KƆLƆSIBLƐISIA 3 - Ngowili Yekpei Numu Kpɛlɛɛ Va

¹ Kia Ngewɔ i Kristi wunga hee hu i pienga wu ndɛvu nina majɔɔnga, faale a gbewe hanii nasia va ti Ngewɔ yeya wu va ngelegoohu mia Kristi i heini na ngi maha-heimɛi Ngewɔ yejei hu.

² A gbewe tuuŋ hanii nasia va ti mahui, waa gbewe hanii nasia va ti mbei dunyei hu.

³ Ajifa piengɔe bɛɛ wu haanga, kɛɛ wu lɛɛvui yeekpekpei lɔwungɔe Ngewɔ gama, Kristi sabui hu.

⁴ Wu lɛɛvui yeekpekpei i Kristi yeya lɔ, tawao watii na a gbua nga, yeewatii na lɔ wua bɛɛ wa gbua nga wua tieni wu gbɔ ngi wɔlɔyɛi ma.

Ndɛvu Ninɛi Kɛɛ Yeengovei

⁵ Mahoungɔ hɔɔ wu dunyama mani nyamui nasia waa ta wu yayenge kia nyɔkɔ: puegbuala, manɔhɔ hindei, nyaha mani, hinda nyamu wie mani kɛɛ hani-mani (ajifa hani-mani i yɛni a nɔmɔli vɛlilei yeelasii yila lɔ.)

⁶ Hindei jisia nyɔkɔ va, Ngewɔ a kpaalɛ maluwangɔ lalɔ nasia ma tɛɛ golo ngi wɛ.

⁷ Watii yila wɔɔ, mani nyamui jisia ti yɛlɔ wua bɛɛ vulii hu, wa pie ji wu yɛ yeemanii nasia yeya.

⁸ Kɛɛ kiahuna na mahoungɔ wu gbe a hinda nyamui jisia kpɛlɛɛ wiela: ndiilewei, ndiimavulɛi, kɛɛ kili nyamuisia. Njia nyamu nungaa wekeisia va ɔɔ manyimi yɛpɛ aa gbua wu laa kunafɔ.

⁹ Waa ndɛɛ guala wu nyɔunyɔ wɛ, ajifa wu gbuanga na wu yɛyii wovei hu kɛɛ hinda nyamui nasia kungɔ yɛla wu hu pieva,

¹⁰ wu yɛyii nina wumbunga. Numu ninɛi ji wu yɛnga la, wu Gbatɛmɔi Ngewɔ waa lɔ piema a gbua lekee a ngie aako wu ngi hinda hugɔɔ pandawanda.

¹¹ Faale, nduahugɛ gbi ii yaa nasia Juublaa yaa tie ti luahu tia Juublaa, biliblɛisia tia pɔnɔblɛisia, ndɔlɔ weka hublɛisia, makɛvɛliblɛisia, nduwɔngɛisia kɛɛ nasia nduwɔ yaa tie, kɛɛ Kristi lɔ baama hanii le tawao numui kpɛlɛɛ hu.

¹² Ngewɔ nungeisia lɔ a wue; i loilɔ a wue i wu yɛ a ngi woo. Faale na, a yɛ a nungaa mamaanu lɔ, wa hinda wanda wie, wa wua yekpe mayei, wu liigɔlɛngɔ, tawao wu liilongɔ i yɛla.

¹³ Wu wiehindei i gu wu nyɔunyɔ hu, wa manu wu nyɔunyɔ ma watii na numu yila a nyamu ga a pekei. Mahoungɔe wu manu wu nyɔunyɔ ma kia lɔɔ mu Lemɔi i manunga la wu ma.

¹⁴ Tewengɔ hindei jisia kpɛlɛɛ wiela ma, a lo a wu nyɔunyɔ ajifa na lɔ a pie wu wili hu, wu lii i yɛ yakpe kia mahoungɔ i wiela.

¹⁵ Ndiilɛli na Kristi a fe i na pele gɛva lɔ a wue hinda gbi hu wa pie; ajifa Ngewɔ i wu lɛnga ma hinda yila wu yɛva a kpuha yila aako wu yeendiilɛli ji yaati gɔɔ. Mahoungɔ wu siɛgbua Ngewɔ ma.

¹⁶ Mahoungɔe Kristi Wowili gabandengɔ wai i yɛ tuuŋ wu liisia hu. A yɛ a wu nyɔunyɔ gaa, wu yɛ a pele wɔnɛi gɛ a wu nyɔunyɔ a nɛmahulewei. A Saam wuleisia yaa, kɛɛ nguleisia kɔlooni Kristi ma kɛɛ ngulei nasia Ngewɔ Yafei a kɛ; a yɛ a wule Ngewɔ ma, wa siɛgboto gbua ngi ma a wu lii gbi.

¹⁷ Na gbi wa pie ɔɔ wa nde, mahoungɔ wu pie ɔɔ wu nde mu Lemɔi Yesu biyɛi hu kia wa siɛgbua la mu Kɛkɛ Ngewɔ ma ngi biyɛi hu.

Heinyɔuyei Ndɛvu Ninɛi Hu

¹⁸ Hiniblɛisia, a wuaa wu hiningɛisia bu, ajifa na mia mahoungɔ wu pie kia Kristimablaa a wue.

¹⁹ Nyahableisia, a lo a wu nyahangeisia, tawao waa gbandi a tie.

²⁰ Ndeengɛisia, kia Kristimablaa a wue, kpa le wu ma golova wu leblɛisia wɛ kpele gbi, ajifa na mia a nɛɛ Ngewɔ wɛ.

²¹ Ndooblɛisia, waa wu leengeisia ti gbalɛma hinda wie; na wiengaa ti lii a nyanilɔ.

²² Nduwɔngɛisia, a golo wu luwɔkɛisia wɛ hinda gbi hu, watii na lekee ii le ta yɛ wu yabɛɛma waa yɛ goloma jifa wu longɔ ti wu lato; kɛɛ a golo a ndiigole bagɔɔmɛi na va i wu wɛ mu Lemɔi va.

²³ Hinda gbi i yaa wu yeya pieva, a pie a wu lii gbi bi tɔa bɛɛ wu yengema mu Lemɔi lɔ wɛ, kɛɛ nuuvu va ii le.

²⁴ I ye wu nɛmahu kɛ na mu Lemɔi i ndamagbatɛnga ngi nungeisia va a wu gɔlɔ hu a mawaa. Ajifa Kristi vulii lɔ Ndemɔi le wu yengema ngi wɛ.

²⁵ Tawao Ngewɔ a hinda nyamu wiemɔ gbi pawalɔ hinda nyamui nasia va a pie, ajifa numui gbi ti gbɛmboyii i yakpe, Ngewɔ ɛɛ topooma wie.