Osea 8 - Mbivilia

Ũkan’yo ũndũ wa kũthaitha mĩvw’anano kwa Isilaeli

¹ Tinĩĩsya soo kanyw’anĩ waku. Nĩwũkĩle ĩũlũ wa nyũmba ya Yeova ta ndiũ, nĩkwĩthĩwa nĩmavĩtĩtye ũtianĩo wakwa, na kũvĩtan’ya mĩao yakwa.

² Makeengaĩla, makyasya, Ngai wakwa, ithyĩ Isilaeli nĩtũkwĩsĩ.

³ Isilaeli nĩwekisye ũtee kĩla kĩseo: mũmaitha akamũatĩĩa.

⁴ Nĩmokĩlĩtye asumbĩ, ĩndĩ ti ũndũ wakwa; nĩmaiĩte anene me mbee ũsumbĩnĩ, na ndyaamanya: nĩmeeseũvĩsye mĩvw’anano na vetha na thaavu woo, nĩ kana mese kũvetwa.

⁵ Nake nĩwekisye kasaũ kaku ũtee, we Samalia; ũthatu wakwa nĩwakanĩtw’e ĩũlũ woo: kũkeethĩwa ĩvinda yĩana ata asu makĩvika vala mate na ĩvĩtyo?

⁶ Nũndũ o ko kaumie kwa Isilaeli: ndũĩka nĩkaseũvĩtye, nako ti Ngai; ĩĩ, kasaũ ka Samalia kakatilangwa tũlungu.

⁷ Nũndũ mavuĩaa kĩseve, na makaketha kĩlingi: nde na lĩu ũtũĩtye; mũmea ndũkasyaa lĩu; ethĩwa ũkasyaa, aeni makoomelya.

⁸ Isilaeli nĩ mũmelye: yu me katĩ wa i mbaĩ o ta mũio ũte mũndũ ũwenda.

⁹ Nũndũ nĩmambatie Asuli, ta ĩng’oi ya kĩthekanĩ yĩ yoka: Evalaimu nĩwethooee endwa.

¹⁰ Ĩĩ, o na kau mathooaa katĩ wa i mbaĩ, yu ngamomban’ya; na nĩmekwambĩlĩlya kũoleka nũndũ wa mũio wa mũsumbĩ wa anene me mbee ũsumbĩnĩ.

¹¹ Nĩkwĩthĩwa Evalaimu nĩwaingĩvisye ithembeo ekae naĩ, ithembeo nitw’ĩkĩte kwake kũndũ kwa naĩ.

¹² Namũandĩkĩe maũndũ ngili ĩkũmi ma mĩao yakwa; ĩndĩ nĩmatalĩtwe o ta kĩndũ kĩeni.

¹³ Ũvoonĩ wa kũthemba nthembo syakwa, nĩmathembaa nyama na makiya; ĩndĩ Yeova ndametĩkĩlaa: yu akalilikana ũthũku woo, na kũsilĩla naĩ syoo; makasyoka Misili.

¹⁴ Nũndũ Isilaeli nĩwũlĩtwe nĩ Mũmbi wake, na akaka nyũmba nene mbanakavye; na Yuta nĩwaingĩvisye ndũa mbiie; ĩndĩ ngaete mwaki ndũanĩ syake, na ũkamina nyũmba nene syĩ iemo syasyo.