HIBUBLƐISIA 8 - Ngowili Yekpei Numu Kpɛlɛɛ Va

Mu Jaagbuamɔ Wai Yesu

¹ Njɛpɛi kpɛlɛɛ mu ndema yeengui lɔ a ji: Saagbuablɛisia ti gulɔmɔ waa bondɛi na lɔ mu yeya, na i heini Ngewɔ maha-heimɛi yeengejahui mia ngelegoohu.

² Saagbuamɔ waa lɔ a ngie a yenge Ngewɔ wɛ yeehindei na saagbuamɔi a saa gbua na Ngewɔ ma, tamia kula-wɛlei yeekpekpei na le Ndemɔi Ngewɔ i toni, nuuvu ii le aa to.

³ Ngewɔ lɔ a Saagbuablɛisia ti gulɔmɔ wai gbi gɛ wava a saahaniisia kɛɛ saa-lohaniisia Ngewɔ gama, faale mahoungɔ yɛla hani i yɛ mu Jaagbuamɔ Wai Yesu yeya feva Ngewɔ wɛ.

⁴ Ina taa dunyei hu, ii yɛ yɛ a Saagbuamɔ kulo bɛɛ, ajifa Saagbuablaa lɔ na ta li a saahani nasia Ngewɔ gaama kia Juubleisia ti Jawei i kɛni.

⁵ Saagbuamɔ yengei na ta pie i yɛni lekee a na lɔ i wiema ngelegoohu yeekpuayei ɔɔ yeenɛnɛ. Hii wɔɔ i Mojisi wieni. Ji i ngi magbatɛni kula-wɛlei na lova Ngewɔ Hinda Yangilingɔi a yɛ mbu, Ngewɔ ndeilɔ ngi ma yɛ, “Tɔ vulii bi yeekula-wɛlei gbatɛ kia na i yɛ na ngi kɛni a bie ngiyei wumba.”

⁶ Kɛɛ kiahuna na, Ngewɔ i saagbuamɔ yengei venga Yesu wɛ tewengɔ ti ndɛi ma, kia lɔ hindei na i ngangilini taa ngi nungeisia kpekpengɔ yeengovei ma, ajifa i gbuani Lahei nasia hu lɔɔ i mbumbuni yɛ nungaa ta kpekpeyangaa majɔɔlɔ tewengɔ yeengovei ma.

⁷ Ina hinda yangilingɔi yeehaalayei i guilɔ a ngi yengei wiela, hinda yangilingɔ yeefelei yeemani ii yɛ yɛ na.

⁸ Kɛɛ Ngewɔ i hinda lɔilɔ kpulangɔnga yeehaalayei hu ji i ndeni yɛ, “Watii lɔ hitima, Ndemɔi yɛ, ji nga hinda nina yangilingɔi hugbatɛ a Isrɛlbleisia kɛɛ na Judableisia.

⁹ Ɛɛ wie kia hinda yangilingɔi na ngi hugbatɛni a ti maadani folei na ma ngi houni ti lokoi ma ngi ti gbua Ijipt lɔlei hu. Tii na wieni hinda yangilingɔi yɛ ta pie, famia ngii woloni kulo bɛ ti ma, himia Ndemɔi ndeni.

¹⁰ Kiahuna, ji mia hinda yangilingɔi le nga hugbatɛ a Isrɛlbleisia Watii na ma wama, himia Ndemɔi ndeni: Nga nya Jaweisia wulɔ kpaŋ ti nɛmahu, tawao nga nyɛilɔ ti liisia hu. Nga yɛlɔ a ti Yewɔi, tawao ta yɛlɔ a nya nungeisia.

¹¹ Ɛɛ yɛ a kpaa gbi numu ma. ngi mba taali gaava, ɔɔ ndeva ngi mba kɛnyɛmɔi ma, yɛ ‘Ndemɔi gɔɔ!’ Ajifa ti kpɛlɛɛ ta nya gɔɔlɔ, i hiye yeekuloi ma i too yeembawai ma.

¹² Nga manulɔ ti jumbuisia ma, tawao ngɛɛ yaa gbɔma gili a ti wiehinda nyamuisia.”

¹³ Ji Ngewɔ i yɛpɛni kɔlooni hinda yangilingɔ nina ma, i pienga yeehaalayei i wovanga; tawao hani gbi lekee i wovanga, i hawa, a lolɔhu hugutungɔ.