NTHIMO 9 - Mbivilia

Ũĩ ũitaĩwa. Kũmũkĩa Yeova nĩkw’o wambĩlĩlyo wa ũĩ

¹ Ũĩ nĩwakĩte nyũmba yaw’o; Nĩwasũvĩtye ituĩ mũonza syaw’o:

² Nĩwũaĩte nyamũ syaw’o; nũvulanĩtye mbinyu yaw’o; O na nĩwalanĩtye mesa yaw’o:

³ Nũtũmĩte eĩtu maw’o; Nĩwũkĩlĩlasya wasya kũndũnĩ kũtũlu mbee kwa ndũa:

⁴ Ũla ũte na ũĩ, nĩathũkĩle vaa: Na ũndũ wa ũla ũte ũmanyi nũũmũtavya,

⁵ Ũkai, inyw’ĩ mũye lĩu wakwa, Na nyw’ai mbinyu ĩla nĩvulanĩtye.

⁶ Ekai, inyw’ĩ mũte na ũmanyi, na mũkĩkala thayũ; Na kũkinya nzĩanĩ ya ũmanyi.

⁷ Ũla ũmwonasya mũkaakaan’ya mavĩtyo nĩwĩyoseaa kũumangwa; Na ũla ũkanasya mũndũ mũthũku nĩwĩyoseaa ĩlanga.

⁸ Ndũkakan’ye mũkaakaan’ya, ndakese ũkũmena: Kan’ya mũndũ mũĩ, nake akakwenda.

⁹ Manyĩsya mũndũ mũĩ, nake akeethĩwa mũĩ mbee: Manyĩsya mũndũ mũlũngalu, nake akongeleka kwosa momanyĩsyo.

¹⁰ Kũmũkĩa Yeova nĩkw’o wambĩlĩlyo wa ũĩ; Na kũmũmanya Ũla Mũtheu nĩkw’o ũmanyi.

¹¹ Nũndũ kwondũ wakwa mĩthenya yaku ĩkaingĩvw’a, Na myaka ya thayũ waku ĩkongeleelw’a.

¹² Ethwa wĩ mũĩ wĩ mũĩ kwondũ waku mwene; Na ethĩwa nũkaakaanasya, we wĩ weka ũkookua.

¹³ Mũndũ mũka mũtumanu e na kĩlonzo; Nde ũmanyi, na ndesĩ ũndũ.

¹⁴ Nĩwĩkalaa mũomonĩ wa nyũmba yake, Kĩvĩlanĩ kĩ kũndũ kũtũlu kwa ndũa,

¹⁵ Amete ala meũvĩta, Ala maendete nzĩanĩ syoo:

¹⁶ Ũla ũte na ũĩ, nĩathũkĩle vaa; Na ũle ũte ũmanyi, emwĩa,

¹⁷ Manzĩ moyĩtwe me mũyo, Na lĩu ũkĩĩwa kĩmbĩthĩnĩ nĩ wa kwendeesya.

¹⁸ Ĩndĩ ũ mũndũ ndesĩ atĩ akw’ũ me vo; Aeni ma ũ mũndũ mũka me syũngũnĩ sya Seoli.