a mua mu kaamɔisia gbɛmbo a ndiimabe lɔ i lewe nungaa wekeisia ma.

² Mu gbi ma kpulanga gboto wielɔ. Kɛɛ numui na ɛɛ kpulanga wie wɔɔ gba njɛpɛi nasia hu a nde, kɛ nyamu gbi ii ngi hu tawao kɛ a gulɔ a tayekpe huhoula.

³ Ma kɔlii wuaalɔ soi baahu aako i golo mu wɛ, mu gu mu pie i li mia mu longɔ a na.

⁴ Ɔɔ a gili a njaya-lɛndɛi: kia bɛɛ ngɔlɔngɔ waa tawao kɛ fɛfɛ gbayangɔ waa lɔ a gu i jia a ngie hani wulo lɔ a ngi lo pele ma, a pie i li mia gbi ngi njiamɔi longɔ i li na.

⁵ Hii lɔɔ numu nɛi i na: kia bɛɛ kulongɔ, a lawolɔ yɛ a gulɔ a hinda waawanga wiela. A gili lɛɛ kia ngɔmbuvo wulohii a gu a ngola lakpa waa mɔla.

⁶ Numu nɛi wiengɔe kia ngɔmbui i na. Piengɔe gbɔma kia dunyei na hinda nyamu wiela lekee i na, i heini ngi nda yɛmɛi mu luwui hu, a pie mu gbuhɛi gbi i nyamu. A ngɔmbu yatɛlɔ mu lɛɛvui hu hindei kpɛlɛɛ ma, ngɔmbui na a wa ngi gama a gbua jahama vulii.

⁷ Nuuvu a gulɔ tawao i gunga a fuuhani wekeisia gbi makɛla, ndɔgbɔ-huangaa kɛɛ ŋɔningɛisia kɛɛ ndala-hanisia kɛɛ nyɛngɛisa.

⁸ Kɛɛ numu gbi ii yaa wɔɔ gba guni a nɛi makɛla. Hani nyamu lɔ a ngie, numu gbi ɛɛ gu a ngi makɛla, a gu a numu waala kia kaali nyamunyamu.

⁹ Mu nɛi lɔ ma siɛgbua la mu Lemɔi kɛɛ mu Kɛkɛ ma, ma gbɔma mu mbaa nuuvuisia jondu la, na Ngewɔ i kpatɛni gbuava a ngie.

¹⁰ Nda yakpei lɔ njia yekpei a gbua hu kɛɛ njia nyamu. Nya mbaa Kristimableisia, maa ii houni ji i wie.

¹¹ Nja nɛnɛɛ kɛɛ nja ŋɔnaŋɔna tɛɛ gbua ndowa yakpei hu.

¹² Nya mbaa Kristimableisia, figi wulii ɛɛ gu aa wua a ɔlivi; glepii ɛɛ gu aa wua a figi, tawao nja nɛnɛɛ ɛɛ gu a gbuala njalowɛi na hu a kpolo-yɛi ve.

Nɛmahulewei Yeetɔnyangɔi

¹³ Numu lɔ wu lia ngi nɛmahu lewengɔ tawao i hinda hugɔɔngɔ? Mahoungɔ i ji magɛ a tuva yekpei na a pie kɛɛ hinda yekpei nasia a pie a nɛmahulewe tawao ngi yaama ɛɛ lɛ.

¹⁴ Kɛɛ ina toloi lɔ wu liisia hu kɛɛ ndiimanyamu tawao wu longɔ a kpekpeyei gbi wua yekpe lekee va, wuaa lawola tawao wa ndɛɛ gula tɔnyɛi ma.

¹⁵ Nɛmahulewei na bonda ii gbuama Ngewɔ gama, dunyei ji woo mia, Ngewɔ Yafei ndɛi ii le, ngafa nyamuisia ti nde mia.

¹⁶ Gbamaile mia nungaa ti yɛngaa na wu lia ti lolongɔ tawao ta tia yekpe lekee ti gbekpeyɛi gɔli, ngo-ya-vayei a yɛlɔ na kɛɛ hinda nyamui yeelasii gbi.

¹⁷ Kɛɛ nungei nasia Ngewɔ a nɛmahulewei na ve ti wɛ a gbua ngi gama, nyamu ii ti hu, ta nungaa luahu gbatɛlɔ, tɛɛ jɔlɛ, ti longɔ a ndiamɔya; ta manu nungaa ma tawao hinda yekpei yeelasii gbi wiela i ti gɔɔngɔ; tɛɛ topooma wie tawao tɛɛ baaya hinda wie.

¹⁸ Tawao tuhani gaalɛi na nduahugbatɛbleisia ta hii wava a ndiilɛli, a wa kpekpeya lɔ.