2 KƆLINTIBLƐISIA 10 - Ngowili Yekpei Numu Kpɛlɛɛ Va

Pɔɔl Gbayei Yɛva A Tomɔ

¹ Nya, nya Pɔɔl nya vulii lɔ naa wu manɛnɛma. Nungaa lɛɛnga lɔ ndema tɛ ngi yɛngaa wu lia nya luwangɔ a yɛla a yɛpɛla, kɛɛ nya maa i guhangaa kɛ ngi ndiiloi wienga. Nya longɔ nya mayeingɔ i yɛla tawao nya hindawandangɔ kia Kristi i yɛ na.

² Faale nyaa wu manɛnɛma, waa pie ngaa yaa wu gbalɛ ji nga foo wu ma! Ngi kɔɔlɔ kɛ nga gulɔ a ngagbalɛ hinda wiela a nungei nasia ti ndema tɛɛ nya layieisia kɛɛ nya wiehindeisia ti yɛni a dunyamamɔ gbama nda lɔ.

³ Tɔnya le kɛ mua dunyei ji hu kɛɛ muii jiama a dunyama nɛmahulewe mu gɔisia vayava.

⁴ Kɔhakei nasia ma lapi la tii yɛni a dunyei nda gbatɛngɔisia, ti yɛni a Ngewɔ gɔ-hani gbayangɔi nasia lɔ ma gɔlɔ gbayangɔngaa wongoo la.

⁵ Mamani mawali gbi nungaa ta hou kɛɛ gbani gbi ta ngili aako nungaa taa Ngewɔ gɔɔ, yeekɔ-haakei jisia ta gulɔ a hunyanila. Nasia ti gangangɔ a Ngewɔ, ma ti giliyii houlɔ a yeekɔ-haakɛi jisia, mu yama a tie Ngewɔ gama mu ti yɛ a nungei nasia ti liima a yɛ a golola Kristi lɔ wɛ.

⁶ Ma yeekɔ-haakɛi jisia yayengelɔ kangamɔ gbi ma a lo, ji wua yese vulii wa kpɔyɔ a golola pandawanda.

⁷ Na i wu mɔnɛngɔ tamia a ji wu hindeisia gbema a mahu we kɛɛ wuii mbu gɔɔ. Ina numu gbi ngi gilingɔe la kɛ Kristi woo lɔ a ngie, i gili gbɔma a ta yekpe ajifa Kristi woo lɔ a nge kia lɔɔ yeenumui na i na.

⁸ Mu Lemɔi Yesu Kristi i kpaya venga mu wɛ wu maahu kɛɛ wu nyaniva ii le; wu gbekpeva le, tawao kiaa bɛɛ nga lawolɔ a yeekpayei ngi pili kulo kaalɛ wooma, ngɛɛ wufe.

⁹ Ngii loni wu gili la kɛ nyaa lapima wu huluwava a nya gɔlɛisia.

¹⁰ Ajifa nungaa lɔ ndema tɛɛ, “Pɔɔl maguhangɔ yɛla a njɛpɛ yagbalɛngɔ lekee lɔ le mu ma ngi gɔlɛisia hu, kɛɛ i fonga mu ma baagɔma yekpe gbi ii ngi ma tawao gbɛogbɛ ii ngi layie hu.”

¹¹ Mahoungɔe nungaa bondɛi nasia ti kɔɔ kɛ na lɔɔ ma nyɛi kɔlɛi nasia hu nga nyɛi wu gama, ta lɔ nga pie ji nga wa wu gama.

¹² Ɛɛ hitɛ mu wɛ kulo bɛɛ ndeva muɛɛ mu mahɔngɔe mua nungei nasia ta tia yekpe lɛ ɔɔ mu huma ti ma. Ti gbowani kpa! Ta tia yekpe huma ti nyɔunyɔ lɔ ma tawao tia yekpe lɔ ta ti gɛlɛmɛi na gɛ a bɛ ti ma.

¹³ Na hu gbi muɛɛ lawo maa pili kaalɛ wooma; ma gɛlɛ kaalɛi na goohu lɔ Ngewɔ i na venga mu wɛ yengeva na tawao wu yeekaalɛi goohu lɔ.

¹⁴ Jifa wu yeekaalɛi ji goohu lɔ, muii windɛni kaalɛ wooma ji mu wani wu gama a Ngowili Yekpei ndalongɔ Kristi ma.

¹⁵ Faale muɛɛ lawo a ngengei na nungaa wekangaa ti pienga kaalɛi nasia wooma Ngewɔ i feni mu wɛ. Na mu lii i ma ta lɔ a ji wu lalei a Kristi a gbaya aako mu gu a ngenge jɛmbɛ wiela wu lia tewengɔ yeengovei ma, watii gbi mu kaalɛi na goohu Ngewɔ a kɛ a mue.

¹⁶ Na wiengaa ma gulɔ a Ngowili Yekpei lelaa ndɔlɔ wekangaa hu ti ma guhangɔ tawao muɛɛ lawo a ngengei na ti wilanga a piela numu weka nda gakamɛi.

¹⁷ Kɛɛ kia Ngewɔ Gɔlɛi i ndeni la yɛ, “Numu gbi lekee ngi longɔ i lawo, i laawo a na Ndemɔi i pienga.”

¹⁸ Ajifa ɛɛ nasia gulu ta tia yekpe lato, Ndemɔi a nasia lɔ gulu ta vulii a ti lato.