Osea 3 - Mbivilia

Osea na kĩlaalai

¹ Na Yeova ambĩa, Enda ĩngĩ, ũmwende mũndũ mũka, kĩlaalai, wendetwe nĩ mũnyanyae, o tondũ Yeova wendete ana ma Isilaeli, o na kau methyũũĩaa ngai ingĩ, na kwenda tũkũmbwa twa nzavivũ mbovu.

² Na ĩndĩ namwĩthooee we na ilungu ĩkũmi na itano sya vetha, na omeli ya mbaale, na nyunzu ya omeli ya mbaale;

³ na namwĩa, Ukekala nũndũ wakwa mĩthenya mingĩ; ndũkeka ũmalwaya, na ndũkethĩwa kĩveti kya mũndũ ũngĩ: nakwa kwaku ngeethĩwa o ta ũu.

⁴ Nũndũ ana ma Isilaeli makekala mĩthenya mingĩ mate na mũsumbĩ, na mate na mũnene wa mbee ũsumbĩnĩ, na mate na nthembo, na mate na kĩtuĩ, na mate na evoti kana telavimu:

⁵ ĩtina wa ũu ana ma Isilaeli makasyoka, na kũmantha Yeova Ngai woo, na Ndaviti mũsumbĩ woo, na makooka kwa Yeova na ũseo wake me na kĩkĩo mĩthenyanĩ ya mũminũkĩlyo.