2 KƆLINTIBLƐISIA 4 - Ngowili Yekpei Numu Kpɛlɛɛ Va

Nuuvu Hawayii Kɛɛ Ngewɔ Gbayei

¹ Ngewɔ i manunga mu ma i ngengei ji venga mu wɛ pieva, muɛɛ gbe a piela.

² Mu loko gbi ii ngufema hindangaa wiela hu ndɔwuma, muɛɛ kaasoo hinda wie, muɛɛ ndɛɛ guala Ngewɔ Wowili Yekpei lela hu. Ngewɔ lɔ mu jeli le kɛ ma Ngowili Yekpei yeetɔnyɛi lekee lɔ le fofoya tawao mu lii lɔ ma kɛ numui gbi ta kili yekpe wielɔ a mue.

³ Gbamaile ina Ngowili Yekpei ji ma nde ndɔwungɔe, kɛ ndɔwungɔ lekee nasia lɔ ma ti jukuluma.

⁴ Tii lani a mu Wowili ajifa Seitana, dunyei yeengewɔ nyamui, i pienga tɛɛ gu a yeembui gɔla. A pielɔ tɛɛ fofoi na lɔ i vooma ti ma, foofoi na a gbua Ngowili Yekpei hu kɔlooni Kristi wɔlɔyɛi ma, na Ngewɔ gbuayei a ngie.

⁵ Muii yɛpɛma kɔloongɔ mua yekpe ma; mu Lemɔi Yesu Kristi lɔ mu yɛpɛma kɔɔlongɔ ngi ma, mu yɛngɔ a wu yengeblaa jifa mu toma Yesu lɔ ma.

⁶ Ngewɔ na i ndeni yɛ, “Fofoi a voolɔ i gbua kpindi hu!” yee Ngewɔ yakpei ji lɔ i pieni ngi voofoi i voo mu liisia hu, pieva mu Ngewɔ nɔlɔi na gɔɔ i vooma Kristi yaumbui ma.

⁷ Kɛɛ mua Ngewɔ Yafei yeekpatɛi ji i mu yeya, mu wiengɔe kia pɔlɔ-vɛɛngaa gbama ti na, kɛva kɛ kpayei na tewengɔ kpɛlɛɛ ma i Ngewɔ lɔ wɛ, mua ii le.

⁸ Nungaa lɔ kpalɛ lama mu ma pɛɛpɛ, kɛɛ na ɛɛ pie mu gbe mu yengei ma; mu kitingɔe watii lɛɛnga, kɛɛ muɛɛ gbe mu yengei ma;

⁹ nungaa ta mu yakpelɔ, kɛɛ Ngewɔ ɛɛ gbele mu ma; tawao ta mu nɛɛmulɔ waa ti mu gula watii lɛɛnga ma kɛɛ tɛɛ mu waa.

¹⁰ Watii gbi lekee hee na Yesu i pieni taa hɛlɛni mu mahu tawao ji vulii mu vulungɔ lɛ a kɛlɔ kɛ Yesu bɛɛ ngi vulungɔe.

¹¹ Kia bɛɛ mu vulungɔ, hee lɔ hɛlɛni mu maahu watii gbi Yesu va, tawao ji vulii mu vulungɔ lɛ a kɛlɔ kɛ Yesu bɛɛ ngi vulungɔe.

¹² Ji a kɛlɔ kɛ hee lɔ hɛlɛni mu toblɛisia mahu tawao ji lɔ i pienga wu ndɛvu majɔɔnga.

¹³ Nyɛingɔe Ngewɔ Gɔlɛi hu tɛɛ, “Ngi Ngewɔ yiɛi leilɔ nungaa ma jifa nya langɔ a Ngewɔ.” Hii mua bɛɛ mu langɔ a Ngewɔ famia ma Ngowili Yekpei le.

¹⁴ Jifa mu kɔɔlɔ kɛ Ngewɔ na i Yesu vuluni i ngi wumbu hee hu, a mua bɛɛ wumbulɔ hee hu kia i pieni a Yesu, i li a mua wieni Yesu gama.

¹⁵ Ji kpɛlɛɛ i mu wiema wu va lɔ; tawao kia Ngewɔ yauwandei i piema a nungaa mato lekee, nungaa ta siɛgbua hɛɛ mato wielɔ, Ngewɔ wɔlɔ va.

Kristimamɔi Luvayii Ngi Lanayeihu A Ngewɔ

¹⁶ Sabui ji valɔ muɛɛ gbaha. Kia bɛɛ mu luwui i nyanima kulokulo, mu lii lɔ ninama folo gbi.

¹⁷ Kpalɛi jisia ta la mu ma ti mumungɔe tawao ti hugutungɔ ina mu gilingaa a na i wama; ajifa ta walɔ mu wɛ a hani lakpa waa tewengɔ kpalɛi nasia ma, hani na a yɛ mu yeya kunafɔ, tamia a kunafɔ lɛɛvui Ngewɔ gama.

¹⁸ Faale mu lii ii looni dunyama hani nasia ma numu a gu a tɔla kɛlee ngelegoohu hanii nasia muɛɛ gu a tɔla. Ajifa hanii nasia ma gu a tɔla tɛɛ lɛmbi, kɛɛ nasia muɛɛ gu a tɔla, ta yɛlɔ na kunafɔ.