HIBUBLƐISIA 4 - Ngowili Yekpei Numu Kpɛlɛɛ Va

¹ Kiahuna, Ngewɔ i Lahei wumbunga mu gama yɛ ma ndɛvumɛi na majɔɔlɔ i yeenjɛpɛ leni, a mu gbi mu mu mahugbe hɔɔ aako Ngewɔ aa tɔ wu yilayee bɛɛ aa gbaha a yeendɛvumɛi na majɔɔla i Lahei wumbuni fa.

² Gbamaile mu Ngowili Yekpei mɛninga, kia lɔɔ ti mɛniila. Ti ngoowili mɛniilɔ kɛɛ ii kpekpe gbi wieni a tie, ajifa ji ti mɛnini, tii lani la.

³ Mua mu langɔ la hɔɔ, ma ndɛvumɛi na majɔɔlɔ Ngewɔ i Lahei wumbuni fa. Kia lɔɔ i yɛ ndeni yɛ, “Ngi liileweilɔ, ngi Lahei wumbu ngɛɛ, ‘Kunafɔ tɛɛ wuaa ndɔlei na hu ngaa pie ti hei na ti lɛɛvu!’ ” Ngewɔ i ji leilɔ kia bɛɛ na gbi i yɛ wama piema hugbatɛngɔ yɛla i hiye dunyei gbatɛ-gbelei ma.

⁴ Gbamaile ji lɔ ndengɔ Ngewɔ Gɔlɛi yeehinda yila kɔlooni lɔwɔi yeewɔflei ma yɛ, “Ngewɔ i lɛɛvuilɔ ngi yengei kpɛlɛɛ ma lɔwɔi yeewɔflei ma.”

⁵ Ngewɔ i yeenjɛpɛ yakpei ji leilɔ gbɔma, “Kunafɔ tɛɛ wuaa ndɔlei na hu ngaa pie ti hei na ti lɛɛvu.”

⁶ Nasia ti humbuni a Ngowili Yekpei mɛni tii ndɛvuma majɔɔni, ajifa tii lani la. Kɛɛ nungaa wekangaa lɔ na Ngewɔ lumanga ti wɛ ndɛɛvumɛi majɔɔva.

⁷ Ji a kɛlɔ kɛ Ngewɔ i folo weka gɛnga ta toli a “Haa.” Foo gboto na wooma i yeenjɛpɛi wuilɔ Devidi laa Ngewɔ Gɔlɛi na hu ti welanga a ndagɛla yɛ, “Wu Ngewɔ woi mɛningaa haa, waa ngoohugbɔnda wie.”

⁸ Ina Jɔsua i ndɛvumɛi na veilɔ nungeisia wɛ Ngewɔ i Lahei wumbuni fa, Ngewɔ ii yɛ yɛpɛ pooma kɔloongɔ folo weka ma.

⁹ Faale na hu gbi, Ngewɔ nungeisia ta gulɔ lɛ a lɛɛvula kia Ngewɔ i lɛɛvuni lɔwɔi yeewɔflei ma.

¹⁰ Ajifa numu gbi lekee i wuani taa Ngewɔ ti lɛɛvu, a lɛɛvulɔ ngi nda yengei ma kia Ngewɔ i lɛɛvuni ngi ndɛi ma.

¹¹ A mu mu sɔbɛ gbi wie hɔɔ ndɛvumɛi na majɔɔva aako mu yilayee bɛɛ aa ganga kia ti pieni jifa tii liiloni.

¹² Gbamaile Ngewɔ laayiɛi vulungɔe keya tawao a yengelɔ, houngɔ tewengɔ kɔbowa yaama fele gbi ma. A numu ŋɔnalɔ i foo fa mia ndɛvui taa ngafei ta gomɛ na i ti luahu gɔlɛ, mia numu gbulɔngɛi taa yeengulɔi ta hukpɔ na, i tia bɛɛ luahu gɔlɛ. A kiti lewelɔ nuuvu liima hindeisia ma kɛɛ kilii nasia ta yɛ ngi lii hu.

¹³ Hinda gbi ii na nuuvu aa gu a ndɔwula Ngewɔ ma; hani kpɛlɛɛ i kpatɛni ti magɛngɔe, ngi yaamɛi a ti lɔ.

Yesu Mu Jaagbuamɔ Wai

¹⁴ Famia, a mu hou kpaŋ lanayei ji ma mu tooma pooma. Gbamaile Saagbuablɛisia ti gulɔmɔ wai lɔ mu yeya na i ya i fonga fa Ngewɔ ma, tamia a Yesu, Ngewɔ Hindoloi.

¹⁵ Mu jaagbuablɛisia ti gulɔmɔ wai ii yɛni a numui na ɛɛ gu a manuma wiela hindei nasia va ma gbaha a piela Ngewɔ yaama; ajifa Seitana i yɛlɔ a ngi gɔlɛ a pelei kpɛlɛɛ kia a mu gɔɔlɛ la kɛɛ ii jumbu hinda yakpe bɛɛ wieni.

¹⁶ Faale a mu li Ngewɔ maha heimɛi a ndiilo, mia ngauwanda a jɔɔ na. Na lɔ ma manuma majɔɔ na kɛɛ ngauwandei na a gbɔ mu ma a watii kinɛiŋ ma gbewe fa.