1 KƆLINTIBLƐISIA 10 - Ngowili Yekpei Numu Kpɛlɛɛ Va

Ndahii Kɔloongɔ Nɔmɔliisia Ma

¹ Nya longɔ i hitɛ wu wɛ, nya mbaa Kristimableisia, gbɔɔ i mu maadani nasia wieni ti toni wɔɔ Mojisi ma. Njagbili na yɛ ti gulɔ i yɛlɔ a ti mahugbe tawao ti gboyei na leweilɔ ta toli a Rɛd Sii hinda ii ti wieni.

² Ti ti gbi wuailɔ njagbilii hu kɛɛ yeegboyei, ti wote a Mojisi woomablɛisia.

³ Ti kpɛlɛɛ ti mɛhɛɛ yakpei na mɛilɔ Ngewɔ i yɛ njei,

⁴ tawao ti gbi ti nja yakpei na gboli Ngewɔ i yɛ fe. Njɛi na ti kpɔleni i gbuani Ngewɔ gɔtii hu lɔ, tia yeekɔtii-ni ti lini, tawao yeekɔtii i yɛni a Kristi vulii lɔ.

⁵ Na hu gbi, ti gbotoma ti hinda ii yɛ nɛni Ngewɔ wɛ, faale ti haailɔ, ti womɛisia ti vayafaya ndɔgbɔ lambɛi ma gbi.

⁶ Kiahuna, ji kpɛlɛɛ i yɛni a ndahii lɔ mu va maa lo a hani nyamungaa kia ti pieni,

⁷ tawao maa hɛɛ nɔmɔlingaa ma kia ti lɛɛngaa ti pieni. Kia Ngewɔ Gɔlɛi i ndeni la yɛ, “Nungeisia ti heiilɔ komɛ-mɛhɛɛ mɛma, kɛ yeekomɛi i wotenga a ndɔhou kɛɛ puegbua gomɛ waa.”

⁸ Maa ii houni kulo bɛɛ mu gbiti puegbua hinda ma kia ti lɛɛngaa ti pieni folo yakpei goohu ti tauji numu gbɔyɔngɔ maahu sawa ti gula ti haa.

⁹ Maa ii houni kulo bɛɛ mu Kristi layie gbuahu kia ti lɛɛngaa ti pieni, kaalingɛisia ti ti waa.

¹⁰ Maa ii houni mu gbonyɛ kia ti lɛɛngaa ti pieni numu Waa Malikei i ti waa.

¹¹ Hindei jisia ti ti wieilɔ aako ti yɛ a tɔmaseli nungaa wekeisia va, tawao ti ti nyɛilɔ Ngewɔ Gɔlɛi hu aako ti yɛ a ndahii mu va, ajifa mu watii ji magutungɔ waa le a dunyei gbɔyɔ-gbelei.

¹² Numui na i gilima yɛ ngi layii a Ngewɔ gbayangɔe, i ngi mahugbe aa gula.

¹³ Kɔlɛya gbi lekee a wa wu gama, nyɔkɔ mia lɔɔ a wa nungaa gama. Kɛɛ Ngewɔ Lahei hu ɛɛ nyani tawao kɔɔlɛya aa wa wu maahu tewengɔ wu gahui ma. Watii na kɔɔlɛyɛi a wa wu gama, a wu gɔlɔ a kpayei na a pie wu gu mbu, i wu gbua-wele ve.

¹⁴ Faale na, nya mbaa Kristimableisia waa lukpe nɔmɔli vɛlila gbla.

¹⁵ Nyaa yɛpɛma wu gama kia nɛmahuleweblaa wua yekpe a kiti lewe na ma nga nde.

¹⁶ Bolei na ma yenge la Ndemɔi Gbɔkɔ Mɛhɛɛ mɛmɛi, ma siɛgbua Ngewɔ ma fa; ji ma ngulu-wua lɔi gboli hu, Kristi ŋamɛi tɛngaa mia ma kpɔle. Tawao bledii na ma ngaingai: mu mɛngaa, kɛ mua Kristi luwui mɛma.

¹⁷ Ajifa bledii gbuhɛi i yakpe, tawao kia bɛɛ mu gbotongɔ, mu kpɛlɛɛ kpuha yila lɔ a mue jifa ma bledii gbuha yakpei lɔ mɛ.

