NTHIMO 5 - Mbivilia

Ũkan’yo ũndũ wa ũlaalai

¹ Mwana wakwa, ĩthukĩĩsye ũĩ wakwa; Tea kũtũ kwaku wose ũmanyi wakwa:

² Nĩ kana ũtonye kũsũvĩa kĩlĩko, Na kana ilomo syaku itonye kũlũmya ũmanyi.

³ Nũndũ ilomo sya mũndũ mũka mũeni ilovotangasya ũkĩ wa nzũkĩ, Na kanyw’a wake nĩ mũtendeu kwĩ mauta:

⁴ Ĩndĩ mũminũkĩlyonĩ e ũũ ta mũtĩ wĩ ũũ, Mũĩ ta ũvyũ mũĩ ngalĩ syelĩ.

⁵ Maũũ make matheeaa kĩkw’ũnĩ; Matambya make malũmanĩtye na Seoli;

⁶ Kwondũ wa ũu ndonaa nzĩa ndindimalu ya thayũ: Mĩendele yake ti mĩlũmu, na ndamanya ũu.

⁷ Na yu kwondũ wa ũu, ana makwa, mbĩthukĩĩsyei, Na mũikatie ndeto sya kanyw’a wakwa.

⁸ Veta mũendele waku kũasa nake, Na ndũkathi vakuvĩ na mũomo wa nyũmba yake;

⁹ Ndũkese kũnenga angĩ ndaĩa yaku, Na myaka yaku ala ai;

¹⁰ Aeni matikese kusũwa nĩ vinya waku, Na mawĩa maku kwĩthĩwa nyũmbanĩ ya mũndũ wa nthĩ ĩngĩ,

¹¹ Naku ũkesa kũĩa mũminũkĩlyonĩ waku, Yĩla nyama syaku na mwĩĩ waku ikathela,

¹² Na kwasya, Ũndũ namenete ũmanyĩsyo, Na ngoo yakwa yavũthĩtye ũkan’yo;

¹³ O na ndaaĩthukĩĩsya wasya wa amanyĩsya makwa, Kana kũtea kũtũ kwakwa kwa ala mandaaa!

¹⁴ Natielye o vanini nĩthĩwe ũthũkunĩ w’onthe Nĩ nthĩnĩ wa ũmbano na ĩkomano.

¹⁵ Nyusaa manzĩ kuma kĩthimanĩ kyaku mwene kĩla kyakĩtwe, Na manzĩ ala mavĩtaa kuma kĩthimanĩ kyaku mwene.

¹⁶ Mbuluti syaku nĩsyaĩle kũnyaĩĩkw’a kũũ na kũũ, Na tũlũsĩ twa manzĩ nzĩanĩ nene?

¹⁷ Methĩwe kwondũ waku wĩ weka, Na ti kwondũ wa aeni ala me kwaku.

¹⁸ Nthongo yaku nĩathimwe; Noitanĩa kĩveti kyaku kya ũthoo.

¹⁹ Ta ndaatai nga yĩ wendo na ngondi nga yendeeasya, Nondo syakyo nikwĩanĩae mavinda onthe; Naku ũtanĩthaw’e mavinda onthe nĩ wendo wakyo.

²⁰ Nũndũ nĩkĩ we, mwana wakwa, ũtanĩthaw’a nĩ kĩveti kĩeni, Na kũvĩtĩanĩsya kĩthũi na ũla wa nthĩ ĩngĩ?

²¹ Nũndũ mĩendele ya mũndũ yĩ mbee wa metho ma Yeova; Na nũtindimalasya nzĩa syake syonthe.

²² Mothũku make mwene makakwata ũla mũthũku, Na akalũmw’a nĩ ndii sya naĩ yake.

²³ Akakw’a ũndũ wa kwaa ũmanyĩsyo; Na ũtumanunĩ wake mũnene akaa.