GALESIABLƐISIA 3 - Ngowili Yekpei Numu Kpɛlɛɛ Va

Sawei Houla Ɔɔ Lala A Kristi

¹ Wu Kristimablaa gbowangɔi nasia wu Galesia! Ye lɔ i wu gbɛgbɛlinga? Hee na Yesu Kristi pieni krɔsii ma, ngi nduawoilɔ gbalauŋ wu gama!

² A mɔli yilei ji gbɛmbo lɛ nya wɛ: wu Ngewɔ Yafei majɔɛilɔ jifa wu na wieni Sawei longɔ la ɔɔ jifa wu Ngowili Yekpei humɛnini kɛ wu laala?

³ Wa yee gu wu gbowa hii! Ngewɔ Yafei lɔ i pieni wu ndɛvu nina lɔto; wu longɔe na wu ngakpua a wu wuma gbaya?

⁴ Na kpɛlɛɛ i wu wienga ii yɛni a gbɛogbɛ wu gama? A tɔnya na i yɛni vulii a hinda lɔ.

⁵ Ngewɔ a ngi Yafei velɔ wu wɛ, i kaabande hindangaa wie wu lia jifa wa na wie Sawei longɔ la ɔɔ jifa wa Ngowili Yekpei humɛni wu la la?

⁶ A gili a na i Ebraham wieni; kia Ngewɔ Gɔlɛi ndeni la yɛ, “I lailɔ a Ngewɔ tawao ngi lava a Ngewɔ, Ngewɔ i ngi wumbuilɔ a pɔɔnamɔ.”

⁷ Mahoungɔe hɔɔ wu kɔɔ kɛ Ebraham bɔɔsɔɛisia yeetɔnyangɔisia a nungei nasia lɔ ti langɔ a Ngewɔ.

⁸ Ngewɔ Gɔlɛi i kulɔmayia leilɔ yɛ Ngewɔ a taa nasia Juublaa yaa tie luahu gbatɛlɔ ji ta la a ngie. Faale Ngewɔ Gɔlɛi i Ngowili Yekpei hinda hugɛilɔ a Ebraham ji i ndeni yɛ, “Ngewɔ a pielɔ luba i yɛ nuuvu kpɛlɛɛ ma bi sabui hu.”

⁹ Ebraham i lailɔ a Ngewɔ tawao i luba majɔɛilɔ; faale nasia kpɛlɛɛ ta la a Ngewɔ ta luba majɔɔlɔ kia i ngi wieni.

¹⁰ Nasia ta gili tɛɛ Ngewɔ a ti gululɔ jifa ta Sawei hou, Ngewɔ jondii lɔ ti ma. Ajifa Ngewɔ Gɔlɛi yɛ, “Numu na gbi ii loni na kpɛlɛɛ wiela ma tɔnyangɔ Sawa Gɔlɛi hu, Ngewɔ jondii lɔ ngi ma!”

¹¹ I langa na ke kɛ Ngewɔ ɛɛ tia numu gbi luahu gbatɛ jifa a na wie Sawei longɔ la, ajifa Ngewɔ Gɔlɛi yɛ, “Numui na lekee Ngewɔ a tia ta luahu gbatɛ jifa ngi langɔ a Ngewɔ, tamia a ndɛvui majɔɔ.”

¹² Kɛɛ Sawei houla kɛɛ lola a Ngewɔ ti gba polouŋ ti nyɔunyɔ ma. Kia Ngewɔ Gɔlɛi ndeni la yɛ, “Numui na lekee a na kpɛlɛɛ wie Sawei longɔ la a ndɛvui majɔɔ hu lɔ.”

¹³ Kristi i mu wumawonga sondui yeya na Sawei a wala, ji i woteni a sondumamɔ mu va; ajifa Ngewɔ Gɔlɛi yɛ, “Numu gbi lekee ti ngi waani ti ngi hɛlɛ ngulii ma, Ngewɔ jondii lɔ ngi ma.”

¹⁴ Kristi i ji wieilɔ aako lubei na Ngewɔ i Lahei wumbuni pieva a Ebraham i foo nasia gama Juublaa yaa tie Yesu Kristi sabui hu, kɔɔ mu langaa a Kristi mu kpɛlɛɛ mu Ngewɔ Yafei na majɔɔ i Lahei wumbuni fa.

