HIBUBLƐISIA 7 - Ngowili Yekpei Numu Kpɛlɛɛ Va

Saagbuamɔi Mɛlkijidɛki

¹ Taa wai na ti yɛ toli a Selɛm yeemahɛi mia wɔɔ a Mɛlkijidɛki ji tawao Ngewɔ Lɛngɔ wai Jaagbuamɔ lɔ wɔɔ a ngie. Kia Ebraham i yɛ yamama a gbua kɔi na hu i maha naanisia vayani hu, Mɛlkijidɛki i liilɔ ngi gulɔ i ngi luba,

² kɛ Ebraham i hani na kpɛlɛɛ i sɔɔni kɔi hu gɔlɛnga na puu i kaka yila ve ngi wɛ. (Mɛlkijidɛki biyɛi ji yeembui yeehaalayei mia a “Pɔɔna Mahɛi;” Tawao jifa Selɛm yeemahɛi a ngie, ngi biyɛi yeembui mia gbɔma a “Ndiilɛli Mahɛi.”)

³ Kɔlɔ nyɛingɔ gbi ii na aa Mɛlkijidɛki ngi kɛkɛ ɔɔ ngi nje ɔɔ ngi maadani yeengila bɛɛ hinda hugɛ; ngi leyii kɛɛ ngi haayii yeekɔlɔ nyɛingɔ ii na. Ngi wiengɔe kia Ngewɔ Hindoloi na; a lo kunafɔ Saagbuamɔyɛi hu lɔ.

⁴ Wu ngi wɔlɔyii lɔnga na. Hani gbi mu maada lɔwɔngɔ wai Ebraham taa ngi mablɛisia ti sɔɔni kɔi hu, i kɔlɛilɔ na puu i kaka yila ve ngi wɛ.

⁵ Tawao i Sawei lailɔ Livai leengei nasia yeya ti yɛni a saagbuablaa yɛ hani gbi Isrɛlbleisia ta sɔɔ, ti yɛ a kɔlɛ na puu, tia ti Saagbuablɛisia ti kaka ngilangila wɔyɔ ti yeya, ti gbɔugbɔu bondɛisia, kia bɛɛ Ebraham bɔɔsɔngaa a yeembondɛi nasia.

⁶ Mɛlkijidɛki ii gbuani Livai hu, kɛɛ i Ebraham jɔɔhani gɔlɛma puu, yeekaka yila houilɔ i Ebraham luba, Ebraham na Ngewɔ lubɛi i yɛ ngi wooma.

⁷ I laailɔ ke kɛ numui na a numu luba i leweni numui na ma ta ngi luba.

⁸ Saagbuablei nasia tia ti gbuani Livai hu, nasia ta hani gɔlɛma pui yeekaka yilei wɔyɔ nungaa yeya, ti yɛni a nungaa lɔ ta haa huɛɛŋ; kɛɛ Mɛlkijidɛki ndɛi hu ta, i hani gɔlɛma pui yeekaka yilei houilɔ tawao ngi vulungɔe tuuŋ kia Ngewɔ Gɔlɛi ndeni la.

⁹ Faale numu a gulɔ a ndela yɛ ji Ebraham i hani gɔlɛima pui veni, Livai (na ngi bɔɔsɔɛisia ta hani gɔlɛma puu yeekaka ngilangilɛisia wɔyɔ) ta bɛɛ i feilɔ.

¹⁰ Ajifa Livai lengɔ ii yɛla lɛ, kɛɛ numu a gulɔ i nde yɛ, i yɛ ngi maada Ebraham goohu lɔ ji Mɛlkijidɛki taa Ebraham ti lɔni.

¹¹ Sawei na Ngewɔ i feni Isrɛlbleisia wɛ ngoto i yɛ heini livai bɔɔsɔɛisia lɔ gɔwɔma ti yɛni a saagbuablaa. Ina saagbuablei nasia ti gbuani livai hu ti yengeilɔ kia Ngewɔ longɔ yɛla la, saagbuamɔ laasi weka gbuala nga yeekpewe ɛɛ yɛ na, numui na i Mɛlkijidɛki jaagbuayii wooma, Eerɔn ndɛi ii le.

¹² Tawao Saagbuablaa woveisia ti gbuangaa na yeeninangaa ti lewe na, saweisia bɛɛ ti maa a luvelɔ huɛɛŋ.

