SAVULI 2 - Mbivilia

Ũsumbĩko wa mwĩtĩkĩw’a wa mauta wa Yeova

¹ Mbaĩ ilonzanĩlasya kĩ? Na ngo sya andũ kũsũanĩa ũndũ wa mana?

² Asumbĩ ma nthĩ nĩmeyũmanĩlye, Na asũmbĩki nĩmesũanĩa vamwe, Ĩũlũ wa Yeova, na ĩũlũ wa ũla mwĩtĩkĩw’a mauta wake, makyasya,

³ Tũtusangei syĩndũ ila imovaa, Na ndii syoo tũsyĩkye kũasa naitũ.

⁴ We ũla ũilyĩ matunĩ akatheka: Mwĩaĩi akamathekeea.

⁵ Nĩvo ĩndĩ ũkaneena namo ũthilĩkunĩ wake, Na kũmathĩn’ya e na ũthatu mwai:

⁶ Nakwa nĩniĩte mũsumbĩ wakwa Kĩĩmanĩ kyakwa kĩtheu kya Saioni.

⁷ Nĩngũtavan’ya ũvoo wa ũla ũtw’ĩo: Yeova ambĩa, Nue mwana wakwa; Umũnthĩ nĩnaũsyaa.

⁸ Mbĩtya, na ngakũnenga mbaĩ syĩthĩwe ũtiĩwa waku, Na itulu sya nthĩ syĩthĩwe ng’ũndũ yaku.

⁹ Ũkamananga na ndata ya kĩaa; Ũkamang’atangan’ya matilĩkangane tũlungu ta mbisũ ya mũmbi.

¹⁰ Kwondũ wa ũu ĩthĩwai na ũĩ, inyw’ĩ asumbĩ: Likwai nĩ ũmanyi, inyw’ĩ asilĩli ma nthĩ.

¹¹ Thũkũmai Yeova mũkĩmũkĩa, Na tanai na kũtetema.

¹² Mũmumunyei ũla mwana, ndakese ũthata, na inyw’ĩ mũyaĩa nzĩanĩ, Nĩkwĩthĩwa ũthilĩku wake ũkilĩlye kwakana. Nĩ aathime onthe ala mevithaa nthĩnĩ wake.