TOBLEISIA TI WIEHINDEISIA 9 - Ngowili Yekpei Numu Kpɛlɛɛ Va

Sɔɔl Lɔ Lama A Yesu

¹ Kɛɛ Sɔɔl i yɛlɔ lekee a Ndemɔi Yesu mableisia huluwa a ti waala. I liilɔ Saagbuablɛisia ti gulɔmɔ wai gama,

² i ngi mɔli kɔlɛi na va a ngi magona Juuisia ti hɛɛ wɛlei yeetokulɔi nasia ma ti yɛ Damaskɔs, aako i nungaa malengaa na ta to Ndemɔi welei ma, kpaya i yɛ ngi wɛ ti houva, hiingaa kɛɛ nyahangaa, i yaama a tie Jelusalɛm.

³ I yɛ pelei hu lɔ a li Damaskɔs kɛɛ kia i foni tei gbla, kɛ foofo waa i gbuanga fulo ngelei ma i voo ngi gblanga gbi.

⁴ Kɛ i gulanga ndɔlɔmei, i mɛni numu a nde ngi ma yɛ, “Sɔɔl, Sɔɔl! Gbɛe bi nya yakpɛ ma?”

⁵ Kɛ Sɔɔl i mɔlinga yɛ, “Ye lɔ a bie, Ndemɔi?” Kɛ ngoi i ndenga yɛ, “Nya mia, nya nya Yesu bi nya yakpɛma a nyamu.

⁶ Kɛɛ hiye bi li taa wai hu, na mia ta hugɛ gbɔɔ mahoungɔ bi pie.”

⁷ Nungɛi nasia tia Sɔɔl-ni ti jiei ji gani, ti yɛ loonilɔ ti lawongɔ; ti ngoi mɛnilɔ kɛɛ tii numu gbi lɔni.

⁸ Sɔɔl i hiyeilɔ ndɔlɔmei i ngi yaamɛi voo kɛɛ ii yɛ gu a hani gbi lɔla. Faale ti houilɔ ngi lokoi ma ti li a ngie Damaskɔs.

⁹ Njii sawa va ii yɛ gu aa hinda lɔ tawao yeewatii na hu ii gbitini mɛhɛɛ gbi ma ɔɔ kpɔlehani.

¹⁰ Yesu Woomamɔ yila i yɛ li Damaskɔs ngi laa a Ananayas. Ndemɔi i ndeilɔ ngi ma hengei hu yɛ, “Ananayas!” Kɛ i lumanga yɛ, “Nya gbe, Ndemɔi.”

¹¹ Ndemɔi ndeilɔ ngi ma yɛ, “Bi magbatɛ bi li pelei na ma ta toli a ‘Pele Wɔnangɔi;’ bi fonga Judas yeepɛlɛla, bi taamɔ yila mɔli a gbua Taasɔs ngi laa a Sɔɔl. Taa hɛɛma,

¹² tawao i hengailɔ i taamɔ yila lɔ ngi laa a Ananayas, i wuaa ngi gama pɛlei bu i ngi lokoi wɛlɛ ngi ma aako i hinda lɔ gbɔma.”

¹³ Ananayas poteilɔ yɛ, “Ndemɔi, numu gboto ti taamɔi ji hinda hugɛnga a nge kɔlooni kpalɛ nyamunyamui nasia ma i ndanga bi nungei nasia ma ti Jelusalɛm.

¹⁴ Tawao Saagbuablaa Waawaisia ti kpaya venga ngi wɛ wava mbei nasia gbi houva ta hɛɛ bi biyɛi hu.”

¹⁵ Ndemɔi ndeilɔ ngi ma yɛ, “Li, ajifa ngi loko longa ngi ma nya magbewe gbuava, i pie nasia Juubla yaa tie kɛɛ maha waawangaa kɛɛ Isrɛlbleisia ti nya gɔɔ.

