1 KƆLINTIBLƐISIA 8 - Ngowili Yekpei Numu Kpɛlɛɛ Va

Mɛhɛɛ Na Ta Kpua A Saa Nɔmɔliisia Ma

¹ Nyaa na yɛpɛma kɔlooni kɔlɛi na ma wu nyɛini nya gama ndalongɔ mɛhɛɛ na ma ta kpua a saa nɔmɔliisia ma. Mu kɔɔlɔ kɛ mu gbi mu hinda hugɔɔlɔ, kia ta nde la. Na hu gbi, yeehinda hugɔɔlei ji a pielɔ numu yaama i lɛ; kɛɛ ndomɛi a pielɔ mu Kristimableisia mu wooyilɛi i gbaya.

² Numui na a gili yɛ i hinda hugɔɔlɔ, ii na gɔɔ vulii mahoungɔ i kɔɔ.

³ Kɛɛ numui na ngi longɔ a Ngewɔ, Ngewɔ i ngi gɔɔlɔ.

⁴ Faale naa, gbɛɛ ngi mɔli gbɛmbo kɔlooni mɛhɛɛ na ma ta kpua a saa nɔmɔliisia ma, mu kɔɔlɔ kɛ nɔmɔlii i yɛni a hani wokɔɔngɔ lɔ, tawao yeehani ii na gbi; mu kɔɔlɔ kɛ Ngewɔ weka gbi ii na kɛlee Ngewɔ waa yakpe.

⁵ Ina bɛɛ, kia nungaa lɛɛngaa ta nde la, Ngewɔ wekangaa lɔ na, ti yɛ ngelegoohu ɔɔ dunyei hu, tawao kia bɛɛ yee ngewɔɛisia kɛɛ yeendeblɛisia ti gbotongɔe,

⁶ na hu gbi Ngewɔ i yakpe mu Kristimableisia wɛ, mu Kɛkɛ, na i hani gbi gbatɛni, na mu ngi va; tawao Ndemɔi i yakpe tamia a Yesu Kristi, na ngi va Ngewɔ i hani gbi gbatɛni a ngi loko, tawao mu vulungɔ ngi sabui hu lɔ.

⁷ Kɛɛ numui gbi ii le aa tɔnyɛi ji gɔɔ. Nɔmɔliisia ti hinda i Kristimableisia lɛɛngaa gɔnga wa wɔɔ, ti yeemɛhɛɛ bondɛi na mɛnga na, ti langɔ yɛla la lɛ lɔɔ kɛ nɔmɔlii ngi mɛhɛɛ mia; ti nɛmahu huhaangɔ tawao ta gili la kɛ yeemɛhɛɛ i ti nɔhɔnga Ngewɔ yaama.

⁸ Na hu gbi mɛhɛɛ ɛɛ mua Ngewɔ-ni mu luahui lɛ gulɔma; muii mɛhɛɛ mɛni bɛɛ, na ɛɛ gbɛogbɛ wie a mu luahui mua Ngewɔ-ni, tawao mu mɛhɛɛ mɛ bɛɛ, ɛɛ mu nafa a pele gbi.

⁹ A wu mahugbe, ajifa Ngewɔ lumangɔ wu mɛ mɛhɛɛ gbi mɛva kpaungɔ a saa nɔmɔliisia gama aa pie nasia ti nɛmahu huhaangɔ ti wili jumbu hu yee mɛhɛɛ mɛva.

¹⁰ Numui na ngi layii a Kristi huhaangɔ aa yɛ loi i wu lɔ wua wu gilingɔ la wu hinda hugɔɔlɔ, wa mɛhɛɛ na mɛ kpuangɔ a saa nɔmɔli wɛlei bu, wu ji wiengaa ji numu na ngi nɛmahu haanga a yɛna ɛɛ ngi liilo mɛhɛɛ na mɛva ti kpuanga a saa nɔmɔlingaa ma?

¹¹ Faale na, wu mbaa Kristimɔ huhaangɔi ji Kristi i haani ngi va a jukulɔ bi hinda hugɔɔlei wooma.

¹² Ji wiengaa kɛ wuaa jumbui wulima Kristi ma a ji wa jumbu wuli wu mbaa Kristimableisia ma, tawao wa ti nɛmahu huhaangɔi nyani.

¹³ Faale naa, mɛhɛɛ i piengaa nya mbaa Kristimamɔi i jumbu wie, kunafɔ ngɛɛ yaa mɛhɛɛ na mɛ ta kpua a saa nɔmɔlingaa ma, aako ngaa pie nya mbaa Kristimamɔi i jumbu wie.