2 KƆLINTIBLƐISIA 6 - Ngowili Yekpei Numu Kpɛlɛɛ Va

¹ Mua Ngewɔ-ni mia mu yengema faale mua wu manɛnɛma wu ngauwandei na yayenge Ngewɔ i pienga a wue, hu aa nyani gbama.

² Faale Ngewɔ ndeilɔ yɛ, “Ji watii i hitini gbɔva wu ma, ngi wu woo mɛnilɔ, Ngi gbɔilɔ wu ma ji foloi i hitini wu bawo va.” A woolo! Watii ji lɔ Ngewɔ i gbɔma wu ma! Foloi ji lɔ Ngewɔ i wu bawoma!

³ Mu yengei ji mu piema, muii loni numu gbi i mu magbua, famia muɛɛ gbani yili numu gbi gulɔ.

⁴ Kia maa na wie, ma kɛlɔ mu wiehindei kpɛlɛɛ hu kɛ Ngewɔ yengeblaa lɔ a mue ji mu liilongɔ wa fawɔliisia hu kɛɛ hinda gbɔugbɔisia kɛɛ hinda gbangɔisia.

⁵ Ti mu lewenga ti mu wunga kpindi-wɛlei bu, kɛɛ sɔlɛisia kɛɛ ngamɔnɛisia, tawao ti njii-manii kɛɛ, ndɔlei wilinga mu ma.

⁶ Mu wiehindei sɛwɛsɛwɛyii kɛɛ mu Wowili Yekpei gɔɔyii kɛɛ mu liiloyii hinda gbɔugbɔu hu kɛɛ mu hindawanda wieyii, kɛɛ Ngewɔ Yafei va i mu hu kɛɛ ndoma yekpei mu piengɔ a nungaa wekeisia,

⁷ kɛɛ mu Wowili lɔnyangɔi kɛɛ Ngewɔ gbayei a kɛlɔ kɛ Ngewɔ yengebla lɔ a mue. Ma kɔi gɔ a mu jiayii yekpei lɔ, ma kɔi wɛlɛ la mu juwuisia ma, tawao ma mu magao la.

⁸ Nungaa lɛɛnga ta mu bɛlɛ nyanilɔ, pekeisia ta mu bɛlɛ hei; nungaa lɛɛngaa ta mu yia yekpe lelɔ, pekeisia ta mu yia nyamu le. Nungaa ti mu wumbuni a ndɛɛ gualablaa lɔ, kɛɛ ma tɔnyɛi lɔ le.

⁹ Tiaa ndema tɛɛ gbɛogbɛ yaa a mue kɛɛ numui gbi ti mu gɔɔlɔ; tɛɛ mu yɛ haama kɛɛ mu vulungɔe keya, wua vulii wuaa tɔma. Ta mu gbalɛlɔ nyamungɔ waa, kɛɛ muɛɛ haa;

¹⁰ kia bɛɛ ta mu lii nyani, mu goohu nɛngɔe watii gbi; mu wiengɔe kia fɛɛlibla ti na, kɛɛ mua piema numu gboto ta gbatɛ; mu wiengɔe bi tɔaa bɛɛ gbɛogbɛ ii mu yeya, kɛɛ a tɔnya, hani gbi lɔ mu yeya.

¹¹ Nya liima ndiamɔisia wu Kɔlinti, mu yɛpɛnga wu gama muii pɛlɛni nga; mu ndii gole gɛilɔ a wue.

¹² Muii ndii nyamu gɛni a wue; wua mia wu ndii nyani gɛni a mue.

¹³ Nga yɛpɛlɔ wu gama na kia nya goohu leengaa; a mu wumbu kia mu wu wumbungɔ la. A ndii gole gɛ a mue wua bɛɛ.

Ngewɔ Vulungɔe Wɛlei Lɔ A Wue

¹⁴ Waa lapi waa gbɔ hinda gbi ma wua nasia tii Ngewɔ gɔɔ bi tɔaa bɛɛ wu mahɔngɔe wua tieni, ajifa nyɔkɔ ɛɛ wie. Pɔɔna tia jumbu ta yee gu ti yɛ a mbaangaa? Foofo taa kpindi ta yee makpɔ ti hei hinda yakpe?

¹⁵ Kristi taa Seitana ta yee ngooyila wie? Kristimamɔi taa numui na ii lani a Kristi ti yɛyii i yee yɛni yila?

¹⁶ Ngewɔ wɛlei taa nɔmɔliisia ta yee makpɔ hinda yila? Gbamaile mua lɔ Ngewɔ vulungɔe wɛlei a mue! Kia Ngewɔ vulii i ndeni la yɛ, “Nga heilɔ nya nungeisia lia nga lewetewe ti lia; nga yɛlɔ a Ngewɔ na ta ngi vɛli, tawao ta yɛlɔ a nya woo.”

¹⁷ Famia Ndemɔi i ndenga ngi nungeisia ma yɛ, “Wa gbɛle lɔ yee nungei nasia ma, wua tieni wu luahu i gɔlɛ. Waa gbiti hani gbi ma na nɔhɔngɔ nya yaama, wu na wiengaa nga wu gululɔ.

¹⁸ Nga yɛlɔ a wu Kɛkɛ, tawao wa yɛlɔ a nya hingaleengeisia kɛɛ nya nyahaleengeisia, hii ngi ndeni, nya Ndemɔ wai a nge.”