Sawei Ɛɛ Ngewɔ Lahei Hunyani

¹⁵ Nya mbaa Kristimableisia, hindei nasia ta wie folo gbi, nyaa yeengila yɛma a Ngewɔ Lahei yeetɔmaseli. Numu fele ti hinda yangilingaa, ti kɔlɔ gbatɛ fa ti ti lɛisia nyɛi ma, numu gbi ɛɛ gu aa nganyani ɔɔ i mato a hani gbi.

¹⁶ A nda nɛmahu kɛ Ngewɔ i ngi laheisia wumbuni Ebraham lɔ gama kɛɛ ngi bɔɔsɔɛi. Ngewɔ Gɔlɛi ii ndeni aa yɛma “bɔɔsɔɛisia” ngi lii aa yɛ faha ma, ngi lii i yɛ “bɔɔsɔ” yakpe lɔ ma tamia a Kristi.

¹⁷ Na nya lii i ma tamia a ji; kɛ Ngewɔ tia Ebraham ti hinda yangililɔ tawao Ngewɔ i Lahei wumbu yɛ ɛɛ nganyani. Sawei na Ngewɔ i feni foo hɔndɔ naani kaalɛ numu gbɔyɔngɔ maahu puu na wooma ɛɛ gu aa hinda yangilingɔi na yanyani tawao ɛɛ gu i Ngewɔ Lahei lufe.

¹⁸ Gbamaile ina jifa numu a Sawei hou famia Ngewɔ a hinda yekpe wie a ngie, kɛ ii piema Lahei na va i mbumbuni, na hu gbi, jifa Ngewɔ lahei wumbuni, famia i feni Ebraham wɛ.

¹⁹ Kɛ gbɔɔ hɔɔ Sawei yengei yɛla? Ngewɔ i ngi hinda yangilingɔi matoilɔ a Sawei kɛva kɛ nuuvunga ti jumbu wienga tawao Sawei yɛma lekee wɔɔ na haaŋ Ebraham bɔɔsɔɛi na Ngewɔ i Lahei wumbuni ngi gama fa i wa. Malikeisia lɔ Ngewɔ i pieni ti yei a Sawei Mojisi wɛ, Mojisi i fe nungeisia wɛ kɛ i wotenga a nduahu jiagamɔ Ngewɔ taa nungeisia luahu.

²⁰ Kɛɛ watii na Ngewɔ i Lahei wumbuni Ebraham gama, ta yakpe lɔ i pieni, nduahumɔ ii yɛ ma.

Sawei Yengei

²¹ Kɛ Sawei tia Ngewɔ laheisia ti gɔmaa a ti nyɔunyɔ? Sawo, tii gɔma kulo bɛɛ! Gbamaile ina Ngewɔ jawei a gulɔ a numu bawola, Ngewɔ a taa numui gbi luahu gbatɛlɔ jifa ta yeesawei hou.

²² Kɛɛ Ngewɔ Gɔlɛi yɛ dunyablaa gbi lɔ jumbui gbayei yeya; faale kpekpeyei wɔɔ Ngewɔ i Lahei wumbuni pieva, a pie a nasia lɔ ta la a Yesu Kristi.

²³ Kɛɛ pɛiŋ lala a Kristi yeewatii i yaa wa, mu magbangɔ yɛla sawei yeya, haaŋ i to lalei magɛ gbei ma.

²⁴ Faale Sawei lɔ mu yɛ ngi va haaŋ Kristi i wa, aako i mua Ngewɔ-ni luahu gbatɛ ji ma la a Kristi.

²⁵ Kia na watii i hitinga lava a Kristi, muii yaa Sawei gbayei bu.

²⁶ Jifa wu langɔ a Kristi famia wu kpɛlɛɛ wu yɛnga a Ngewɔ leengeisia, wua Yesu Kristi-ni wu wilingɔ hu.

²⁷ Ti wu wuailɔ kɛ wua Kristi-ni wu wilinga hu, tawao kiahuna na wu kpɛlɛɛ wu wu lii huyilinga wieva kia Kristi vulii i na.

²⁸ Faale nduahugɛ gbi ii yaa Juublaa luahu tia nasia Juublaa yaa tie, nduwɔngeisia tia nasia nduwɔ yaa tie, hingeisia tia nyahangɛisia, wu kpɛlɛɛ numu yakpe lɔ a wue, wu wilingɔ hu wua Yesu Kristi-ni.

²⁹ Ina Kristi woo lɔ a wue, kɛ Ebraham bɔɔsɔɛisia lɔ a wue, tawao wa poohani na majɔɔlɔ Ngewɔ i Lahei wumbuni fa.