Osea 9 - Mbivilia

Isilaeli maisilĩlwa ũndũ wa kũendeea na ũthũku

¹ Ndũkatane, we Isilaeli, nũndũ wa mũyo, ta ngo sya andũ; nũndũ nĩwĩkĩte ũmalwaya, ũkĩmũtia Ngai waku; nĩwendete kwĩthooesyaa o kĩla kĩvũĩonĩ kya lĩu wa mbaa ngetha.

² Kĩvũĩo na kĩangĩo kya nzavivũ itikamavũn’ya, na mbinyu mbĩthĩ ĩkamwaĩa.

³ Matikatũa nthĩ ya Yeova; ĩndĩ Evalaimu akasyoka Misili, na makaya lĩu mũvuku ku Asuli.

⁴ Matikatulũla nthembo sya mbinyu kwondũ wa Yeova, o na matikamwendeesya: nthembo syoo ikeethĩwa kwoo ta lĩu wa ala mametaa; onthe ala makaya nĩmakavukw’a; nũndũ lĩu woo ũkeethĩwa ũndũ wa kũmina nzaa yoo; ndũkalika nyũmbanĩ ya Yeova.

⁵ Inyw’ĩ mũkeeka ata mũthenya wa ũmbano ũtw’ĩtwe, na mũthenya wa mboka ya Yeova?

⁶ Nũndũ, sisya, nĩmaendie makĩa wanangĩko; ĩndĩ Misili ĩkamomban’ya, Memivisi ikamathika; syĩndũ syoo sya vetha sya kwendeesya, syĩnyeelya ikoosa syĩthĩwe syasyo; mĩw’a ĩkeethĩwa maeemanĩ moo.

⁷ Mĩthenya ya kũsilĩlwa nĩ myũku, mĩthenya ya kũĩvanĩsya nĩ myũku; Isilaeli akamanya ũndũ ũsu: mwathani nĩ mũtumanu, mũndũ ũla wĩ na ũ veva e na ndũũka, nũndũ wa ũthũku waku kwingĩva, na nĩkwĩthĩwa ũmaitha nĩ mũnene.

⁸ Evalaimu aĩ mũsyaĩĩsya vamwe na Ngai wakwa: na ũvoo wa mwathani, kĩtei kya mũtei wa nyũnyi kĩ nzĩanĩ syake syonthe, na ũmaitha nyũmbanĩ ya Ngai wake.

⁹ Nĩmeyanangĩte mũno, o ta mĩthenyanĩ ya Ngivea: akalilikana ũthũku woo, na akasilĩla naĩ syoo.

¹⁰ Noonie Isilaeli ailyĩ ta nzavivũ weũnĩ; noonie aaĩthe menyu o ta ĩkũyũ yambaa kwĩw’a mũkũyũnĩ ĩvinda ya kũsyaa kwaw’o kwa mbee: ĩndĩ maenda kwa Mbaali‐veoli, meenengane kwa kĩndũ kyu kĩ nthoni, na matw’ĩka kĩla kĩthatasya o ta kyu mendete.

¹¹ Ũvoo wa Evalaimu, ndaĩa yoo ĩkaũlũka ta nyũnyi ĩthi: vaikethĩwa ũsyaa, kana wĩ ĩvu, kana kũitava.

¹² O na maea syana syoo, ngatuma makw’ĩĩwa nĩsyo, nĩ kana vatikatiale mũndũ: ĩĩ, na ĩngĩ woo nĩ woo yĩla nĩmatia!

¹³ Evalaimu, o tondũ noonie Tile ĩilyĩ, nũvandĩtwe vandũ va kwendeesya: ĩndĩ Evalaimu akaumaalĩlya syana syake mũai.

¹⁴ Manenge, ame Yeova‐wĩmanenga kĩ? Manenge mavu ala metĩkaa na nondo ng’alu.

¹⁵ Ũthũku woo w’onthe wĩ Ngilikali; nũndũ nĩnamamenee kw’o: nũndũ wa ũthũku wa meko moo ngamalũngya maume nyũmbanĩ yakwa; o na ndikamenda ĩngĩ; anene moo me mbee ũsumbĩnĩ onthe nĩ alei.

¹⁶ Evalaimu nĩ mũkũne, kĩtina kyoo nĩkyũmĩte, maikasyaa ũsyao: ĩĩ, o na masyaa, ngooaa ũsyao ũla wendetwe wa ĩvu yoo.

¹⁷ Ngai wakwa akamekya kũasa, nĩkwĩthĩwa matyaamwĩthukĩĩsya; na makeethĩwa angangi katĩ wa i mbaĩ.