1 TIMOTI 2 - Ngowili Yekpei Numu Kpɛlɛɛ Va

Ngewɔ Vɛlilei

¹ Haala hinda, nyaa wu manɛnɛma kɛ wu yaa kponyɛ wiema Ngewɔ gama wa hɛɛ, wa ngi mɔli hinda gbi va ɔɔ wa siɛgbua Ngewɔ ma, a kpɛlɛɛ wie numui gbi va dunyei hu;

² mahangeisia va kɛɛ nasia gbi ti mu maahu, aako mu yɛ heini ndiilɛli hu fawɔli gbi ii mu ma, mu bagɔnga Ngewɔ ma, tawao ma tuvei nasia wie a nɛɛ ngi wɛ.

³ Ji mia nyandengɔ tawao a nɛɛ mu Bawomɔi Ngewɔ wɛ,

⁴ na ngi longɔ numui gbi ti bawo ti ngi lɔnyɛi gɔɔ.

⁵ Gbamaile Ngewɔ yakpe, tawao numu yila lɔ na, na a pie Ngewɔ taa nuuvungaa ti hu i kpɔ, yeenumui mia a Yesu Kristi,

⁶ na i ta yekpe veni nuuvungaa wumawova. Namia seli le a watii na mbɛngɔ ma kɛ Ngewɔ longɔ numui gbi ti bawo,

⁷ tawao na vamia Ngewɔ i nya loni yɛ va a tomɔ kɛɛ Kaamɔ nasia va Juublaa yaa tie, aako ngi ngowili na le leiŋ kɔlooni lanayei ma a Ngewɔ kɛɛ tɔnyɛi. Tɔnyɛi mia ngi ndema; ndɛɛ yaa na ngaa yɛ kualama

⁸ Watii gbi wu gomɛngaa Ngewɔ vɛliva, nya longɔ hingeisia ti yɛ a hɛɛ, hingei nasia ti tia yekpe vengɔ Ngewɔ wɛ, ta loko lɛ ngeleya ji ta yɛ hɛɛma, tɛɛ liilewe tawao tɛɛ ndabla wie.

⁹ Nya longɔ gbɔma nyahangɛisia ti mayili yekpe wie tawao ti nɛmahulewe wie kɔlooni ti magulɛisia ma, tawao ti ya a tia yekpe mayili a pelei na a bɛ ma; taa ti wundie gbatɛ a voo dauŋ, taa kaningaa yili kpatɛngɔ a kanigbɔlu ɔɔ kɔtu jɛŋɛɛjɛŋɛɛngaa ɔɔ maayili baagbangɔngaa,

¹⁰ kɛɛ ti tia yekpe mayili a hinda yekpengaa wiela, kia mahoungɔ nyahangɛi nasia va ta nde tɛɛ tiaa Ngewɔ vɛlima.

¹¹ Mahoungɔ nyahangɛisia ti gaa ndondohu tawao ti tia yekpe mayei.

¹² Ngii lumani nyaha gbi wɛ hinga gaava ɔɔ yɛva ti maahu, mahoungɔ ti maa i yɛ louŋ.

¹³ Gbamaile Ngewɔ i Adam yese gbatɛni i yaa Iiv gbatɛ.

¹⁴ Tawao Adam ii le Seitana aa ngi wɛlɛ; nyahɛi mia Seitana i ngi wɛlɛni i Ngewɔ jawei nyani.

¹⁵ Kɛɛ ndoo lelei a pielɔ nyahɛi i mbawo majɔɔ, ina i nɔɛilɔ lala ma a Ngewɔ kɛɛ ndoma wiela kɛɛ kayema hinda wiela kɛɛ ta yekpe mayeila.