2 TƐSALONIKABLƐISIA 2 - Ngowili Yekpei Numu Kpɛlɛɛ Va

Sawa Nyanimɔi

¹ Kɔɔlooni mu Lemɔi Yesu Kristi yamalei ma mbei kɛɛ mu lɛla ma hinda yila aako mua tieni mu hei, nyaa wu manɛnɛma vulii, nya mbaa Kristimableisia,

² waa luma nasia ti ndema tɛɛ Ndemɔi wa-gbelei i hitinga taa wu nɛmahu baa. Tɛngaa kulɔmayia lemɔ mia i ji leni ɔɔ vaagɛmɔ, ɔɔ tɛnga ti gililɔla kɛ mua mia mu ji wuni kɔlɔ ma.

³ Waa luma numu gbi aa wu yaka kulo bɛɛ. Gbamaile Ndemɔi wa-Volei ɛɛ hiti kɛlee watii na numu gboto waa ta ganga a Ngewɔ, tawao Sawa Nyanimɔi a gbuanga, na Ngewɔ i wama ngi nyanima i ngi wili jahama.

⁴ Hanii kpɛlɛɛ kɛɛ ngafei gbi nungaa ta hɛɛ ma, yeenumui ji ɛɛ ti wumbu a gbɛogbɛ tawao a ta yekpe lɛlɔ ti gbi maahu. A wuaalɔ vulii bɛɛ Ngewɔ wɛlɛ bu i hei a nde a ndawɔlɔ nungaa ma yɛ ta lɔ Ngewɔ a ngie.

⁵ Ii loni wu nɛmahu? Ngi ji gbi leilɔ wu ma ji ngi yɛ wu lia.

⁶ Na hu gbi wu kɔɔlɔ gbɔɔ i Sawa Nyanimɔi gbangɔhu kiahuna. Ngi gbangɔi hu aako i gbuanga watii yekpe ma.

⁷ Kɛɛ kiahuna kpaya Lɔwungɔ Nyamulɔ yengema dunyei hu, i wama wiema ɛɛ wie kɛlee numui na ngi gbekpangɔ kulɔ i gbua na.

⁸ Watii na ma lɔ sawa nyanimɔi a gbuanga, tawao Ndemɔi Yesu a ngi waalɔ a ngi laavɛfɛi, i ngi nyani a ngi vooyii na numu yaama ɛɛ loo ma watii na a wa.

⁹ Sawa nyanimɔi a wa a seitana gbayei lɔ i ndɛɛ gabande hindei yeelasii kpɛlɛɛ wie kɛɛ ndɛɛ naali hugɛlei taa kanakoisia,

¹⁰ i nungeisia wɛlɛ a nyamu, nungei nasia ti wama jukuluma huɛɛŋ. Ta jukululɔ ajifa ti gangɛilɔ a lola a tɔnyɛi na a ti bawo.

¹¹ Sabui ji va Ngewɔ i ngafa nyamui yoyoma kɔɔ i ti huwu kɛɛ i pie ti ya a la a ndɛɛ yɛpɛisia.

¹² Yeehuvɛi a yɛ a ji lɔ kɛ nungei nasia gbi tii ya lani a tɔnyɛi kɔlooni Yesu ma tawao ti longɔ a jumbu hindei wiela, Ngewɔ a ti lɛɛlɔ.

Ngewɔ I Loko Longa Wu Ma Wu Bawova

¹³ Mahoungɔe mu yɛ a siɛgbua Ngewɔ ma kpele gbi wu va, mu mbaa Kristimableisia, wua mu Lemɔi longɔ a wue. Gbamaile yeetɔtoomɛi wɔɔ Ngewɔ i loko loilɔ wu ma yɛva a haalablaa mbawoyei majɔɔva, i pie ngi Yafei i wu yɛ a ngi woo, ajifa wu langɔ a tɔnyɛi.

¹⁴ Ngewɔ i wu loliilɔ yɛva a ngi woo a Ngowili Yekpei na mu ndeni wu ma; i wu loliilɔ aako wu mu Lemɔi Yesu Kristi wɔlɔyɛi wu ndɛi majɔɔ.

¹⁵ Faale na, mu mbaa Kristimableisia, a lo kpaŋ, wu hɛlɛ a tɔnyɛi nasia mu wu gaani la laahu kɛɛ kɔlɛi yeehaalayei na hu mu nyɛini wu gama.

¹⁶ Mu Lemɔi Yesu Kristi vulii, kɛɛ mu Kɛkɛ Ngewɔ, na i loni a mue tawao ngi yauwandei sabui hu i mu gɔni a ndiiloi na ɛɛ gɛlɛ kɛɛ hani yekpe mawulova a ndiilo,

¹⁷ i ndiilo laavengɔ ve wu wɛ, i wu liisia gbaya hinda yekpe gbi hu wa pie kɛɛ wa nde.