¹⁸ A gili lɛɛ a Isrelbleisia; nasia ta hani nasia lɛɛngaa mɛ kpuangɔ a saa, tia Ngewɔ-ni ti wilinga hu, saai na va ta kpua ngi ma saagbuamɛi.

¹⁹ Wu lii lɔ ma wue ngi ndeilɔ ngɛɛ hani gbi lɔ nɔmɔlii hu kɛɛ mɛhɛɛ na ta kpua a saa ngi ma?

²⁰ Sawo! Na ngi ndema ta lɔ a ji kɛ hani na nasia tii Ngewɔ gɔɔ ta kpua a saa nɔmɔliisia ti jaa-gbuamɛi ti kpuama ngafa nyamungaa lɔ ma, Ngewɔ ii le; tawao ngii loni wu yɛ a ngafa nyamungaa ti mbangaa.

²¹ Wuɛɛ gu wu ngulu-wua lɔi gboli Ndemɔi bolei hu wu gbɔma kpɔle ngafa nyamungaa ti bolei hu; wuɛɛ gu wu hei Ndemɔi Gbɔkɔ Mɛhɛɛ gɔɔbu wu gbɔma hei ngafa nyamungaa ti nda gɔɔbu.

²² Ɔɔ mu longɔe mu pie Ndemɔi i tolo gbua? Mu gilingɔe la kɛ mu gbayani ngi ma?

Ndoma Kɛɛ Bagɔma Ve Bi Mbaa Kristimableisia Wɛ

²³ Nunga ta ndelɔ tɛɛ, “Sawei ɛɛ mu maabali hinda gbi wieva.” Tɔnya le, kɛɛ hindei gbi ii le aa nyande. Sawei lumangɔe mu wɛ hinda gbi wieva, kɛɛ hindei gbi ii le a yɛ gbɔma Kristimableisia ma.

²⁴ Numu gbi aa ta yekpe lekee ngi gbekpeyei gɔli, mahoungɔ i ngi mbaangɛisia bɛɛ ti gbekpeyei gɔli.

²⁵ Sawei lumangɔe wu wɛ ndahɛi gbi mɛva ta majia ndaahɛ majiamɛi, kiti gbi aa yɛ wu nɛmahu.

²⁶ Ajifa kia Ngewɔ Gɔlɛi i ndeni la yɛ, “Ndemɔi lɔ ngi woo a dunyei kɛɛ hani gbi i hu.”

²⁷ Numui na ii Ngewɔ gɔɔ i wu lolingaa mɛhɛɛ ma tawao wu luma wu li na, a na mɛ a hei wu gɔɔbu. Kiti gbi aa yɛ wu nɛmahu kɔlooni ma.

²⁸ Kɛɛ numu i ndengaa wu ma yɛ, “Ti mɛhɛɛ ji gbuanga a saa nɔmɔliisia ma,” kɛ waa yeemɛhɛɛ na mɛ numui na va kɛɛ ngi nɛmahu va i hugɛni a wue

²⁹ wu nda nɛmahu ii le, kɛ numu wekei na nɛmahu va. Numu yila a mɔlilɔ yɛ, “Kɛ gbɛe numui na ngi layii a Kristi huhaangɔ a pie ngɛɛ na wie ngi kɔɔngɔ pɔɔnangɔe?

³⁰ Ngi siɛgbuangaa Ngewɔ ma nya mɛhɛɛ va, gbɛe numu gbi a nya magbua mɛhɛɛ na va nga siɛgbua Ngewɔ ma?”

³¹ Wu mɛhɛɛ mɛ ɔɔ wu ndɔ gboli ɔɔ wu gbɛogbɛ wie, a pie aako numui gbi ti Ngewɔ wɔlɔ.

³² A luva a pelei na ɛɛ pie Juungaa, ɔɔ nasia Juu yaa tie, ɔɔ Kristimableisia taa jumbu hinda wie.

³³ A pie kia lɔɔ nga pie; nga lapilɔ numui gbi liilɛliva hinda gbi hu nga pie, ngɛɛ gili a nya nda gbekpeyei, nga gili a numui gbi ti ndɛi lɔ, aako ti mbawo majɔɔ.