2 KƆLINTIBLƐISIA 11 - Ngowili Yekpei Numu Kpɛlɛɛ Va

Pɔɔl Taa Toblaa Yeendɛyeisia

¹ Nyaa wu manɛnɛma ngɛɛ nya luvayii i gu wu hu, ngi kpowa hinda wulo bɛɛ wie. Kɔnɛɛ bɛɛ le!

² Nyaa wu malolo gbuama kia lɔɔ Ngewɔ i piema; wu wiengɔe kia mbɛlɛhu-nyahɛi na i na, ngi Lahei wumbunga feva hindo yekpe wɛ a ngi nyaha, yeehindoi lɔ a Kristi vulii.

³ Kɛɛ nya liihɛlɛngɔe ngɛɛ na wɔɔ i Iiv wieni aa wu wie. Kali gasongɔ yɛla tawao i pielɔ Iiv i jumbu hinda wie. Wua bɛɛ ta wu wuhu nyanilɔ hii, wu gbe a lola a Kristi yakpe.

⁴ Ajifa numu gbi lekee a wa wu gama a Yesu weka hinda hugɛ i gba na ma mu ngi hinda hugɛma, wa loko heilɔ ngi bu a kohunɛ; tawao wa ngafa kɛɛ ngowili gululɔ ti gba polouŋ Ngewɔ Yafei kɛɛ Ngowili Yekpei na ma, wu majɔɔni a mue!

⁵ Kɛɛ nungei nasia wu ti wumbungɔ a Ngewɔ lutu waawangaa tii leweni nya ma kulo bɛɛ.

⁶ Kia bɛɛ nya laahu ii leweni a yɛpɛla, ngi Wowili Yekpei na gɔɔlɔ pandawanda nga nde wu ma tawao nya langɔ la wu ji gɔɔlɔ na ajifa mu pienga leiŋ wu gama kaka a pelei gbi.

⁷ Ngii hani gbi gbuani wu yeya ji ngi Ngewɔ Ngowili Yekpei leni wu ma; ngi nya yekpe mayeilɔ kɔɔ baagɔma i yɛ wu ma.

⁸ Watii na ngi yɛ yengema wu lia Kristimablaa wekangaa lɔ ti yɛ nya pawa. Nga gulɔ a ndela kɛ ngi ti humɛilɔ aako ngi gbɔ wu ma.

⁹ Tawao watii na ngi yɛ wu gama ngi gbeweilɔ navoo va kɛɛ ngii wɛlɛni wu ma gbɔva nya ma; mu mbaa Kristimablei nasia ti gbuani Masidonia lɔlei hu ti wailɔ a hani kpɛlɛɛ nya gbewengɔ yɛla fa. Kia lɔɔ wɔɔ nga pie, hii ngi loma piema; ngɛɛ kaha gbi la wu wumba.

¹⁰ Kristi a tɔnyɛi lɔ wɔɔ le watii gbi tawao yeehinda yakpei mia ngi piema ji ngi ndema ngɛɛ matɛi ji ngi kpuama a wue navoo hindei va, numu gbi ɛɛ gu aa pie ngi gbe a kpuala Akaya lɔlei hu gbi.

¹¹ Ngi ji lemaa jifa ngii loni a wue? Ngewɔ kɔɔlɔ kɛ nya lɔnyangɔe a wue.

¹² Na ngi piema kiahuna nga yɛlɔ a pie, tawao ngɛɛ hani gbi hou wu yeya fa, ngii loni nasia wu ti wumbungɔ a Ngewɔ lutu waawangaa ti sabu gbi jɔɔ lawova tɛɛ ti yengema a pelei na lɔ nga pie la.

¹³ Gbamaile ndɛɛ lutungaa lɔ a numu bondɛi nasia, ta ndɛi guala kɔlooni ti yengei ma, ta tia yekpe maluve aako ti gbua a Kristi loblaa yekpeisia.

¹⁴ Na ɛɛ gɔla numu gbi ma! Jifa Seitana vulii bɛɛ a ta yekpe maluvelɔ a malikei na a voo.

¹⁵ Faale ɛɛ gɔla numu ma ina ngi yengebleisia ti tia yekpe maluveilɔ ti gbua a pɔɔnamɔi yengebleisia. Kɛlɛmɛi, Ngewɔ a ti hinda nyamuisia yeekpalɛi lɔ la ti ma.

Kpalɛi I Lani Pɔɔl Ma Tomɔyɛi Va

¹⁶ Nyaa wu manɛnɛma gbɔma: waa gili la kɛ ngi gbowangalɔ ji ngi yɛpɛma hii. Kɛɛ wu gili bɛɛ hii, mahoungɔe ngi lo kpowɛi hu wu woolo nya ma aako hinda wulo i yɛ na nya bɛɛ nga lawo la kia ti piema.