¹⁶ Tawao nya vulii lɔ nga kpalɛi na kpɛlɛɛ gɛ a ngie a la ngi ma nya va.”

¹⁷ Kɛ Ananayas i ya, i wuaa pɛlei bu, i ngi lokoi wɛlɛ Sɔɔl ma yɛ, “Nya ndewei Sɔɔl, Ndemɔi Yesu vulii na i gɛni a bie pelei hu ji bi yɛ wama mbei, tamia i nya longa bi gama. I nya longalɔ aako ngi pie bi hinda lɔ gbɔma, Ngewɔ Yafei bɛɛ i yei bi ma.”

¹⁸ Ngaamɛi na kɛ hani kia nyɛɛgɛi na i gbuanga Sɔɔl yaamɛi ma, kɛ i hinda lɔnga gbɔma. I hiyeilɔ i lo, ti ngi wua,

¹⁹ tawao kia i mɛhɛɛ mɛni, i gbɔma kaahu majɔɛilɔ. Sɔɔl i lɔwɔ lɛɛngaa gbɔyɔilɔ Yesu mableisia gama Damaskɔs.

Sɔɔl Lɔ Ngowili Yekpei Lema Damaskɔs

²⁰ I liilɔ yakpe hɛɛ wɛleisia bu i tɔtoo a Ngowili Yekpei lela nungaa ma kɔlooni Yesu ma yɛ, “Ngewɔ Hindoloi lɔ a ngie.”

²¹ Nasia gbi ti ngi woo mɛnini i gualɛilɔ ti ma, ta ti nyɔunyɔ mɔlimɔli tɛɛ, “Taamɔi ji ii le i yɛ nungei nasia waa ti yɛ hɛɛ Yesu biyɛi hu Jelusalɛm? Tawao ii wani mbei yeehindei ji lɔ va aako i yeenungeisia hou i yaama a tie Saagbuablaa Waawaisia gama?”

²² Kɛɛ kpaya waa i yɛlɔ lekee a wuaa Sɔɔl Yewɔ yia lelei hu tawao tɔmaseli nasia i yɛ kɛ kɛva kɛ Yesu lɔ Ngewɔ Maha Heingɔi le i lɛilɔ nungeisia woohu na hii Juu nasia ti yɛ Damaskɔs tii guni a ngi layie magbuala.

²³ Lɔwɔ gboto wooma, Juuisia ti lɛilɔma, ti hinda hula Sɔɔl waava;

²⁴ kɛɛ i yeehindei ji hugɔɛilɔ. A folo kɛɛ kpindi ti yɛlɔ a sua wu ngi gulɔ tei yeekata lamɛisia aako ti ngi waa.

²⁵ Kɛɛ kpindi yila Sɔɔl woomableisia ti lɛilɔ a ngie gɔlɛi ya, ti ngi hei sambɛi hu, ti ngi yei a gɔlɛi wooma wee.

Sɔɔl Lɔ Yamama Jelusalɛm

²⁶ Sɔɔl i liilɔ Jelusalɛm i lapi wiliva Yesu mableisia lia. Na hu gbi tii guni a lala la kɛ Yesu mamɔ mia a ngie tawao ti gbi ti luwangɔ yɛla ngi ma.

²⁷ Kɛɛ Banabasi i gbɔilɔ ngi ma, i li a ngie tobleisia gama. I hugɛilɔ a tie kia Sɔɔl i Ndemɔi lɔni Damaskɔs welei hu kɛɛ ji Ndemɔi i yɛpɛni ngi gama. I gbɔma hugɛilɔ a tie kia Sɔɔl i Ndemɔi Woowili Yekpei leni Damaskɔs a ndiilo.

²⁸ Faale Sɔɔl i loilɔ ti gama tawao taa teeni ti Jelusalɛm gaalɛilɔ ti komɛ a Ngowili Yekpei le a ndiilo Ndemɔi biyɛi hu.

