TOBLEISIA TI WIEHINDEISIA 15 - Ngowili Yekpei Numu Kpɛlɛɛ Va

Yesu Mableisia Lɔ Gomɛma Jelusalɛm

¹ Nungaa lɛɛngaa ti gbuɛilɔ Judia ti wa Antiɔk, ti tɔtoo a Yesu mableisia gaala tɛɛ, “Ngewɔ ɛɛ wu bawo kɛ lekee ti wu hei biliya kia Mojisi Jawei i ndeni la.”

² Pɔɔl tia Banabasi ti ti houilɔ waa a mawali, tia tieni ti ndabla gboto wie kɔlooni yeenjɛpɛi ji ma; faale ti hugbatɛilɔ tɛɛ Pɔɔl tia Banabasi kɛɛ nasia lɛɛngaa ti yɛ Antiɔk ti li Jelusalɛm ti tobleisia lɔ kɛɛ kpakoleisia kɔlooni yeenjɛpɛi ji ma.

³ Sɔsiibleisia gbi ti vɛiilɔ ti ma ti li tawao kia ti foni Fonisia kɛɛ Samelia ti hugɛilɔ a Yesu mableisia kia nasia Juublaa yaa tie ti wotenga Ngewɔ gama; yeevei ji i Yesu mableisia gbi goohu nɛɛlɔ hulewengɔ gbo.

⁴ Kia ti foni Jelusalɛm, Sɔsiibleisia kɛɛ tobleisia kɛɛ kpakoleisia ti gahu gbuɛilɔ ti ma, tawao ti gonɛilɔ a na gbi Ngewɔ i pienga a ti loko.

⁵ Kɛ Yesu mablaa yeenasia lɛɛngaa ti Farisii gakei ma ti hiyenga ti lo tɛɛ, “Mahoungɔe ti ti hei biliya, ti nde ti ma ti Ngewɔ Jawei na hou i feni a Mojisi loko.”

⁶ Tobleisia tia kpakoleisia ti gomɛilɔ wuhitɛva njɛpɛi ji ma.

⁷ Kia ti ndabla gboto wieni, Pita i hiyeilɔ i lo yɛ, “Nya ndeengɛisia, wu hugɔɔlɔ kɛ watii huguhangɔ i lewenga na, Ngewɔ i loko loilɔ nya ma, i nya gbua wu lia Ngowili Yekpei leva nasia ma Juublaa yaa tie aako ti mɛni ti la a Ndemɔi Yesu.

⁸ Tawao Ngewɔ na i nuuvungaa ti liisia huvaa gɔngɔ i kɛilɔ kɛ nyandengɔe nasia bɛɛ va Juublaa yaa tie ti yɛva a Yesu mablaa a ji i ngi Yafei yeini ti ma, kia lɔɔ i pieni a mue.

⁹ Ii mu huwɔyɔni mua tieni; i ti liisia goleilɔ ajifa ti lani a Yesu.

¹⁰ Faale na, gbɛe wu longɔ wu Ngewɔ hugɔɔ a ji wɛɛ wu haaka minimini hei Yesu mableisia wumba na mu maadani-o, mua-o, muii guni mbu?

¹¹ Sawo! Mu langɔe a Yesu tawao ngi gbekpeyei i mu bawonga, kia lɔɔ ti na.”

¹² Numui na gbi ti maa i londoilɔ kia ti yɛ mɛni Banabasi tia Pɔɔl ta va gɛ a kabande hinda waawai nasia Ngewɔ i pieni a ti loko nasia lia Juu yaa tie.

¹³ Kia ti kpɔyɔni a yɛpɛlaa, Jemisi i yɛpɛilɔ yɛ, “A woo yɛ nya ma, nya ndeengɛisia!

¹⁴ Saimɔn i hugɛnga kia Ngewɔ gbewengɔ nasia va Juublaa yaa tie a ji i nungaa wumbuni ti lia yɛva a ngi woo.

¹⁵ Ngewɔ lutuisia ti layieisia kɛɛ ji, ti yakpe. Kia Ngewɔ ndeni ngi Gɔlɛi hu yɛ,

¹⁶ ‘Ji wooma nga yamalɔ, tawao nga Devidi wɛlɛ gulangɔi wumbulɔ ngi to, Nga ngi nyanimɛisia yangamalɔ ngi yeepɛlei lo a nina.

¹⁷ Faale nungaa wekeisia gbi ta Ndemɔi gɔkɔlilɔ, nasia Juublaa yaa tie ngi ti lolinga yɛva a nya woo.

¹⁸ Hii Ndemɔi i ndenga, na i pienga nunga ti ji hugɔɔnga wɔɔ kpɔɔ.’ ”

¹⁹ Jemisi liilɔ gulɔma a ngi yɛpɛi yɛ, “Taa nya nɛmahu kɛ maa ii houni mu nasia Juublaa yaa tie vawɔli ti wotenga Ngewɔ gama.

²⁰ Kia na aa wie, mahoungɔ mu kɔlɔ nyɛi mu nde ti ma taa mɛhɛɛ gbi mɛ sawei ndei yɛ nɔhɔngɔe jifa ti kpuanga a saa nɔmɔliisia ma; ti joowi sɔɔ nyamu gbi ma; taa ŋama gbi mɛ ɔɔ fuuhani na ta lo ngi bolei liigbama i haa, ŋamɛi gbi i lo hu.

