2 KƆLINTIBLƐISIA 3 - Ngowili Yekpei Numu Kpɛlɛɛ Va

Hinda Yangilingɔ Ninɛi Yeengengeblaa

¹ Njɛpɛi na ngi nyɛinga saange ii kɛni kɛ mua lawoma gbɔma a mua yekpe. Muii gbeweni kɔlɔngaa va mu magonava wu ma tawao muii gbeweni kɔlɔngaa va wu yeya mu magonava Kristimablaa wekangaa ma kia nungaa lɛɛngaa ti na.

² Wua vulii lɔ mu magona gɔlɛi a wue, nyɛingɔ mu liisia ma numui gbi va ti kaa ti kɔɔ.

³ I laailɔ ke kɛ Kristi vulii lɔ i yeekɔlɛi ji nyɛini, i njooyo a mue. Ii nyɛini a loko kɛlee, kɛ Ngewɔ vulungɔi Yafei, tawao ii nyɛini kɔtu magbatɛngɔ ma, i yɛ nuuvungaa ti liisia ma lɔ.

⁴ Mua ji lema ajifa mu langɔwa a Ngewɔ, Kristi sabui hu.

⁵ Gbɛogbɛ i mu hu na a pie mu yongalewe, kɛ mua ma gulɔ mu gengei nasia wie. I kpayei na mu yeya i gbuani Ngewɔ gama lɔ;

⁶ Ngewɔ lɔ i pienga mu gunga a yɛla a ngengeblaa ngi wɛ hinda yangilingɔ nina hu, na ii yɛni a sawa nyɛingɔ kɛ Ngewɔ Yafei. Sawa nyɛingɔi a wa a hee lɔ numu yafei va kɛɛ Ngewɔ Yafei a wa a ndɛvui lɔ.

⁷ Sawei nyɛini kɔtu magbatɛngɔi lɔ ma, tawao watii na i feni, Ngewɔ nɔlɔi i gɛilɔ foofo gbayangɔ waa hu. Mojisi yaumbui i yɛlɔ a voo a Ngewɔ nɔlɔi na i hulɔni tawao kia bɛɛ mahu i yɛla a gbua, kpayangɔ waa yɛlɔ na hii i Isrɛlbleisia ti yaama ii yɛ gu aa lo ngi yaumbui ma. Ngewɔ nɔlɔi yeefoofo wai i gɛilɔ watii na Sawei ji a wa a hee i yɛ vema Mojisi wɛ,

⁸ kɛ Ngewɔ nɔlɔi yeefoofo wai i leweilɔ polouŋ na ma watii na Ngewɔ hinda yangilingɔ ninɛi na yeendii a Ngewɔ Yafei i wani.

⁹ Gbamaile ina Sawei na a wa a numu yafei haala ngi wala wɔlɔngɔ yɛla hii, Ngewɔ Yafei na a pɔɔna vɛ numu wɛ ngi walei a yɛ wɔlɔni kpa!

¹⁰ Ma ndelɔ hɔɔ muɛɛ ji na ngɔlɔyɛi yeembawai i wanga, ngɔlɔyɛi na wɔɔ i yɛ voo ngovama i gbɔyɔnga.

¹¹ Gbamaile ina ngɔlɔya i yɛlɔ hinda yangilingɔ wovei na hu ii lɛmbima, ngɔɔlɔya a yɛ kpa hinda yangilingɔ ninɛi na hu i yɛma na kunafɔ va!

¹² Jifa mu lii valamɛi ji i na, ma yɛpɛlɔ a ngaulewe waa.

¹³ Muii wieni kia Mojisi i na, i kulei wɛlɛni wumba aako Isrɛlbleisia taa fofoi gbɔyɔmɛi lɔ ngi yaama.

¹⁴ A tɔnya ti nɛmahuisia laagbɔungɔ yɛla tii yeembui gɔɔni, tawao i to foloi ji vulii ma, kulei na wɔɔ Mojisi pɛlɛni wumba, pɛlɛngɔe ti nɛmahuisia ma ji ta yɛ hinda yangilingɔ wovei yeekɔlɛisia gaama. Na lekee a kulɛi na gbule tamia a ji numu a yɛ a Kristimamɔ.

¹⁵ Foloi ji bɛɛ, watii gbi ti Mojisi Jawei gaangaa, kulei lɔ lɛ wɛlɛni ti nɛmahuisia ma.

¹⁶ Kɛɛ numu i wotengaa Ndemɔi gama, kulei na a gulelɔ ngi yaama.

¹⁷ Kiahuna, Ndemɔi lɔ Ngafei le; tawao mia lekee gbi Ndemɔi Yafei i na, mbawo lɔ na.

¹⁸ Mu kpɛlɛɛ, kula gbi ii wɛlɛni mu yaama, ma Ndemɔi nɔlɔi lɔlɔ; tawao yeenɔlɔ yakpei ji i gbuama Ndemɔi na gama, Ngewɔ Yafei a ngie, a mu maluvelɔ mu gbua a ngie, ngi nɔlɔi i ya a mato mu ma.