²⁹ Tia Juui nasia ti yɛ Glikiyiɛi le ti yɛpɛilɔ, ti ndabla gboto wie, kɛɛ ti yɛlɔ lekee a pele gɔli ngi waava.

³⁰ Kia Yesu mablaa wekeisia ti ji hugɔɔni, ti liilɔ a ngie Siisaria, ti ngi yoyo ngi yeetaahu Taasɔs.

³¹ Sɔɔl wotengɔi wooma a Yesu mamɔ, Yesu mablei nasia gbi ti yɛ Judia kɛɛ Galili kɛɛ Samelia ti ndiilɛli majɔɛilɔ watii lɛɛngaa va, tawao ti maa i yɛlɔ lekee a to Ngewɔ Yafei gbɔmi hu ajifa ti yɛ baa waa velɔ Ndemɔi wɛ ti luvayii gbi hu.

Pita Lɔ Lima Lida Kɛɛ Jɔpa

³² Pita jɛsiɛlɔ hu gbi, tawao watii yila i liilɔ vama Ngewɔblei nasia ma ti yɛ Lida.

³³ Na lɔ i taamɔ yila maleni na ngi laa a Inias, ngi gbɔkpɔngɔ, ii yɛ guni a hiyela kpukɔi ma foo wayakpa va.

³⁴ Pita i ngi loliilɔ yɛ, “Inias, Yesu Kristi i bi bawonga, hiye bi bi gbukɔi hugbatɛ.” Inias i hiyeilɔ ngaama.

³⁵ Nungɛi nasia gbi ti yɛ heini Lida kɛɛ tei na hu ti yɛ toli a Serɔn ti ngi lɔilɔ kɛ ti langa a Ndemɔi.

³⁶ Nyaapo yila yɛlɔ Jɔpa ngi laa a Tabita, ngi langɔ a Yesu. (ngi lɛi mia wɔɔ a Dɔkas Glikiyiɛi hu, yeembui a “Ndopɛi.”) Ngi magbewe gbi ii yɛ na kɛ lekee hinda yekpe wiela kɛɛ gbɔla fɛɛliblɛisia ma.

³⁷ A watii na, i heegbɛilɔ, kɛ i hanga. Ti ngi womɛi wuɛilɔ, ti nda ngeleya lomu yila hu.

³⁸ Lida luahui a Jɔpa hu ii yɛ guhani waa, tawao ji Yesu mableisia nasia ti yɛ Jɔpa ti mɛnini kɛ Pita lɔ Lida, ti numu fele loilɔ ngi gama tɛɛ, “Hiye sa bi wa mu gama.”

³⁹ Pita i ngi magbateilɔ i li ti gama. Kia i foni, ti liilɔ a ngie yeengeleya lomui hu. Poonyahangɛisia gbi ti lɛilɔ ngi ma, ta wɔɔ, ta kulei nasia gɛ a ngie Dɔkas i hɔɔni ji ndɛvu i yɛ ngi hokpala.

⁴⁰ Pita i pieilɔ ti gbi ti gbua yeelomui hu, i wombi gbakpa, i Ngewɔ vɛli; kɛ i wotenga pomɛi gama yɛ, “Tabita, hiye!” I ngi yaamɛi voeilɔ tawao kia i Pita lɔni, i hiyeilɔ i hei.

⁴¹ Pita i loko lamboilɔ, i gbɔ nyaapoi ma i hiye i lo. Kɛ i Yesu mableisia lolinga kɛɛ poonyahangɛisia i nyaapoi magona ti ma ngi vulungɔ.

⁴² Hindei ji yeetɔwɔi guilɔ Jɔpa gbi, tawao numu gboto ti lɛilɔ a Ndemɔi.

⁴³ Pita i yɛlɔ Jɔpa lɔwɔ gboto va, i heini hua-kɔlɔ yengemɔ yila gɔɔma ngi laa a Saimɔn.