¹⁷ A tɔnya ndawoei ji nyɔkɔ ii le Ndemɔi aa nya lo piema ajifa nyaa hindei wiema kia kpowamɔ vulii.

¹⁸ Kɛɛ jifa numu gboto lɔ miando ta lawo wu gama tɛɛ ti gabandengɔ waa le a dunyama hanisia, gbɛɛ nya bɛɛ ngi laawo:

¹⁹ wua vulii wuɛɛ wu nɛmahulewengɔ, famia wa woolo kpowablaa ma a kohunɛ!

²⁰ Ajifa a gulɔ wu hu ji nungaa ta wu wote a ti luwɔngaa ɔɔ ta wu yeyahani kpɛlɛɛ mɛ ɔɔ ta wu gava ɔɔ ta lɛɛ wu hu ɔɔ ta wu baama gbolɛ.

²¹ Nya wufengɔe lumava ma kɛ kaahu ii yɛ mu ma kɛɛ ndiilo hinda bondɛi nasia wieva! Kɛɛ na gbi lekee ta liilo ti lawo la nyaa gbɔma yɛpɛma kia kpowamɔ nya bɛɛ nga liilolɔ ngi laawo la.

²² Kia lɔɔ Hibublɛisia a tie, hii ngi na. Kia lɔɔ Isrɛlblaa a tie, hii ngi na. Kia lɔɔ Ebraham bɔɔsɔɛisia a tie, hii ngi na.

²³ Ina Kristi yengeblaa lɔ a tie nya layie gbuangɔe a kpowa yia kɛ Kristi yengemɔ yekpe lɔ a nge i lewe ti ma! Ngi yengenga kpayangɔ tewengɔ ti ma, ti nya wunga kpindi-wɛlei bu kpotongɔ i lewe ti ma, ti nya lewenga kaka i lewe ti ma tawao hee i hɛlɛnga nya maahu pɛɛpɛ i lewe ti ma.

²⁴ Juubleisia ti mahublɛisia ti ndewe numu gbɔyɔngɔ maahu puu maahu taalui veilɔ mbɛ heima lɔɔlu.

²⁵ Heima sawa Rom mahangeisia ta nya lewe a nguliisia; heima yila nungaa ta lapi nya waava a ji ti yɛ nya hɔwɔhɔwɔ a kɔtiisia. Njaya-lɛndɛi i lɔmbunga a nge gboyei hu heima sawa, tawao heima yila ngi luveilɔ gboyei hu kpɛiŋ, ngi yii hu kpindi yila kɛɛ folo yila.

²⁶ Jia kpoto hu ngi kanga, kpundɛngaa ti hɛlɛnga nya maahu njaveisia hu, kɛɛ humablaa yeya, kɛɛ nya mbaa Juubleisia kɛɛ nasia Juublaa yaa tie. Kpundɛngaa ti hɛlɛnga nya maahu taa waawaisia hu kɛɛ ndɔgbɔ lambɛisia ma kɛɛ gboyeisia ya kɛɛ nungei nasia ti yɛ nde tɛɛ Kristimablaa lɔ a tie kɛɛ tii yɛni la.

²⁷ Ngi yengenga kpayangɔ waa nya gahu i gbɔyɔnga; njii gboto i nyaninga nya ma; ndɔlɛ gboto i nya lɔnga tawao nya bolohu a be; watii gboto ngii yɛ gu mɛhɛɛ ma kɛɛ njiima kɛɛ kula ngiliva.

²⁸ I baa ji kpɛlɛɛ ma kɛɛ pekangaa, ndiihɛlɛ minimini lɔ nya ma Tuuŋ Kristimablei nasia gbi va ti heiheini hu gbi.

²⁹ Kristimamɔ yila i yɛngaa nyɔngɛ, nya bɛɛ nga yɛlɔ nyɔngɛ; Kristimamɔ yila i wilingaa jumbu hu, nya lii a nyanilɔ waa.

³⁰ Ina kpɔndangɔe nya ma lawova, nga laawo a hindei nasia lɔ ta nya vakaleweyii gɛ.

³¹ Mu Lemɔi Yesu ngi Yewɔɛi kɛɛ ngi Kɛkɛ na numui gbi ta ngi lato kunafɔ i kɔɔlɔ kɛ ngii ndɛɛ gulama.

³² Ji ngi yɛ Damaskɔs, gɔvinei na i yɛ yenge Mahɛi Aritas bu i sojeisia loilɔ yee tei lamɛisia gbi aako ti nya hou.

³³ Kɛɛ nya mbaa Kristimableisia ti nya gbuɛilɔ tei hu a gɔlɛi yeefolemɛi wee ti nya yei bɛki hu ngi lɔwu ngi yeya.