Osea 7 - Mbivilia

Ũthũku na ũng’endu wa Isilaeli

¹ Yĩla nenda kũvosya Isilaeli, nĩvo ũthũku wa Evalaimu ũkumĩla, na ũthũku wa Samalia; nũndũ nĩmekaa ũkengani, na kĩng’ei nĩkĩlikaa nthĩnĩ, na nguthu ya avutani ĩkyanangĩla nza.

² Na matisũanĩaa ngoonĩ syoo kana nĩnĩlilikene ũthũku woo w’onthe: yu meko moo ene nĩmamathyũlũlũkĩte; me mbee wa ũthyũ wakwa.

³ Nĩmeũtanĩthya mũsumbĩ na ũthũku woo, na kũtanĩthya anene me mbee ũsumbĩnĩ na movũngũ moo.

⁴ Onthe nĩ ilaalai; mailyĩ ta iko yĩlaatĩkĩtw’e nĩ mũui wa mĩkate; aekaa kũkitĩanĩsya mwaki, kuma ailitya ngũmbwa, kũvika waimba.

⁵ Mũthenya wa mũsumbĩ waitũ anene me mbee ũsumbĩnĩ nĩmeewaisye na muutĩa wa mbinyu; atambũũkisye kw’oko kwake vamwe na akaakaan’ya.

⁶ Nũndũ nĩmaseũvĩtye ngoo syoo o ta iko, ĩvinda yĩla moveesye: mũui woo wa mĩkate nũkomaa ũtukũ mũima; na kĩoko yĩkyakana ta itw’ĩki sya mwaki.

⁷ Onthe nĩ avyũ ta iko, na maminaa asili moo; asumbĩ moo onthe nĩ avalũku: na vati ũmwe katĩ wamo wĩngaĩlaa.

⁸ Evalaimu, nake nũkwĩvulan’ya na ngo sya andũ; Evalaimu nĩ kamũtũ kate kaalyũle.

⁹ Aeni nĩmaminĩte vinya wake, na ndesĩ: ĩĩ, mbuĩ syĩ vaa na vaa kwake, na ndesĩ.

¹⁰ Na ngathĩĩo sya Isilaeli nikũsĩĩaa mbee wa ũthyũ wake: ĩndĩ o na ũu w’onthe matisyokete kwa Yeova Ngai woo, o na kũmũmantha.

¹¹ Na Evalaimu ailyĩ ĩvũĩ ĩtumanu, yĩte na ũmanyi: nĩmekaĩlaa Misili, o na maendaa Asuli.

¹² Yĩla methi, ngalan’ya kĩtei kyakwa ĩũlũ wamo; ngamatheesya nthĩ ta nyũnyi sya yayaya; ngamasilĩla, o tondũ ũmbano woo wĩw’ĩte.

¹³ Woo nĩ woo! Nũndũ nĩmandiie; wanangĩko nĩ woo! Nũndũ nĩmambĩtanĩsye: o na kau nĩnenda kũmovosya, ĩndĩ nĩmaneenee movũngũ.

¹⁴ Na matyaaĩngaĩla na ngoo syoo, ĩndĩ nĩmakayaa me mokomonĩ moo: nĩmombanaa kwondũ wa lĩu wa mbaa ngetha na mbinyu mbĩthĩ; nĩmang’endeeaa.

¹⁵ O na kau nĩnĩmamanyĩĩtye na ngekĩa moko moo vinya, ĩndĩ nĩmanzũanĩĩaa ũthũku.

¹⁶ Nĩmasyokaa, ĩndĩ ti kwa ũla wĩ ĩũlũ; mailyĩ ĩtati: anene moo me mbee ũsumbĩnĩ makavalũkw’a na ũvyũ nũndũ wa ũthatu mwai wa nĩmĩ syoo: ũu ũkeethĩwa kũthekeew’a kwoo me nthĩ ya Misili.