WATHI 6 - Mbivilia

¹ Mwendwa waku aendie kũ, We mwanakavu kũvĩtũka aka ala angĩ? Mwendwa waku ethyũũĩle va, Kana tũmũmanthe vamwe naku?

² Mwendwa wakwa atheeie mũũndanĩ wake, Ivũĩonĩ syĩ mĩtĩ ĩla ĩnyungaa nesa, Kwĩĩthĩsya mĩũndanĩ, na kũmban’ya malaa ma lili.

³ Nyie nĩ wa mwendwa wakwa, na mwendwa wakwa nĩ wakwa: Eĩthya ndĩthya yake katĩ wa malaa ma lili.

Mũtwaani aikumya mũtwawa

⁴ We wĩ mwanakavu, mwendwa wakwa, ta Tilisa, Wa kwendeesya ta Yelusaleme, Wa kũtĩsya ta ita syĩ na ivevelo.

⁵ Thyũũa metho maku maikanzisye, Nũndũ nĩmeũngatha. Nzw’ĩĩ syaku nĩ ta ndĩthya ya mbũĩ, Ila itindiaa mwaĩĩonĩ wa Ngileati.

⁶ Maeo maku nĩ ta ndĩthya ya malondu maka, Ala mambatĩtw’e kuma kũthambw’a; Kĩla yĩmwe yamo yĩ na mavatha, Na vati yĩmwe katĩ wamo yaakw’ĩthya.

⁷ Nthia syaku itilyĩ ta kĩlungu kya ĩkũngũmanga Ungu wa suka waku mũvũthũ.

⁸ Ve aka asumbĩ mĩongo thanthatũ, na aka ngombo mĩongo nyanya, Na eĩtu atheu matatalĩka.

⁹ Ĩvũĩ yakwa, ũtaavukw’a wakwa, no ũmwe; No ũmwe wa inyia wake; Nowe weka mũnyuve wa ũla wamũsyaie. Eĩtu mamwona, na mamwĩta mũathimwa; Ĩĩ, aka asumbĩ na aka ngombo, na mamũtaĩa.

¹⁰ Nũũ ũla ũsiasya ta kũikya, Mwanakavu ta mwei, Mũtheu ta syũa, Wa kũtĩsya ta ita syĩ na ivevelo?

¹¹ Natheea mũũndanĩ wa mĩtĩ ya mbatani, Kũsisya ũthithinĩu wa mĩkenge mwandanĩ, Kũsisya ethĩwa mũsavivũ wĩ wenze, Na mĩkũngũmanga ĩ na malaa.

¹² Mbee wa ndanamba kũmanya, ngoo yakwa yambĩkalya Katĩ wa makasya ma andũ makwa anene.

¹³ Syoka, syoka, we Mũsulami; Syoka, syoka, nĩ kana tũkũsisye. Nĩkĩ mũkũmũsisya Mũsulami, Ta kũsisya mũsũngĩle wa Maanaimu?