ƐFISƆSBLƐISIA 3 - Ngowili Yekpei Numu Kpɛlɛɛ Va

Pɔɔl Lɔ Ndɔwuma Hindei Hugɛma A Nasia Juublaa Yaa Tie

¹ Sabui ji vamia, nya Pɔɔl, nga hɛɛ wu va, kia bɛɛ kpindiwɛlɛbumɔ a nge Yesu Kristi va, wua wu va Juublaa yaa wue.

² Pɛiŋ ngi ya li gulɔ, i laailɔ leiŋ kɛ Ngewɔ, ngi yauwandei hu, i ngengei ji venga nya wɛ kɔɔ ngi pie wu gbekpeyei va.

³ Ngewɔ i ngi hugbatɛ lɔwungɔe hugɛilɔ a nge, kia ngi nyɛinga sange.

⁴ Tawao wu na gaangaa ngi nyɛini, wa gulɔ a na gɔla ngi kɔɔngɔ kɔlooni Ngewɔ hinda lɔwungɔi na ma Kristi i ngayengema.

⁵ Wɔɔ ta, Ngewɔ ii yeehinda lɔwungɔi ji magɛni a nuuvungaa kɛɛ kiahuna i pienga ngi Yafei i hugɛnga a kayema looblɛisia kɛɛ ngi lutuisia.

⁶ Yeehinda lɔwungɔi a ji lɔ kɛ Ngowili Yekpei i pienga nasia Juublaa yaa tie tia Juubleisia ti gbɔnga Ngewɔ lubeisia ma; ti yɛni a Kristi gbuha yakpei lɔ, ti gbɔngɔ hani na ma Ngewɔ i Lahei wumbuni fa, Yesu Kristi sabui hu.

⁷ Ngewɔ pienga ngi yɛnga a ngengemɔ ngowili yekpei va a ngi yauwandei hu we, na i feni mbɛ gbama, a ngi gbayei yengeihu wɛ.

⁸ Numui na Ngewɔbleisia kpɛlɛɛ ti lewengɔ ngi ma, i leweni nya ma; na hu gbi nya lɔ Ngewɔ i ngauwandei ji veni nya wɛ liva nasia Juublaa yaa tie gama a Ngowili Yekpei kɔlooni Kristi gbatɛ wai na ma tɛɛ gu a mbugɔɔla;

⁹ tawao gbɔma ngi fasai numui kpɛlɛɛ gama kia Ngewɔ a yee ngi hinda hugbatɛngɔ lɔwungɔi yayenge. Ngewɔ na hani gbi gbatɛni, i ngi hugbatɛ lɔwungɔi lɔwuilɔ foo gboto lewengɔ kpɛlɛɛ va wɔɔ,

¹⁰ aako sɔsii sabui hu, malikei yeemahangeisia tia ngafa nyamui nasia ti na ti ngi nɛmahulewei yeelasii kpɛlɛɛ gɔɔ.

¹¹ Ngewɔ i ji wieilɔ kia lɔɔ wɔɔ dunyei lɔtomɛi i hugbatɛni pieva, tawao i pieni a mu Lemɔi Yesu Kristi loko lɔ.

¹² Jifa mua Kristi-ni mu wilingɔ hu tawao mu langa a ngie, ma ndiigba jɔlɔ liva Ngewɔ gɔɔbu, mu kɔɔngɔ kɛ a wololɔ mu ma.

¹³ Faale nyaa wu manɛnɛma, waa yɔkɔ jifa kpalɛ i lama nya ma wu va; ji kpɛlɛɛ i wiemaa aako wu nafa.

Kristi Lomɛi

¹⁴ Sabui ji va lɔ kia ngi ji kpɛlɛɛ lenga nga gula lɔ mu Kɛkɛ gɔwɔbu,

¹⁵ na a hani gbi gɔ ti ngelegoohu kɛɛ dunya a ndɛvui.

¹⁶ Nyaa Ngewɔ manɛnɛma kɔɔ i pie ngi Yafei i kpaya gbua ngi wɔlɔya wai hu i fe wu wɛ aako wu yafeisia ti gbaya,

¹⁷ tawao nyaa Ngewɔ vɛlima ngɛɛ i pie Kristi i hei wu liisia hu kia wu langɔ a ngie. Nyaa Ngewɔ vɛlima ngɛɛ wu gbɔku ndoma hu, tawao i gbaya wu liisia hu,

¹⁸ aako wua Ngewɔbleisia gbi wu kpaya majɔɔ Kristi lomɛi yawɔlɔyii hugɔva gbalauŋ kɛɛ ngi guhayii kɛɛ ngi wungɛi kɛɛ ngi hubɔyii.

¹⁹ Ngewɔ i pie wu Kristi lomɛi gɔɔ, kia bɛɛ numu ɛɛ gu aa kpɛlɛɛ gɔɔ, aako wu gbua vulii a Ngewɔ.

²⁰ Ngewɔ na, ngi gbayei i yengema mu hu, a gulɔ i na wie kpotongɔ kaka tewengɔ polouŋ na ma ma ngi mɔlila ɔɔ ma gilila,

²¹ Yesu Kristi kɛɛ Ngewɔbleisia ti mbɛlɛya ve Ngewɔ wɛ watii gbi va, kunafɔ kɛɛ kunafɔ. Amiina.