WATHI 3 - Mbivilia

Mosũanĩo ma mũtwawa

¹ Ũtukũ nĩ ũkomonĩ wakwa Nĩmũmanthie ũla ngoo yakwa yendete: Nĩmũmanthie, ĩndĩ ndinamwona.

² Nasya, nĩngũkĩla yu, na ngĩthi ngangange ndũanĩ; Nzĩanĩ nene na nzĩanĩ mbaamu Ngamũmantha ũla ngoo yakwa yendete: Namũmantha, ĩndĩ ndinamwona.

³ Asyaĩĩsya ala mangangaa ndũanĩ mambona; Kwa asu nameie, Nĩmwamwona ũla ngoo yakwa yendete?

⁴ Kwaĩ o kavinda kanini namatia, Yĩla namwonie ũla ngoo yakwa yendete: Namũkwatie, na ndyaamũeka athi, Kũvika namũete nyũmbanĩ ya inyia wakwa, Na kasũmbanĩ ka ũla wangitavie.

⁵ Nĩngũmũavĩthya, inyw’ĩ eĩtu ma Yelusaleme, Na nthwaia nga kana ndaatai nga sya kĩthekanĩ, Kana mũikamũthũlũmũe, kana kũmũamũkya mwendwa wakwa, Kũvika endeew’a.

Mũtwawa akyona ũnene wa mũtwaani

⁶ Ũũ nũũ ũla wambatĩte kuma weũnĩ Ta ituĩ sya syũki, Anyungĩthĩtw’e nĩ manemane na ũvumba, Na mĩtĩ yonthe ya mũthoosya ĩla ĩnyungaa nesa?

⁷ Sisya, nĩ mũsekeseke wa Solomoni; Andũ mĩongo thanthatũ ngũmbaũ moothyũlũlũkĩte, Ma andũ ngũmbaũ sya Isilaeli.

⁸ Onthe nĩ akwati ma ũvyũ, na nĩ ai kaũnĩ: Kĩla mũndũ e na ũvyũ wake kĩnyunyunĩ kyake, Nũndũ wa w’ĩa ũtukũ.

⁹ Mũsumbĩ Solomoni eeseũvĩsya ĩsela ya kĩũsumbĩ Ya mũtĩ wa Levanoni.

¹⁰ Aseũvĩsya itũĩ syayo sya vetha, Ĩtina yayo ya thaavu, na wikalo wayo wa ngũa ĩtilyĩ ndune, Nthĩnĩ wayo vanakavĩtw’e na wendo, Waumĩte eĩtunĩ ma Yelusaleme.

¹¹ Umaalai, inyw’ĩ eĩtu ma Saioni, na mũkyona mũsumbĩ Solomoni, E na ngovia ya ũsumbĩ ĩla inyia wake wamwĩkĩie Mũthenya wa kũtwaana kwake, Na mũthenya wa ũtanu wa ngoo yake.