NTHIMO 8 - Mbivilia

Ũseo mũnene na ũtĩnĩko wa ũĩ

¹ Ũĩ ndũkayaa, Na ũmanyi kumya wasya waw’o?

² Ĩũlũ wa kũndũ kũtũlu nzĩanĩ, Vala nzĩa ikomanĩe, nũũngamaa;

³ Vakuvĩ na mbingĩlo, ũlikĩlonĩ wa ndũa, Ũlikĩlonĩ mĩomonĩ, nĩwũkĩlĩlasya wasya mũnene:

⁴ Inyw’ĩ aũme, nĩngũmwĩta; Na wasya wakwa nĩ kwa ana ma andũ.

⁵ Inyw’ĩ mũte ũmanyi, manyai ũĩ; Na, inyw’ĩ ndia, ĩthĩwai na ngoo yĩ ũmanyi.

⁶ Ĩw’ai, nũndũ nganeena maũndũ manene; Na kũtumũka kwa ilomo syakwa kũkeethĩwa maũndũ ma w’o.

⁷ Nũndũ kanyw’a wakwa ũkaneena w’o; Na ũthũku nĩ ũthatyo kwa ilomo syakwa.

⁸ Ndeto syonthe sya kanyw’a wakwa nĩ ndũngalu; Vati ũndũ mũthyoeku kana ngũlũ nthĩnĩ wasyo.

⁹ Syonthe syĩ ũtheinĩ kwa ũla ũmanyaa, Na sya w’o kwa ala monaa ũmanyi.

¹⁰ Osa ũmanyĩsyo wakwa, na ti vetha; Na ũmanyi kwĩ thaavu mũseo mũno.

¹¹ Nũndũ ũĩ nĩ kavaa kwĩ tũvila twa maliani; Na syĩndũ syonthe ila itonya kwendua ititonya kũelekanw’a naw’o.

¹² Nyie ũĩ, nĩndw’ĩte kĩlĩko vandũ vakwa va ũtũa, Na kũmantha ũmanyi na ũi wa kĩlĩko.

¹³ Kũmũkĩa Yeova nĩkw’o kũmena ũthũku: Ngathĩĩo, na wĩnenevyo, na mũendele mũthũku, Na kanyw’a wĩ ngũlũ, isu nĩngwimena.

¹⁴ Ũtao nĩ wakwa, na ũĩ mwĩanĩu: Ninyie ũmanyi; nĩ na ũtonyi.

¹⁵ Kwondũ wakwa asumbĩ nĩmasumbĩkaa, Na anene me mbee ũsumbĩnĩ nĩmatusaa katĩ.

¹⁶ Kwondũ wakwa anene me mbee ũsumbĩnĩ nĩmasumbĩkaa, Na ala me ndaĩa, o na asili onthe ma nthĩ.

¹⁷ Nĩnĩmendaa ala mambendaa; Na ala mamanthaa na kĩthing’ĩĩsyo makambona.

¹⁸ Ũthwii na ndaĩa syĩ nakwa; Ĩĩ, ũthwii ũla wĩkalaa na ũlũngalu.

¹⁹ Ũsyao wakwa nĩ mũseo kwĩ thaavu, ĩĩ, kwĩ thaavu mũseo mũno; Na wongeleko wakwa kwĩ vetha mũseo.

²⁰ Nĩendaa nzĩanĩ ya ũlũngalu, Katĩ wa nzĩa sya ũsili wa katĩ;

²¹ Nĩ kana nĩtume ala mambendaa matiĩwa ũthwii, Na nĩ kana nusũsye kũndũ kwoo kũla kwiawa ũthwii.

²² Yeova aĩ nakwa mwambĩlĩlyonĩ wa nzĩa yake, Mbee wa mawĩa make ma tene.

²³ Nĩnookĩlilw’e kuma tene tene, kuma mwambĩlĩlyonĩ, Nthĩ ĩtanamba kwĩthĩwa.

²⁴ Yĩla kũtaĩ syũngũ, nyie nĩnaumĩlĩtw’e, Yĩla kũtaĩ nthongo syĩ na manzĩ maingĩ.

²⁵ Iĩma itanamba kũlũlũmĩlw’a, Mbee wa tũlĩma nyie nĩnaumĩlĩtw’e;

²⁶ Yĩla ũtaĩ anamba kũtw’ĩkĩthya nthĩ, kana isesi, Kana mwambĩlĩlyo wa kĩtoo kya nthĩ.

²⁷ Yĩla walũmilye matu, naĩ vo: Yĩla waiie kilinge ĩũlũ wa ĩ kyũngũ,

²⁸ Yĩla walũmilye matu ĩũlũ, Yĩla nthongo sya ĩ kyũngũ syatw’ĩkie syĩ vinya,

²⁹ Yĩla wanengie ũkanga mũvaka waw’o, Kana manzĩ matikavĩtye mwĩao wake, Yĩla watwie myambĩlĩlyo ya nthĩ;

³⁰ Ĩvinda yĩu naĩ vakuvĩ nake, mũthũkũmi mũnene; Na naĩ ũtanu wake kĩla mũthenya, Ngĩtanĩa mavinda onthe mbee wake,

³¹ Ngĩtanĩa nthĩ yake ĩtwĩe andũ; Na ũtanu wakwa waĩ na ana ma andũ.

³² Yu kwondũ wa ũu, ana makwa, mbĩthukĩĩsyai; Nũndũ nĩ aathime ala makwataa nzĩa syakwa.

³³ Ĩw’ai ũmanyĩsyo, na ĩthĩwai oĩ, Na mũikolee.

³⁴ Nĩmũathime mũndũ ũla ũmbĩw’aa, Akĩsyaĩĩsya kĩla mũthenya mbingĩlonĩ syakwa, Akyeteela mĩtĩnĩ yĩ ndee sya mĩomo yakwa.

³⁵ Nũndũ ũla ũmbonaa nĩwonaa thayũ, Na akoona ũseo kwa Yeova.

³⁶ Ĩndĩ ũla ũmbĩtanĩasya nĩwĩkaa ngoo yake mwene naĩ: Na onthe ala mamenaa nyie mendaa kĩkw’ũ.