WATHI 7 - Mbivilia

¹ A! Ũndũ maseũvĩte maũũ maku me iatũnĩ, we mwĩĩtu wa mũnene wĩ mbee ũsumbĩnĩ! Matako maku nĩ mavilingĩku ta tũvila twĩ thooa mũnene, Wĩa wa moko ma ndũĩka.

² Mwĩĩ waku nĩ ta kĩkombe kĩvilingĩku, Kĩla nthĩnĩ wakyo mbinyu mbulan’ye ĩtanyivaa: Ĩvu yaku nĩ ta kĩvumbu kya nganũ Kĩthyũlũlũkĩtw’e na malaa ma lili.

³ Nondo syaku ilĩ itilyĩ ta maswii elĩ Mavatha ma nthwaia.

⁴ Ngingo yaku nĩ ta mwako mũtũlu wa mũnyoolo wa maeo ma nzou; Metho maku nĩ ta ndia ila syĩ Esivoni, Ũtee wa mbingĩlo ya Mbathi‐lavimi; Ĩnyiũũ yaku nĩ ta mwako mũtũlu wa mũnyoolo wa Levanoni Ũla welekele Ndamasiku.

⁵ Mũtwe waku nĩ ta kĩĩma kya Kalimeli, Na nzw’ĩĩ sya mũtwe waku itilyĩ ta ndune; Mũsumbĩ nũlũmĩtwe e mũtave mũvĩndĩlenĩ wasyo.

Ũtanu mũsũu wa mũtwawa na mũtwaani

⁶ A! Ũndũ wanakavĩte na kwendeesya, Mwendwa, kwondũ wa kũtanĩthya!

⁷ Kĩũngamo kyaku nĩ ta kya mũtĩ wa mũtende, Na nondo syaku ta itũngo syaw’o.

⁸ Nasya, nĩngũlĩsa mũtĩ wa mũtende, Nĩngwĩkwatĩla mbonge syaw’o: Nondo syaku nĩsyĩthĩwe ta itũngo sya mũsavivũ, Na mũuke wa mĩthũmũ yaku ta wa ũsyao wa mũtĩ wa mũevo,

⁹ Na kanyw’a waku ta mbinyu ĩla nzeo mbee, Ĩla ĩmelekaa nesa kwondũ wa mwendwa wakwa, Ĩvĩtĩlaa mbola ilomonĩ sya ala makomete.

¹⁰ Nĩ wa mwendwa wakwa; Na kwenda kwake nĩkũmbelekele.

¹¹ Ũka, mwendwa wakwa, tumaale mũũndanĩ; Tũkomele tũmĩsyĩ.

¹² Twambate kĩoko tene mĩũndanĩ ya mĩsavivũ; Tũsisye ethĩwa mũsavivũ wĩ wenze, Na malaa maw’o nĩ malaũku, Na mĩkũngũmanga ĩ malaa: Vau ngakũnengea wendo wakwa.

¹³ Matunda ma kwendana mataavũkasya mũuke mũseo; Na mĩomonĩ yaitũ ve mĩthemba yonthe ya matunda me vata mũno ala meũ na ala ma tene, Ala nakwiĩe, we mwendwa wakwa.