1 TƐSALONIKABLƐISIA 4 - Ngowili Yekpei Numu Kpɛlɛɛ Va

Tuvei Na A Nɛɛ Ngewɔ Wɛ

¹ Mu mbaa Kristimableisia, gbɛɛ ngi ji le njɛpɛi ji yakpuava: mu kɛilɔ a wue wa yee luva na a nɛɛ Ngewɔ wɛ. Tawao yeetuvei mia wɔɔ wu piema. Kiahuna na mua wu manɛnɛma Ndemɔi Yesu biyɛi hu yeetuvei na mato wieva.

² Wu na gɔɔlɔ mu ndeni wu ma pieva kia Ndemɔi Yesu i puni mu laa ndeva.

³ Ngewɔ longɔ wu luva a pelei na a kɛ kɛ Ngewɔ woo lɔ a wue, wu loko gbi ii puegbua hinda hu.

⁴ Mahoungɔ wu yilayee gbi i kɔɔ kia mahoungɔ i ta yekpe houla puehinda hu mbɛlɛya hu kɛɛ pelei na a nɛɛ Ngewɔ wɛ,

⁵ tii yɛma sɔɔ-hinda lekee i gbewe wu ma kia nungei nasia ti na tii Ngewɔ gɔɔ.

⁶ Faale Nyahajɔɔ hindei hu, numu gbi aa ngi mba Kristimamɔ gava kulo bɛɛ. Mu ji lenga wu ma ngovama tawao mu wu laahilɔ kpɔtukpɔtu kɛ Ndemɔi a kpalɛ lalɔ nasia gbi ma ta na wie.

⁷ Ngewɔ ii mu lolini heiva a puegbuala, i mu lolini luvava lɔ kia nungei nasia na ngi woo a tie.

⁸ Faale na, numu gbi lekee a gbele kaai ji ma, ii gbeelema nuuvu lɔ ma kɛ Ngewɔ na a ngi Yafa Yekpei ve wu wɛ.

⁹ Sabu gbii na kɔlɔ nyɛiva wu gama kɔɔlooni ndomɛi na ma mahoungɔ wu pie a wu mbaa Kristimableisia. Ngewɔ i wua vulii gaanga kia wa yee lo a wu nyɔunyɔ.

¹⁰ Tawao a tɔnya, hii wu pienga a Kristimablei nasia gbi ti Masidonia lɔlei hu gbi. Faale, mua wu manɛnɛma, mu mbaa Kristimableisia, wu mato wie.

¹¹ A wu lii huyili waa loko wili ndabla hu ɔɔ sɔlɛ, wu woo i yɛ wu nda hindei lekee ma, tawao a yenge a gahu hanii nasia majɔɔva wa gbewe fa kia mu ndeni la wu ma.

¹² Ji lɔ a wie nasia tii lani a Ngewɔ ti baa gɔɔ wu ma, tawao waa hɛlɛ a numu gbi hanii nasia va wa gbewe fa.

Ndemɔi Walɛi

¹³ Mu mbaa Kristimableisia, Mu longɔ wu tɔnyɛi hugɔɔ kɔɔlooni nungei nasia ma ti haanga, aako wu lii aa nyani, kia nungei nasia ti na ti lii ii ma ngelegoohu majɔɔva.

¹⁴ Mu langɔe la kɛ Yesu i haailɔ, i hiye gbɔma hee hu, faale mu langɔe la kɛ nasia ti loni lama a Kristi ti haanga, Ngewɔ a pielɔ ti vulu ti lɛ mia Yesu i na.

¹⁵ Kaai na Ndemɔi i kɛni a mue tamia mu wu gaama la kiahuna: Mua mu vulungɔ a yɛla folei na ma Ndemɔi a wa, mua yese muɛɛ li ngi gama nasia gulɔ ti haanga.

¹⁶ Ngewɔ malikei yeembawai a yɛpɛlɔ ngeleya, kɛɛ Ngewɔ bulii woi, tawao Ndemɔi a gbualɔ ngelegoohu i yei. Nasia ti loni lama a Kristi ti haanga, tia yese ta vulu lɔ ti hiye;

¹⁷ na wooma mua mu vulungɔ a yɛla a watii na Ngewɔ a mua tieni lɛlɔma hinda yila fɛfɛi hu, Ndemɔi maliva lugbui hu. Na wiengaa, mua Ndemɔi-ni ma heilɔ kunafɔ.

¹⁸ Faale na, a yɛ a wu nyɔunyɔ nɛpɔ a njɛpɛi jisia.