1 TIMOTI 4 - Ngowili Yekpei Numu Kpɛlɛɛ Va

Ndɛɛ Gaamɔɛisia

¹ Ngewɔ Yafei lɔ ndema leiŋ yɛ nungaa lɛɛngaa ta gbelɔ a lala a Ngewɔ kɛlɛma voleisia ma; ta gololɔ ndɛɛ gula yafeisia wɛ, ti ngafa nyamuisia ti gaaisia wumbu.

² Nasia ti yeekaa bondɛi nasia vayama hu tia mia a ndɛɛ gulablɛi nasia ta nungaa wɛlɛ, ti nɛmahugiliyeisia hu haangɔ, bi tɔaa bɛ ti mɔngalɔ a kɔlu gbɔlii.

³ Numu bondɛi nasia mia ta nungaa gaa tɛɛ hinda nyamu le nyaha ɔɔ hini jɔva kɛɛ mɛhɛɛ lɛɛngaa mɛva. Kɛɛ Ngewɔ i mɛhɛɛi nasia gbatɛni mɛva lɔ, ji nasia ti langɔ a ngie tawao ti tɔnyɛi gɔnga ta siɛgbua pɛiŋ ngi ma hɛɛ hu.

⁴ Hani gbi Ngewɔ i kpatɛnga kpekpengɔe; maa ii houni numu i gbele hani gbi ma tawao mahoungɔe bi siɛgbua Ngewɔ ma hɛɛ hu hani gbi va ba majɔɔ,

⁵ ajifa Ngewɔ layie kɛɛ hɛɛ na ba pie tia mia ta pie Ngewɔ i yeemɛhɛi luba.

Yesu Kristi Ngi Yengemɔ Yekpei

⁶ Bi ndahii jisia vengaa mu mbaa Kristimableisia wɛ, ba yɛlɔ a Yesu Kristi yengemɔ yekpe, kia ba bi yafei makɛ a kaai nasia mu langɔ la kɛɛ tɔnyɛi nasia bi toma poma.

⁷ Kɛɛ bia yekpe maguha a nasia tii Ngewɔ gɔɔ ti dɔma gbamɛi nasia tii nyandeni hugɛva. Ya a bia yekpe makɛ aako bi luvayii i nɛɛ Ngewɔ wɛ.

⁸ Gaahu loliisia ta numu nafalɔ kulo, kɛɛ numu yafei yayengelɛi nafa lɔ hu a pelei gbi, ajifa ndɛvui a jɔlɔ hu kiahuna va kɛɛ kulɔmɛi kɛyila.

⁹ Tɔnya yia lɔ a ji mahoungɔ kuluva a loko veenjɔɔ kɛɛ lava la.

¹⁰ Ma lapilɔ mu yenge kpayangɔ ajifa mu lii valanga Ngewɔ vulungɔi ma, na a numui kpɛlɛɛ bawo kakayee nasia ti langɔ a ngie.

¹¹ Ndahii jisia ve ti wɛ kɛɛ kaai jisia.

¹² Baa luma numu gbi aa lɛɛ bi hu jifa ndopo a bie, kɛɛ yɛ a tɔmaseli Kristimableisia ta pookɔɔ, bi yɛpɛyii hu kɛɛ bi luvayii kɛɛ bi loyii a Ngewɔ kɛɛ nuuvungaa, kɛɛ bi layii a Ngewɔ kɛɛ bi sɛɛsɛɛyii Ngewɔ yaama.

¹³ Haaŋ i lohu ngi wa, bi magbewei gbi la bi wote Ngewɔ Gɔlɛi gaala leenga faha hu, kɛɛ Ngewɔ yiɛi lela kɛɛ nungaa gaala.

¹⁴ Baa Ngewɔ Yafei na gbua kɛwɛ i bi hu, na Ngewɔ i feni bi wɛ gbama ji ngi lutuisia ti yɛpɛni bi gama, kɛɛ kpakoleisia ti ti lokoisia wɛlɛni bi ma.

¹⁵ Yɛ a hindei jisia wie, tawao bi bi lii kpɛlɛɛ wu na, aako numu gbi lee ti tɔ kɛ bia lɛma gulɔma.

¹⁶ Bia yekpe yabɛɛ kɛɛ bi gaaisia.