WATHI 8 - Mbivilia

¹ A! Kethĩwa wĩthĩwa ta mwana‐a‐ia, Ũla wongie nondo sya mwaitũ! Yĩla nesa ũkũwĩla ũtee, ngakũmumunya; Ĩĩ, na kũti ũmwe wĩmbũthya.

² Nĩthĩwa ngũtongoesya, na ũkũete nyũmbanĩ ya mwaitũ, Ũla wĩmanyĩsya; Nĩthĩwa ngũnyw’ĩthya mbinyu yĩ mũuke mũseo, Ya ngoyoo ya makũngũmanga makwa.

³ Kw’oko kwake kwa aka kwĩthĩwa ungu wa mũtwe wakwa, Na kw’oko kwake kwa aũme kwĩmbĩtĩĩsya.

⁴ Nĩngũmwĩavĩthya, inyw’ĩ eĩtu ma Yelusaleme, Kana mũtikathũlũmũe, kana kũmũamũkya mwendwa wakwa, Kũvika endeew’a.

Wendo wĩ vinya ta kĩkw’ũ

⁵ Nũũ ũũ wambatĩte kuma weũnĩ, Eyaĩĩsye mwendwa wake? Ĩtina wa mũtĩ wa mũevo nĩnakũamũkisye: Vau nĩvo inyia waku wakwaũnyie, Vau nĩvo waũnyĩe ũla wakũsyaie.

⁶ Mbĩkĩa ta ũsiĩlũ ĩũlũ wa ngoo yaku, Ta ũsiĩlo ĩũlũ wa kw’oko kwaku: Nũndũ wendo wĩ vinya ta kĩkw’ũ; Kĩwĩu nĩ kyai ta Seoli; Itw’ĩki syakyo nĩ itw’ĩki sya mwaki, O kĩtw’ĩki ki kya mwaki wa Yeova.

⁷ Manzĩ maingĩ matitonya kũvosya wendo, O na kĩw’ũ kingĩ ki kũũthika: Ethĩwa mũndũ nũnengane syĩndũ syonthe sya nyũmba yake nũndũ wa wendo, Akavũthw’a vyũ.

⁸ Twĩ na mwĩĩtu‐a‐ia mũnini, Na nde nondo: Tũkeka ata ũndũ wa mwĩĩtu‐u‐ia Mũthenya ũla ũkevaw’a?

⁹ Kethĩwa nĩ ũvai, Tũmwakĩĩa nthongole ya vetha: Na kethĩwa nĩ mũomo, Tũkamwiiĩa na mbwaũ sya mĩkũũ.

¹⁰ Nyie nĩ ũvai, na nondo syakwa nĩ ta myako mĩtũlu ya mĩnyoolo yaw’o: Na ĩndĩ methonĩ make naĩ ta ũmwe ũla wonie mũuo.

¹¹ Solomoni aĩ na mũũnda wa mĩsavivũ ku Mbaali‐amoni; Atiĩa mũũnda wa mũsavivũ asũvĩi; Kĩla ũmwe ũndũ wa ũsyao waw’o aĩ wa kũete ilungu sya vetha ngili.

¹² Mũũnda wakwa wa mĩsavivũ, ũla wakwa, wĩ mbee wakwa: We, o we Solomoni, ũkeethĩwa na i ngili, Na ala masũvĩaa ũsyao waw’o makeethĩwa na maana elĩ.

¹³ We ũla ũtũaa mĩũndanĩ, Atindan’ya mĩmethukĩĩasya mew’e wasya waku: Tuma nakwa nĩwĩw’a.

¹⁴ Ĩkalaate, mwendwa wakwa, Na ĩthĩwa ta nthwaia nga kana ta ĩswii ya ndaatai Ĩũlũ wa iĩma syĩ mĩtĩ ĩla ĩnyungaa nesa.