Tito 2 - Mbivilia

Mwĩkalo wa Ũklĩsto na mũsingi waw’o

¹ Ĩndĩ we, neena maũndũ ala maĩle ũmanyĩsyo ũla wa w’o;

² atĩ atumĩa akũũ methĩwe na wĩting’o, na kĩkĩo, na kĩlĩko, methĩwe aima mũĩkĩĩonĩ, na wendonĩ, na wũmĩĩsyonĩ:

³ na ivetĩ ngũũ nasyo no ta ũu syĩthĩwe na mwĩkalĩle wa ũtheu, ite nzũkani kana ngombo sya mbinyu mbingĩ, syĩthĩwe amanyĩsya ma maũndũ ala maseo;

⁴ nĩ kana imanyĩasye aka ma mũika kwenda aũme moo, na kũsyenda syana syoo,

⁵ methĩwe na kĩlĩko, mate na wathe, atethya ma wĩa mĩsyĩ kwoo, kwĩka angĩ nesa, na kwĩnyivya kwa aũme moo ene, nĩ kana ndeto ya Ngai ndĩkaumwe:

⁶ aũme mate akũũ nao mataae methĩwe na kĩlĩko:

⁷ maũndũnĩ onthe ũkĩyonan’ya mwene wĩ ngelekan’yo ya meko maseo; ũmanyĩsyonĩ waku ũkyonan’ya ũndũ ũla ũtatonya kũthũkya, na kĩkĩo,

⁸ na ndeto syaĩle itatonya kũsilĩlwa; nĩ kana ũla ũkwenda ũkũvinganĩsya atonye kũsonoka, nũndũ ndakethĩwa na ndeto sya kũtũneenea.

⁹ Ngombo syĩnyivye kwa mavwana masyo, na syĩthĩwe ĩkĩmendeesya maũndũnĩ onthe; itikatũngĩthasya;

¹⁰ na itikethĩwe osangi ma syĩndũ, ĩndĩ ikyonan’ya kĩthito kĩseo kyonthe; nĩ kana syanakavye maũndũnĩ onthe ũmanyĩsyo wa Ngai Mũtangĩĩi waitũ.

Ũndũ mumo wa Ngai ũmanyĩasya

¹¹ Nũndũ mumo wa Ngai nĩwumĩlĩte, ũkĩetee andũ onthe ũtangĩĩo,

¹² ũkĩtũmanyĩsya atĩ tũlee maũndũ onthe mate ma kũmũkĩa Ngai na mawendi onthe ma nthĩ, twĩkalasye mathayũ maitũ na kĩlĩko kĩanĩu na ũlũngalu na kũmũkĩa Ngai ĩvindanĩ yĩĩ tũĩ;

¹³ tũkĩsyaĩĩsya wĩkwatyo ũla wĩ na ũathimo na kumĩla kwa ũtheu mũtisu wa Ngai ũla mũnene na Mũtangĩĩi waĩtũ Yesũ Klĩsto;

¹⁴ ũla wenenganie mwene kwondũ witũ, nĩ kana atwovosye kũtumya mothũkunĩ onthe, na kwĩtheesya andũ methĩwe make mwene, me na ũthangaau mawĩanĩ ala maseo.

¹⁵ Maũndũ aa neena, noitaa, noikan’ya, na ũkũmũ w’onthe. Mũndũ ndakakũvũthye.