WATHI 5 - Mbivilia

¹ Nĩnooka mũũndanĩ wakwa, mwĩĩtu‐a‐ia, mũtwawa wakwa: Nĩnoomban’ya manemane makwa na mĩtĩ yakwa inyungaa nesa; Nĩnaĩsanĩsya ĩwa yakwa na ũkĩ wakwa wa nzũkĩ; Na nanyw’a mbinyu yakwa na ĩia yakwa. Yai, inyw’ĩ anyanyawa; Nyw’a, ĩĩ, nyw’a mũno, mwendwa wakwa.

Thĩna ũndũ wa kwaanw’a

² Nĩĩ nĩnakoma, ĩndĩ ngoo yakwa nĩyĩĩamũkĩte: Nĩ wasya wa mwendwa wakwa ũla ũvingũasya, akyasya, Mbingũĩa, mwĩĩtu‐a‐ia, mwendwa wakwa, ĩvũĩ yakwa, ũtaavukw’a wakwa, Nũndũ mũtwe wakwa nĩusũĩte ĩmwe, O na nzw’ĩĩ syakwa mavoloto ma ũtukũ.

³ Nĩnumĩtye ngũa yakwa; nĩmĩkĩa ata? Nĩthambĩtye maũũ makwa; nĩmavukya ata?

⁴ Mwendwa wakwa ekĩie kw’oko kwake ĩimanĩ ya mũomo, Na ngoo yakwa nĩyakusĩkie nũndũ wake.

⁵ Nokĩlile kũvingũĩa mwendwa wakwa; Na moko makwa malovotangasya manemane, Na syaa syakwa manemane matweku, Ĩũlũ wa ikwati sya kĩvingi.

⁶ Navingũĩa mwendwa wakwa; Ĩndĩ mwendwa wakwa aĩ aneetulũla, na akathi. Ngoo yakwa nĩyanthelele yĩla waneenie: Nĩnamũmanthie, ĩndĩ ndyaatonya kũmwona; Namwĩta, ĩndĩ ndaanzũngĩa.

⁷ Asyaĩĩsya ala mangangaa ndũanĩ mambona, Mangũna, mambũkite; Asũvĩi ma maũvai mambuta suka wakwa.

⁸ Nĩngũmũavĩthya, eĩtu ma Yelusaleme, Ethĩwa mũkoona mwendwa wakwa, Kana mwĩmwĩa, atĩ nĩnĩwaĩtw’e nĩ wendo.

Mũtwawa aikumya mũtwaani

⁹ Mwendwa waku nũvĩtũkĩte ũngĩ wendawa ata, We ũla wĩ mwanakavu kũvĩtũka aka ala angĩ? Mwendwa waku nũvĩtũkĩte ũngĩ wendawa ata, Kana ũtũavĩthye ta ũu?

¹⁰ Mwendwa wakwa nĩ mweũ na mũtune, Mũnene mbee katĩ wa ngili ĩkũmi.

¹¹ Mũtwe wake nĩ ta thaavu ũla mũseo mbee; Nzw’ĩĩ syake nĩ mbingĩ, na nziũ ta ngũngũũ.

¹² Metho make matilyĩ ta ma mavũĩ me ũtee wa tũlũsĩ, Mathambĩtw’e na ĩia, na kwiwa nesa.

¹³ Matau make nĩ ta ĩvuĩo syĩ mĩtĩ ĩnyungaa nesa, Ta mĩthaĩĩo yĩ nyũnyi syĩ mũyo: Ilomo syake nĩ ta malaa ma lili, inyũlũlũkasya manemane matweku.

¹⁴ Moko make nĩ ta ngome sya thaavu syĩ na tũvila twa nzumalati ntheu tũlũmanĩtw’e iĩndĩnĩ syatw’o: Mwĩĩ wake nĩ ta maeo ma nzou manakavĩtw’e na tũvila twa savili.

¹⁵ Maũũ make nĩ ta ituĩ sya mavia maseo, me iĩndĩnĩ sya thaavu mũseo: Ũmbe wake ũtilyĩ Levanoni, mũseo mũno ta mĩkũũ.

¹⁶ Kanyw’a wake wĩ mũyo mũnene; Ĩĩ, nĩ mwanake ki. Ũũ nĩ mwendwa wakwa, na ũũ nĩ mũnyanyawa, Inyw’ĩ eĩtu ma Yelusaleme.