HIBUBLƐISIA 13 - Ngowili Yekpei Numu Kpɛlɛɛ Va

Na Ma Pie Mu Hinda I Nɛɛ Ngewɔ Wɛ

¹ A yɛ tuuŋ a lo a wu nyɔunyɔu kia mahoungɔ Kristi lehubleisia ti pie.

² Waa lema a hotangɛisia gulula wu wɛleisia bu. Nunga lɛɛnga ti loilɔ wɔɔ ji wiema ti gbekpe a malikangaa tii kɔɔ kɛ malikangaa mia.

³ Nasia ti kpindi wɛlei bu ti hinda i yɛ tuuŋ wu nɛmahu bi tɔa bɛɛ wua tieni mia wu na. A gbewe tuuŋ nasia va kpalɛ i ti ma bi tɔa bɛɛ yeekpalɛi i wua tieni lɔ ma.

⁴ Mahoungɔ numui gbi ti baa gɔɔ nyaha-jɔɔ taa hini-jɔɔ ma, tawao maa ii houni nyahamɔ ɔɔ hinimɔ gbi taa numu weka ti la. Ngewɔ a nasia gbɛmbolɔ ta manɔhɔ kɛɛ puegbua hindeisia wie.

⁵ Navoo-mani aa yɛ wu hu kulo bɛɛ, tawao wu lii i lɛli a na i wu yeya. Gbamaile Ngewɔ i ndenga yɛ, “Ngɛɛ gbe bi ma tawao ngɛɛ gbua bi woohu.”

⁶ Faale, a mu nde a ndiilo muɛɛ, “Ndemɔi lɔ a gbɔ nya ma, ngɛɛ luwa. Gbɔɔ numu gbi a gu i pie a nge?”

⁷ A gili a wu mahublɛisia wɔɔ, nasia ti Ngewɔ wowili hugɛni a wue. A gili lɛɛ a ti luvayii wɔɔ kɛɛ ti haayii, wu ti wokɔɔ a ti layii hu a Ngewɔ.

⁸ Yesu Kristi ɛɛ wotewote, kia i yɛ na wɔɔ, hii i na kiahuna tawao hii a yɛ na kunafɔ.

⁹ Waa luma kaa gɛwɛgɛwɛ laasii kpɛlɛɛ taa wu yaka wu gbua tɔnya welei ma; nyandengɔ waa le ji Ngewɔ a mu liisia gbaya a ngi yauwandei hu we, i lewe sawangaa houla ma kɔloongɔ mɛhɛɛngaa ma; yeesawei jisia tii yɛ gbɔni nasia ma ta ti hou.

¹⁰ Saagbuablei nasia ta saa gbua Juubleisia ti hɛɛmɛi, ii wɔnani ti va saahanii na mɛva ma kpua a saa mu nda jaa gbuamɛi.

¹¹ Juu Jaagbuablɛisia ti gulɔmɔ wai a walɔ a huangaa ti ŋamɛi Lomu Magayemangɔ Wai na bu Ngewɔ a yɛ na kpuava a saa nungaa ti jumbuisia va; kɛɛ ta gbualɔ a yeehuangɛsia ti woomɛi tei hu ti mɔ.

¹² Na vamia Yesu bɛɛ i gbuani taa wai hu i haa aako i jumbuisia wua nungeisia ma a ta vulii ngi ŋamɛi.

¹³ Faale, a mu li ngi gama tei wooma ngufei na i lɛni ngi ma i lɛ mua tieni ma.

¹⁴ Gbamaile taa gbi ii na mu va mbei dunyei ji hu a yɛ na kunafɔ; mu taa wai na lɔ gulɔgbema i wama wama kulɔmɛi.

¹⁵ Faale a mu yɛ a Ngewɔ lato kpele gbi, yeetatoi i yɛ a mu jaahani Yesu sabui hu, tawao yeetatoi ji lɔ saahanii le ndaguli nasia ta nde tɛɛ Yesu lɔ Ndemɔi le.

¹⁶ Waa lema a kpekpe kɛɛ kpɔma wiela wu nyɔunyɔu ma, ajifa saa jisia lɔ a nɛɛ Ngewɔ wɛ.

¹⁷ A golo wu gulɔbleisia wɛ, wu yɛ a na wie ta nde wu ma pieva. Tia mia ta wu yafeisia mahugbe ndɛvu ii ti ma, jifa i ti ma a kpa lɔ gonava Ngewɔ ma a ngengei na ti pienga. Wu golongaa ti wɛ, ta ti yengei wielɔ a kohunɛɛ; wuii goloilɔ ti wɛ, ta ti yengei wie a ndiinyani lɔ, tawao na ɛɛ wu nafa.

¹⁸ A yɛ a Ngewɔ vɛli mu va tuuŋ. Mu kɔɔlɔ vulii pandawanda kɛ mu hinda nyamu wova gbi ii na aa yɛ wu lii mɔnɛma, ajifa ma hindei yeepɔnɛi lɔ wie watii gbi.

¹⁹ Nyaa wu manɛnɛma vulii a kɔnɛkɔnɛ wu Ngewɔ vɛli kɔɔ i nya yama gbɔma wu gama hugutungɔ.

Kɔlɛi Ji Laagbɔwu-Hɛi

^20-21 Ngewɔ i pienga mu Lemɔi Yesu na mbalangɛisia ti Mahugbemɔ Wai a ngie i vulunga i hiyenga hee hu ajifa i ta yekpe gbuani a saa i haa, yeehɛi na i kalɛ wuaa kunafɔ hinda yangilingɔi hu. Ngewɔ na a ndiilɛli ve mu wɛ i hani yekpe gbi ve wu wɛ wu gbewengɔ fa aako wu ngi liima hindei wie, tawao Yesu Kristi sabui hu, i ngi liima hindei wie mu hu. Tato i yɛ Yesu Kristi ma kunafɔ kɛɛ kunafɔ va! Amiina.

Kɛlɛma Yɛpɛisia

²² Nya mbaa Kristimableisia, nyaa wu manɛnɛma kɔɔ wu ndahii ji mɛni vulii a ndii yekpe; gbamaile kɔlɛi ji ngi nyɛinga wu gama hu ii guhani wa.

²³ Nya longɔ wu kɔɔ kɛ ti mu ndewei Timoti gbuanga kpindiwɛlei bu. I humbungaa a wa mbei, mua ta lɔ ma wa wu gama.

²⁴ Ma va wu lokulɔisia gbi ma kɛɛ Ngewɔbleisia kpɛlɛɛ. Mu mbaa Kristimablei nasia Italiblaa a tie tiaa vama wu ma kaka.

²⁵ Ngewɔ i ngauwanda gɛ a wu kpɛlɛɛ.