TOBLEISIA TI WIEHINDEISIA 4 - Ngowili Yekpei Numu Kpɛlɛɛ Va

Tiaa Wama A Pita Tia Jɔn Kotii Gulɔ

¹ Pita tia Jɔn ti loni yɛpɛmaa nungeisia gama, Jɔn i looni ngi gblanga, kɛ Saagbuablɛisia kɛɛ Ngewɔ Wɛlei mahugbeblɛisia ti maahumɔi kɛɛ Sadusiisia ti wanga ti gama.

² Ti lii lewengɔ yɛla jifa toblaa felei jisia ti yɛ nungaa gaa tɛɛ Yesu i hiyeilɔ hee hu, tawao na i kɛilɔ kɛ haableisia ta vululɔ ti hiye hee hu.

³ Faale, ti ti houilɔ ti ti wu kpindiwɛlei bu ti yii na ajifa foloi gulangɔ jɔngɔ yɛla.

⁴ Kɛɛ numu gboto fahii na hu ti Pita tia Jɔn ti layie na mɛnini ti lɛilɔ a Yesu, kɛ nasia ti langɔ a Yesu ti jikei i gunga a numu tauji lɔɔlu.

⁵ Kia ngele i woni Juuisia ti gulɔbleisia kɛɛ kpakoleisia kɛɛ Sawei Yeekaamɔisia ti lɛilɔma hinda yila Jelusalɛm.

⁶ Ti gomɛilɔ tia Saagbuablɛisia ti gulɔmɔ wai Anas kɛɛ Kayafasi, kɛɛ Jɔn kɛɛ Alɛksanda kɛɛ Saagbuablɛisia ti gulɔmɔ wai lehublaa wekeisia.

⁷ Ti pieilɔ Pita tia Jɔn ti lo ti gulɔ ti ti mɔli tɛɛ, “Wu yee pieni kpɔɔkpɔmɔi i bawoni? Ye gbaya lɔ wu taamɔi bawoni la, ɔɔ yee biyɛ lɔ wu tolini ji wu yɛ taamɔi bawoma?”

⁸ Ngewɔ Yafei i Pita huveilɔ kɛ i ti mɔli gbɛmbonga yɛ, “Wua wu tokulɔisia kɛɛ kpakoleisia,

⁹ wu mu lɛnga Kotii hu haa kɔlooni kpekpei na ma i wieni a kpɔɔkpɔmɔi kɛɛ i yee pieni i bawoni,

¹⁰ kɛɛ mahoungɔe wu kɔɔ, tawao Isrɛlbleisia gbi ti kɔɔ kɛ Yesu Kristi Nasalɛtimɔi ngi biyɛi gbayei hu lɔ taamɔi ji i looni mbei ngi bawongɔ jeiŋ. Yesu na wu kpakpani krɔsii ma kɛɛ Ngewɔ i ngi wu hee hu.

¹¹ Yesu lɔ Ngewɔ Gɔlɛi i ngi yɛpɛ leni yɛ, ‘Kɔtii na wu pɛlɛ loblɛisia wu gbeleni ma wɛɛ ii gbekpeni, i woteilɔ a baama gɔtu kɔtii kpɛlɛɛ ma.’

¹² Yesu yakpe lɔ numu a mbawo majɔɔ a ngie ajifa numu weka gbi na dunyei hu Ngewɔ aa ngi biyɛi ve nuuvungaa wɛ a gu a mu bawola.”

¹³ Kotii lebleisia ti wuhu i wuilɔ tɔvaa Pita tia Jɔn ta yɛpɛ tɛɛ luwa kɛɛ ji gbɔma ti kɔɔni kɛ numu gbamanga mia a tie, tii lini kaawɛlɛ gbi bu. Ti yɛ kɔɔlɔ kɛ tia Yesu-ni ti yɛlɔ a lewe watii lɛɛnga va.

¹⁴ Kɛɛ njɛpɛ gbi ii gbuani ti laa ajifa taamɔi na i bawoni ti ngi lɔilɔ tia Pita kɛɛ Jɔn ti looni.

¹⁵ Faale ti ndeilɔ ti ma tɛɛ ti gbua lɛɛ Kotii hu, ti tɔtoo a wuhitɛla a ti nyɔunyɔ.

¹⁶ Ti tia yekpe mɔlilɔ tɛɛ, “Gbɔɔ ma pie a kɔɔngɛi jisia? Numu gbi lekee i heini Jelusalɛm i kɔɔlɔ kɛ tia lɔ ti kabande hinda wai ji wienga tawao muɛɛ gu a houla a mawali.

¹⁷ Kɛɛ aako yeehindei ji yeetɔwɔi aa vaya nungaa kpɛlɛɛ maahu, a mu nungei jisia laahii taa yɛpɛ kunafɔ numu gbi gama Yesu biyɛi hu.”

¹⁸ Faale ti Pita tia Jɔn loliilɔ ti ti laahii tɛɛ gbɛogbɛ i wie taa gbɔma yɛpɛ ɔɔ ti numu gbi gaa Yesu biyɛi hu.

