ƐFISƆSBLƐISIA 5 - Ngowili Yekpei Numu Kpɛlɛɛ Va

Mahoungɔ Mu Yɛ Fofoi Hu

¹ Faale naa, kia Ngewɔ liima leengeisia a wue, mahoungɔe vulii wu lapi aako wu wiehindeisia ti gbua a ngi ndei.

² Mahoungɔ ndoma i jia a wue hinda gbi hu wu lɛɛvui hu, kia lɔɔ Kristi i loni a mue, i ngi lɛɛvui ve a saahanii gu nɛnɛɛ na nɛngɔ Ngewɔ wɛ.

³ Jifa Ngewɔ nungeisia a wue, puegbua hinda ɔɔ manɔhɔ hinda ɔɔ mani nyamu wiela nungaa ti yeya-hanisia ma, maa ii houni kulo bɛɛ ndaa gɛva vulii bɛɛ wu lia.

⁴ Tawao maa ii houni wu loko wili ngufeba yɛpɛ lela hu ɔɔ baaba yɛpɛ ɔɔ ndawɔ yɛpɛ. Kia waa na wie, a ya a siɛgbua Ngewɔ ma.

⁵ A la la kɛ numu gbi lekee a puegbua hindei wie ɔɔ manɔhɔ hinda ɔɔ a mani nyamu wie nungaa ti yeya-hanisia ma ɛɛ heima gbi jɔɔ kunafɔ mia Kristi taa Ngewɔ ta yɛ na mahayɛi ma; gbɛva hanimanimɔ wiengɔi kia numu na a vɛfɛ nɔmɔli yewɔi vɛlilei ma

⁶ Waa luma numu gbi aa wu wɛlɛ a baabaa yɛpɛngaa; yeehindei nasia vulii va lɔ Ngewɔ a liilewe nasia ma tɛɛ golo ngi wɛ.

⁷ Faale gbɛ-o-gbɛ aa yɛ wua numu bondɛi nasia luahu.

⁸ Wua vulii wu yɛ wɔɔ kpindi hu lɔ, kɛɛ i hiye watii na ma wu woteni a Ndemɔi woo, wu fofoi hu lɔ. Faale mahoungɔ wu luva kia fofohublaa,

⁹ gbamaile yeefofoi ji huvei lɔ a pie nungaa ti hinda gbi wie na kpekpengɔ, pɔɔnangɔ, tawao tɔnyangɔ.

¹⁰ A lapi wu Ndemɔi liima hindei gaa wu kɔɔ.

¹¹ Waa wili baabaa hindei nasia hu kpekpeya gbi ii hu nungaa ta pie, gbɛva nasia ti kpindi hu tia mia ta yeehindei nasia wie. Kia waa na wie, a yeehindei jisia magbundɛ gula fofoya.

¹² Mawufengɔe hulewengɔ gbo laliva vulii hindei nasia ma ta pie ndɔwuma.

¹³ Kɛɛ foofo i wungaa yeehindei jisia kpɛlɛɛ ma kɛ ti yɛyii yeetɔnyɛi maa i gɛnga gbalauŋ.

¹⁴ Ajifa hani gbi lekee numu a gu a tɔla, foofo le. Famia ta nde tɛ: “Njiimɔi, wu, bi hiye hee hu, tawao Kristi a voolɔ i foofo wu bi ma.”

¹⁵ Faale a wu luvayii mahugbe. Waa luva kia nungei nasia tii hinda hugɔɔ, kɛɛ a luva kia nɛmahuleweblaa.

¹⁶ Watii gbi lekee wa gu a hinda yekpe wiela mahoungɔ wu pie, ajifa nuuvuisia ti nyamungɔe a folei ji.

¹⁷ Waa yɛ a kpowablaa, a lapi kɔɔ gbɔɔ Ndemɔi longɔ la wu pie.

¹⁸ Ndɔ aa wu hou, ajifa a hinda lɔ huwu lekee; kia na aa wie, Ngewɔ Yafei ta i wu laave.

¹⁹ A wule wu nyɔunyɔ gama ngulei nasia ti Saam Gɔlɛi hu kɛɛ Kristimableisia ti wuleisia; a Kristimableisia ti wuleisia yaa kɛɛ Saamisia kɛɛ ngulii nasia Ngewɔ Yafei a kɛ, a wu lii gbi siɛgbuava Ndemɔi ma.

²⁰ Mu Lemɔi Yesu Kristi biyɛi hu a siɛgbua mu Kɛkɛ Ngewɔ ma kpele gbi hindei gbi va i wiema.

Nyahamɔi Tia Ngi Nyahɛi Ta Yee Hei

²¹ A wuaa wu nyɔunyɔ bu mbɛlɛhei na gɛva i wu yeya Kristi va.

²² Hiniblɛisia, a wuaa wu hiningɛisia bu, bi tɔngaa bɛɛ Ndemɔi mia wu wuama ngi bu.

²³ Gbamaile hinii lɔ kpaya i ngi wɛ nyahɛi maahu kia lɔɔ kpaya i Kristi wɛ sɔsiblɛisia maahu; tawao Kristi na ngi gbuhei a sɔsiblɛisia ta vulii lɔ i sɔsiblɛisia bawoni.

²⁴ Faale mahoungɔe hinimɔ gbi i golo ngi hinii wɛ kia sɔsiblɛisia ti golongɔ Kristi wɛ.

²⁵ Nyahamɔi, lo a bi nyahɛi a ndomɛi na nyɔkɔ Kristi i piengɔ a sɔsiblɛisia gbi, i ngi lɛɛvui ve ti va.

²⁶ I ji wieilɔ kɔɔ i sɔsiblɛisia wua fo a njɛi kɛɛ Ngowili Yekpei;

²⁷ aako i sɔsiblɛisia ve ta yekpe wɛ kia numui na, nyandengɔ waa tawao mbɛ gbi ii ngi ma.

²⁸ Mahoungɔe hingeisia ti lo a ti nyahangɛisia kia ti longɔ a tia yekpe ti gbuhɛisia. Hindoi na ngi longɔ a ngi nyahɛi ngi longɔe a ta yekpe.

²⁹ Numu gbii na aa lolo a ta yekpe ngi gbuhɛi. Kia aa na wie, a ngi gbuhɛi makɛlɔ a mɛhɛɛ, a mahugbe, kia lɔɔ Kristi a pie a sɔsiblɛisia,

³⁰ ajifa ngi gbuhɛi yeemaahakɛisia lɔ a mue.

³¹ Kia Ngewɔ Gɔlɛi i ndeni la yɛ, “Sabui ji va, hindo a ngi kɛkɛ lolɔ kɛɛ ngi nje i vɛfɛ ngi nyahɛi ma, kɛ ti veengɔ ti yɛnga a numu yila.”

³² Tɔnya hubɔngɔ lɔwungɔ lɔ hugɛngɔ Ngewɔ Gɔlɛi ji hu, tawao ngi kɔɔlɔ kɛ kɔlooni Kristi kɛɛ sɔsii lɔ ma.

³³ Kɛɛ kɔlooni wua bɛɛ lɔ ma: mahoungɔ nyahamɔ gbi i lo a ngi nyahɛi kia ngi longɔ a ta yekpe tawao mahoungɔ hinimɔ gbi i baa gɔɔ waa ngi hinii ma.