²¹ Ajifa hinda huguhangɔ va tiaa wɔɔ Mojisi Jawei gaama hɛɛ wɛleisia bu Ndɛvu Volo gbi ma, ta yɛpɛ nungaa gama kɔloongɔ ta ngi Mojisi ngi layieisia ma taa gbi hu.”

Kɔlɛi Lɔ Lima Nasia Gama Juu Yaa Tie Ti Langɔ A Yesu

²² Kɛ tobleisia tia kpakoleisia kɛɛ Yesu mableisia gbi ti hugbatɛnga loko lova nungaa lɛɛnga ma ti lia, ti ti lo Antiɔk tia Pɔɔl kɛɛ Banabasi-ni. Ti loko loilɔ Judas ma, ta toli a Basabas, kɛɛ Sailas, kɔɔnga felenga nasia ti langɔ a Yesu ti bagɔɔnga waa ti ma.

²³ Kɔlɛi na ti njooyoni a tie, ti nyɛilɔ hu tɛɛ, “Mua mu tobleisia kɛɛ kpakoleisia, wu ndewengeisia, mu va mu ndewengei nasia gbi ma ti ti leni Juublaa yaa tie ti Antiɔk kɛɛ Siria kɛɛ Silisia.

²⁴ Mu mɛninga kɛ nungaa ti gbuɛilɔ mu lia mbei ti li ti wu vawɔli, ti wu huyili a na ti ndeni wu ma; tawao muii vɛlini ti ma ji wieva.

²⁵ Famia mu gbi mu gomɛnga mu hugbatɛnga loko lova tutungaa ma mu ti lo wu gama. Ta lilɔ tia mu liima ndiamɔisia, Banabasi kɛɛ Pɔɔl,

²⁶ nasia ti ti lɛɛvui gbuanga ndɔgbɔ mu Lemɔi Yesu Kristi yengei va.

²⁷ Faale mua Judas tia Sailas loma, wua tieni wu hei yaama ti hinda yakpei nasia hugɛ a wue mu nyɛima kɔlɛi ji hu.

²⁸ Mua Ngewɔ Yafei-ni mu hugbatɛnga muɛɛ maa kaha weka gbi hei wu wumba kɛ lekee sawei jisia houla:

²⁹ waa mɛhɛɛ gbi mɛ ti kpuanga a saa nɔmɔlingaa ma; waa ŋama gbi mɛ; waa fuuhani gbi mɛ ta ngi bolei liigba, i haa, ŋamɛi i lo hu; tawao a joowi sɔɔ-nyamu gbi ma. A yɛlɔ a hinda yekpe wu pie ina wu joowiilɔ hindei jisia wiela ma. A mu kpɔkɔ-o.”

³⁰ Ti vɛlilɔ tutuisia ma kɛ ti ya Antiɔk, ti Yesu mableisia kpɛlɛɛ lɛma na, ti kɔlɛi ve ti wɛ.

³¹ Ji nungeisia ti yeekɔlɛi gaani, ti goohu i nɛɛlɔ hulewengɔ gbo ti lii vulu woowili va i yɛ hu.

³² Judas tia Sailas, tia bɛɛ Ngewɔ lutungaa a tie, tia ndewengei jisia ti lɛmbilɔ yɛpɛma, ta ti lii vulu, ta ti gbaya.

³³ Kia ti lɔwɔ lɛɛngaa gbɔyɔni na, ti ndewengeisia ti vɛlilɔ ti ma ndiilɛli hu, kɛ ti yamanga nasia gama ti ti loni. [

³⁴ Kɛɛ Sailas ndeilɔ yɛ i lomaa.]

³⁵ Pɔɔl tia Banabasi ti lɔwɔ lɛɛnga wieilɔ Antiɔk. Tia numu gboto wekangaa ti yɛlɔ a nungaa gaa, ta Ngowili Yekpei le kɔlooni Ndemɔi Yesu ma.

Pɔɔl Tia Banabasi Ti Luahu Lɔ Gɔlɛma

³⁶ Lɔwɔ lɛɛnga wooma Pɔɔl ndeilɔ Banabasi ma yɛ, “Mu gbɔma li mu foo mu ndewengeisia ma tei kpɛlɛɛ hu mu yɛpɛni na wɔɔ kɔlooni Ndemɔi Yesu ma, mu tɔ kia ti yee wienga.”

³⁷ Banabasi longɔ yɛla tia Jɔn Maaki-ni ti li,

³⁸ kɛɛ Pɔɔl ii gilini la kɛ pɔɔnangɔe liva a ngie, ajifa ii loni wɔɔ ti wooma taa foo ti yengei gɛlɛmɛi, i ti loni Pamfilia lɔ i yaama.

³⁹ Ti ndabla yagbalɛngɔ wieilɔ luahu, ti luahu i gɔlɛ. Banabasi i Maaki wumbuilɔ, ti wili njaya-lɛndɛi hu ti li Saipɔs,

⁴⁰ Pɔɔl bɛɛ i Sailas wumbu ti li, ti ndewengeisia ti ti loko wuaa Ndemɔi yeya ti mahaugbeevaa.

⁴¹ I jiɛilɔ i Siria lɔlei voo kɛɛ Silisia, a nasia lii gbaya ti langɔ a Yesu.