1 KƆLINTIBLƐISIA 16 - Ngowili Yekpei Numu Kpɛlɛɛ Va

Navoei Na A Ve Ngewɔmableisia Va

¹ Kɔlɛi na va wu nyɛini ndalongɔ navoei na ma ma fe gbɔva Ngewɔmablei nasia ma ti Judia lɔlei hu. Mahoungɔ wu na wie ngi ndeni Kristimablei nasia ma ti Galesia lɔlei hu ngɛɛ ti pie.

² Sɔnde gbi ma, numu gbi i navoo la gba kia ngi jɔhani a yɛ na, wu ndamagbatɛ aako navoo wɔyɔla aa yɛ wu ma ji nga wa.

³ Ngi wangaa, nga wu magona gɔlɔngaa velɔ nasia wɛ wa la a tie, ngi ti lo Jelusalɛm a wu vehani.

⁴ I nyandengaa nya va livaa, kɛ mua tieni ma lilɔ.

Pɔɔl Jia Hugbatɛngɔisia

⁵ Nga walɔ wu gama ji nga Masidonia lɔlei blandia ajifa kpa lɔ nya ma leweva a Masidonia goohu wee.

⁶ Tɛnga vuli nga lɛmbilɔ saha wu gɔɔma, tɛngaa nga haamɛi kpɛlɛɛ gbɔyɔlɔ wu gɔɔma, na wooma wa gbɔlɔ nya ma ngi li gulɔma a nya jiei, mia gbi lekee nga li na ji nga gbua wu gɔɔma.

⁷ Ngii loni ngi wu lɔ na kɛ ngi lewenga wu ma fulo; nya lii lɔ ma lɛmbiva wu gama, Ndemɔi i lumangaa.

⁸ Ngi yɛmaa mbei Ɛfisɔs lɛi hu haaŋ Pɛntikɔsti volei i hiti.

⁹ Ngi watii yekpe waa majɔɔnga mbei baama yenge wieva kia bɛɛ numu gboto ti na ti lapima a nge.

¹⁰ Timoti i fonga wu ma, a loko hei ngi bu vulii pandawanda ajifa Ndemɔi yengei na lɔɔ ngi piema tamia i piema.

¹¹ Numu gbi aa lɛɛ ngi hu tawao wu gbɔ ngi ma i li gulɔma a ngi jiei ndiilɛli hu aako i yama nya gama; ajifa nyaa ngi gulɔ gbema tia mu mbaa Kristimableisia.

¹² Mu ndee Apɔlɔs ta, ngi nɔɔnga ngi ma kaka ngɛɛ i foo wu ma taa mu mbaa Kristimablaa wekeisia, kɛɛ ii yaa nɛni ngi wɛ wava wu gama a watii ji. Na hu gbi, kpemɛi ngi hu i gbɛmbongaa, a walɔ.

Kɛlɛma Vɛimɛisia

¹³ Waa lema wua yekpe ma, a hou kpaŋ wu lii na ma falangɔ Kristi ma, a wu lii hou waa hawa wie.

¹⁴ A wu yengei kpɛlɛɛ wie a ndoma.

¹⁵ Wu Stɛfanɔs hinda hugɔɔlɔ tia ngi wɛlɛbuleisia; tia yese pɛiŋ ti woteni a Kristimablaa Akaya lɔlei hu gbi tawao ti tia yekpe venga Ngewɔmableisia ti yengei wɛ.

¹⁶ Nyaa wu manɛnɛma, nya mbaa Kristimableisia, wu wuaa numu bondɛi jisia ti lokulɔyɛi bu kɛɛ numu weka gbi tia tieni ti yengema ta fɔndɔ jeende.

¹⁷ Nya goohu nɛngɔe Stɛfanɔs walei va tia Fɔɔtunatɔs kɛɛ Akeikɔs; ti wu wooma gbewe gbuanga

¹⁸ tawao ti nya lii nɛpɔnga waa kia lɔɔ ti wu lii nɛpɔni. Mahoungɔ wu wolo panda nama yee nungei jisia ta nde.

¹⁹ Kristimablei nasia ti heiheini Esia lɔlei hu gbi ta va wu ma. Akuila taa Plisila kɛɛ Kristimablei nasia ta gomɛ ti wɛlei bu tiaa Kristimamɔ-vama gbɔtu yoyoma wu wɛ.

²⁰ Mu mbaa Kristimableisia kpɛlɛɛ ti mbei ta va wu ma kaka. A va wu nyɔunyɔ ma a ndoma lii.

²¹ Nya Pɔɔl, nya vulii lɔ ngi famɛi jisia nyɛima a nya lokoi.

²² Numu gbi lekee ii loni a Ndemɔi, sondu lɔ ngi ma! Mu Lemɔi, wa!

²³ Mu Lemɔi Yesu ngi yauwandei i yɛ wu kpɛlɛɛ ma.

²⁴ Nya lomɛi i yɛ wu kpɛlɛɛ gama Yesu Kristi woo a wue. Amiina.