¹³ Ajifa mu Lemɔi na ti njɛpɛi jisia leni ngi va, i yɛni a kɛnyɛmɔ weka lɔ, tawao ngi gɛnyɛmɔ yakpe bɛɛ ii saagbua yenge wieni.

¹⁴ Numui gbi ti kɔɔlɔ pandawanda kɛ ti mu Lemɔi leni Juda gɛnyɛi hulɔ; tawao Mojisi ii laalini yeekɛnyɛi ji hinda ma ji i yɛ yɛpɛma kɔloongɔ Saagbuablɛisia ma.

Saagbuamɔ Wekei kia Mɛlkijidɛki I Na

¹⁵ Na haa ngi yɛpɛma kɔlooni ma wa gulɔ na a mbugɔɔla gbalauŋ; Saagbuamɔ laasi weka i gbuanga nga, ngi wiengɔ kia Mɛlkijidɛki i na.

¹⁶ Nuuvu Jawa langɔngaa ii le taa ngi yɛ a Saagbuamɔ; ndɛvui na ɛɛ gɛlɛ, ngi gbayei hu lɔ Ngewɔ i ngi yɛni a Saagbuamɔ.

¹⁷ Gbamaile Ngewɔ Gɔlɛi yɛ, “Ba yɛlɔ a Saagbuamɔ kunafɔ va kia Mɛlkijidɛki i yɛ na.”

¹⁸ Faale sawa wovei i haanga na ajifa ii guni a yengela tawao kpekpeya gbi ii hu.

¹⁹ Gbamaile Sawei na Ngewɔ feni Mojisi wɛ kɛva a nungaa ii guni a piela hani gbi aa gbekpe kia mahoungɔ yɛla i gbekpe. Kɛɛ kiahuna na mu lii lɔ hani na ma kpekpengɔ tewengɔ na ma mu lii i yɛ wɔɔ ma, tawao a pielɔ mu lukpe Ngewɔ gbla.

²⁰ I baa na ma, Lahei na bɛɛ lɔ na Ngewɔ i mbumbuni. Ngewɔ ii Lahei na nyikɔ wumbuni watii na nungaa wekeisia ti woteni a saagbuablaa.

²¹ Kɛɛ ji Yesu i woteni a saagbuamɔ Ngewɔ i Lahei wumbuilɔ yɛ ngi ma, “Ndemɔi i Lahei kpaukpau wumbunga tawao ɛɛ yaa ngayama, yɛ, ‘Ba yɛlɔ a Saagbuamɔ kunafɔ va.’ ”

²² Jifa Ngewɔ i Lahei kpaukpau wumbuni watii na i Yesu woteni a Saagbuamɔ, ta lɔ i Yesu yɛni gbɔma a taanimɔ kɛ hinda yangilingɔ ninɛi i gbekpeni yeengovei ma.

²³ Nduahugɛ weka lɔ na: saagbuablaa wekei nasia ti gbotongɔ yɛla ajifa ti yɛlɔ a haa ti loko a gbenda ti yengei ma.

²⁴ Kɛɛ Yesu vulungɔe kunafɔ va tawao ngi jaagbua yengei ɛɛ lewe numu weka gama.

²⁵ Famia kiahuna, kɛɛ kpele gbi ngi gungɔ a nungei nasia bawola ta wa Ngewɔ gama a ngi sabui hu we, ajifa ngi vulungɔe kunafɔ va ti manɛnɛ wuava Ngewɔ gama.

²⁶ Faale Yesu lɔ Saagbuablɛisia ti gulɔmɔ wai na le, a na gbi wie mu wɛ ma gbewe fa. Ngi gayemangɔ waa le; nyamu ii ngi hu tawao jumbu ii ngi ma; Ngewɔ i ngi gbuanga jumbubleisia ma i ngi lɛnga ngelegoohu.

²⁷ Ii wieni kia Saagbuabla wekeisia ti na; saa gbuala ii ngi ma folo gbi, ta yese ngi nda jumbuisia va kɛɛ na nungeisia ti ndɛisia. I saa yakpe lɔ gbuani heima yakpe kunafɔ va, ji i ta yekpe veni Ngewɔ wɛ a saahanii.

²⁸ Nungaa ti woteilɔ a saagbuablaa kia bɛɛ tii yɛ a na wie mahoungɔ yɛla ti pie, kɛɛ Lahei kpaukpau na Ngewɔ i mbumbuni Sawei na wooma i feni Mojisi wɛ ta lɔ a pie Ngewɔ Hindoloi na a gu kunafɔ a hinda gbi wiela mahoungɔ i pie.