1 KƆLINTIBLƐISIA 2 - Ngowili Yekpei Numu Kpɛlɛɛ Va

Kristi Na Ti Kpakpani Krɔsii Ma

¹ Ji ngi wani wu gama, nya mbaa Kristimableisia, Ngewɔ lɔnya lɔwungɔi hugɛva, ngii ngowili waawaa leni ngaa kɛ kɛ nya gaangɔ waa le.

² Ajifa watii na ngi yɛ wu gama ngi nya lii huyiliilɔ lemava hinda gbi ma lekee kɛlee Yesu Kristi, kɛɛ ngi haalei krɔsii ma.

³ Faale ji ngi wani wu gama nya hawangɔ yɛla, tawao nya maa a gbɛli a nduwɛi,

⁴ tawao kaai na ngi kɛni kɛɛ ngowili na ngi ndeni, ngii pieni a nuuvu nɛmahulewe yeembɛili-yɛpɛ, ngi pieni a pelei na lɔ a Ngewɔ Yafei gbayei gɛ leiŋ.

⁵ Wu lalei a Ngewɔ ii gbuani hɔɔ nuuvu nɛmahulewe hu, i gbuani Ngewɔ gbayei hu lɔ.

Ngewɔ Nɛmahulewei

⁶ Na hu gbi, mu nɛmahulewe wowili lema nasia lɔ ma ti hu gbangɔ Ngewɔ hu. Kɛɛ dunyei nda yeenɛmahulewe ii le ɔɔ ngafangei nasia ti kpayei yayengema dunyei ji maahu kiahuna ti nɛmahulewe, kpayablɛi nasia ti wama gbɔyɔma.

⁷ Nɛmahulewe wowili ma nde i yɛni a Ngewɔ nɛmahulewe lɔwungɔi lɔ, ndɔwungɔ nuuvungaa ma, kɛɛ na Ngewɔ i hugbatɛnga wɔɔ kɛva a mue pɛiŋ Ngewɔ i yaa dunyei gbatɛ aako mu yɛyii i gu i wie kia ngi wɔlɔyi i na.

⁸ Ngafangei nasia mahangaa a tie dunyei hu yeengila bɛɛ ii yeenɛmahulewei ji gɔɔni. Ina ti kɔɛilɔ, Ndemɔi na ngɔlɔya ngi wɛ, tii yɛ ngi gbakpa krɔsii ma.

⁹ Na hu gbi, kia Ngewɔ Gɔlɛi i ndeni la yɛ, “Na numu gbi ii yaa wɔɔ gba tɔni tawao ii yaa mɛnini, na numu gbi ii gilini wɔɔ gba kɛ a gulɔ i wie, ta vulii lɔ Ngewɔ i hugbatɛnga nasia va ti longɔ a ngie.”

¹⁰ Kɛɛ mua lɔ Ngewɔ i ngi hinda lɔwungɔi gɛnga a mue ngi Yafei sabui hu. Jifa ngi Yafei a hindei gbi hugbɛkpɛlɔ, Ngewɔ liihu hinda lɔɔwungɔisia vulii bɛɛ.

¹¹ Numu nda yafei na lekee i ngi hu tamia i ngi hinda gbi hugɔngɔ; hii lɔɔ Ngewɔ Yafei yakpe i Ngewɔ hinda gbi hugɔngɔ.

¹² Kiahuna muii yaa dunyei ji yeengafei majɔɔni; kia na aa wie, mu ngafei na lɔ majɔɔnga Ngewɔ i njoyoni, aako mu na kpɛlɛɛ gɔɔ Ngewɔ i fenga mu wɛ gbaama.

¹³ Faale naa, njɛpɛi na ma nde, nuuvu nɛmahulewe ii le aa mu gaa la, kɛlee na Ngewɔ Yafei a mu gaa la, ji ma yɛ tɔnyɛi nasia hugɛma Ngewɔ Yafei a kɛ a mue nasia gama Ngewɔ Yafei i ti hu.

¹⁴ Numu gbi lekee Ngewɔ Yafei ii ngi hu, ɛɛ hani yekpei nasia majɔɔ Ngewɔ yafei a fe gbaama. Numu bondɛi na ii ti gbekpeyii gɔɔ vulii, ti yɛni lekee a baaba lɔ ngi wɛ, ajifa numui na lekee Ngewɔ Yafei i ngi hu ta lɔ a ti gbekpeyii gɔɔ.

¹⁵ Na hu gbi, numui na lekee Ngewɔ Yafei i ngi hu a gulɔ a hani gbi gbekpeyii hugɔɔlaa, kɛɛ numu gbi ɛɛ gu a kiti lewela ngi ma.

¹⁶ Kia Ngewɔ Gɔlɛi i ndeni la yɛ, “Ye lɔ i Ndemɔi nɛmahu va gɔngɔ? Ye lɔ a gu a ngi laahila?” Na hu gbi, kia Kristi a gili, hii ma gili.