¹⁹ Kɛɛ Pita tia Jɔn ti poteilɔ ti ma tɛɛ, “Wua vulii a kiti lewe lɛɛ yeegbɔɔ pɔɔnangɔ Ngewɔ yaama, golova wu wɛ ɔɔ golova Ngewɔ wɛ.

²⁰ Ajifa muɛɛ gbe a yɛpɛla a hindei nasia mu tɔnga tawao mu mɛninga.”

²¹ Kotii lebleisia ti ti laahilɔ kpaukpaungɔ tewengɔ yeengovei ma, ti gbe ti ma. Tii pele gbi jɔni kpalɛ lava ti ma, jifa nungeisia gbi ti yɛlɔ a Ngewɔ lato na va i wienga.

²² Taamɔi na ti ngi bawoni a kabande welei na, ngi voo lewengɔ yɛla numu fele gbɔyɔngɔ ma.

Yesu Mableisia Lɔ Ngewɔ Vɛlima Ndiilo Va

²³ Kia lekee ti gbeni Pita tia Jɔn ma, ti yamɛilɔ ti mbaangɛisia gama ti na gbi hugɛ a tie Saagbuablaa Waawaisia kɛɛ kpakoleisia ti ndeni.

²⁴ Kia ti mɛnini, ti gbi ti wɛleilɔ-hu ti Ngewɔ vɛli tɛɛ, “Bia Ndemɔi a bie bi ngelegoohu gbatɛni kɛɛ dunyei kɛɛ gboyei kɛɛ na gbi i ti hu!

²⁵ Bi Yafei gbayei hu bi njɛpɛ wuilɔ mu maada, bi bɔilopoi Devidi laa i nde yɛ, ‘Gbɛe Kɛnyɛblaa wekeisia ti liileweni; gbɛe nungeisia ti hinda hulani gbama?

²⁶ Dunyei yeemahangeisia ti tia yekpe magbatɛilɔ, Samangɛisia ti gomɛ lapiva a Ndemɔi kɛɛ ngi Maha Heingɔi.’

²⁷ Ajifa tɔnya le kɛ Hɛlɔd tia Pɔntiɔsi Paileti ti gomɛilɔ tei ji hu tia nasia Juubla yaa tie kɛɛ Isrɛlbleisia Yesu mavɛɛva, bi yengemɔi na i ta yekpe vengɔ bi wɛ tawao tamia bi pienga i yɛnga a bi Maha Heingɔi.

²⁸ Ti lɛilɔma hindei gbi wieva bi wilanga a kiti lewela ngovama bɛɛ a wielɔ. Ba gulɔ wɔɔ a ndela gbɔɔ kpɛlɛɛ a wie ajifa yeekpayɛi lɔ bi wɛ tawao hii bi longɔ yɛla i wie.

²⁹ Faale na, Ndemɔi, wolo huluwɛi jisia ma ti mu huluwanga la, bi pie mua bi yengebleisia a mue mu gu mu bi woowili le a ndiilo.

³⁰ Bi gbayayii gɛ nungaa bawova, bi pie mu gu a kabande hinda waawangaa wiela bi yengemɔi Yesu gbayei hu.”

³¹ Kia ti kpɔyɔni a Ngewɔ vɛlila, hindei na ti gomɛngɔ yɛla na i gbɛlilɔ kɛ Ngewɔ Yafei i wuaanga ti gbi hu, ti tɔtoo a Ngewɔ yiɛi lela a ndiilo.

Yesu Mableisia Ti Wuma Hani Ii Na

³² Yesu mableisia gbi ti lii i yɛ yakpe kɛɛ ti nɛmahui. Numu gbi ii ndeni aa yɛma ta yakpe lɔ ngi woo a ngi yeya-hani, tawao ti gbi ti yɛ hani gbi gɔlɛkɔlɛlɔ ti nyɔunyɔu ma.

³³ Tobleisia ti seli wuailɔ a kpaya waa kɛ Ndemɔi Yesu i hiyeilɔ hee hu, tawao Ngewɔ i ti kpɛlɛɛ lubɛilɔ waa.

³⁴ Numu gbi ii yɛ ti lia haami aa lo ngi ma. Nasia ndɔgbɔngaa ti yɛ ti yeya ɔɔ pɛlɛngaa, ti yɛ majialɔ ti wa a yeenavoei na ti yɛ majɔɔ hu

³⁵ ti toko wuaa tobleisia yeya, kɛ tobleisia ti kɔlɛkɔlɛnga numui gbi ma, numu gbi i na majɔɔ ngi haamingɔ faa.

³⁶ Na vamia Josɛfi, Livaimɔ a ngie ti ngi leni tii na hu ti yɛ toli a Saipɔs, tobleisia ta ngi loli a Banabasi (yeembui a “Numu Liilomɔi”),

³⁷ i ngi lɔgbɔi majiɛilɔ, i wa a yee navoei, i toko wuaa tobleisia yeya.