NTHIMO 7 - Mbivilia

Ũseleke wa ĩlwaya

¹ Mwana wakwa, kwata ndeto syakwa, Noyia mĩao yakwa vala ũĩ.

² Kwata mĩao yakwa na kwĩkala thayũ; Na ũmanyĩsyo wakwa ta kyũma kya itho yaku.

³ Myoveee syaanĩ syaku; Mĩandĩke masengeanĩ ma ngoo yaku.

⁴ Tavya ũĩ, Nue mwĩĩtu‐a‐ia; Na ĩta ũmanyi mũndũ mũka wa mũvĩa waku:

⁵ Nĩ kana ikũsiĩĩe kwa mũndũ mũka mũeni, Kwa mũndũ mũka wa nthĩ ĩngĩ ũla wendeeasya na ndeto syake sya ũkathĩĩo.

⁶ Nũndũ mbũthinĩ ya nyũmba yakwa Nasyaĩlya mĩtĩnĩ yakwa mĩkelangan’ye;

⁷ Na noona katĩ wa ala mate ũmanyi, Na namũvathũkan’ya katĩ wa imwana, Mwanake ũte na ũmanyi,

⁸ Aivĩtĩla nzĩanĩ nene vakuvĩ kĩkotonĩ kya ũ mũndũ mũka; Nake athi na nzĩa ya nyũmba ya mũndũ mũka ũsu,

⁹ Ũmithinĩ, wĩoo wa mũthenya, Ũtukũ katĩ na kĩvindunĩ.

¹⁰ Na, sisya, mũndũ mũka akomana nake Ekĩĩte ngũa ya ĩlwaya na e na ũseleke wa ngoo.

¹¹ (E na kĩlonzo na ũng’endu; Maũũ make matyĩkalaa nyũmbanĩ yake:

¹² Oyu e nzĩanĩ nene, yu e kũndũnĩ kũthanthau, Na oveesya kĩla kĩkotonĩ.)

¹³ Na ĩndĩ ũ mũndũ mũka amũkwata, na amũmumun’ya, Na e na ũthyũ ũte nthoni amwĩa:

¹⁴ Nthembo sya nthembo sya mũuo syĩ nakwa; Ũmũnthĩ nĩnĩanĩsye mawĩvĩto makwa.

¹⁵ Kwondũ wa ũu nĩnaumaala kũkomana naku, Kũmantha ũthyũ waku na kĩthing’ĩĩsyo, na nĩnakwona.

¹⁶ Nĩnalanĩtye ũkomo wakwa mũto mũseo mũno, Na ngũa syĩ nzoa sya ndii sya Misili.

¹⁷ Nĩnyungĩthĩtye ũkomo wakwa Na manemane, na uuti, na mũtalasini.

¹⁸ Ũka, twose wĩanĩu witũ wa wendo kũvika kĩoko; Twĩtan’ye ene na mawendo.

¹⁹ Nũndũ ũ mũndũ mũũme nde mũsyĩ; Nĩ mũendu kyalo kĩasa:

²⁰ Nũendete na mũvuko wa mbesa; Akenũka mwei walũma nthĩ.

²¹ Na nũndũ wa ndeto syake nyingĩ sya kwendeesya nũmwĩtĩkĩlĩthasya; Kwondũ wa kwendeesya na ndeto sya ũkathĩĩo sya ilomo syake nũmũkusasya.

²² Nake nũmũatĩĩaa mĩtũkĩ, O tondũ ng’ombe ĩendaa kĩthĩnzĩonĩ, Kana ta ũmwe mũtumanu ũmanyĩaw’a na mbĩngũ;

²³ Kũvika mũsyĩ ũtonye ĩtema yake; Tondũ nyũnyi ĩkalaataa kũthi vala ve kĩtei, Na ndĩsĩ atĩ nĩ kwondũ wa thayũ wayo.

²⁴ Yu kwondũ wa ũu, ana makwa, mbĩw’ai, Na ĩthukĩĩsyei ndeto sya kanyw’a wakwa.

²⁵ Ngoo yaku ĩtikelekele mĩendele yake; Ndũkaĩe nzĩanĩ syake.

²⁶ Nũndũ nake nĩwavalũkilye nthĩ aingĩ me okite: Ĩĩ, oawa make onthe nĩ nguthu yĩ vinya.

²⁷ Nyũmba yake nĩ nzĩa ya kũthi Seoli, Kũtheea tũsũmbanĩ twa kĩkw’ũ.