NTHIMO 4 - Mbivilia

Ũunĩko wa ũĩ

¹ Ĩw’ai, ana makwa, ũmanyĩsyo wa ĩthe, Na ĩnenganei mũmanye ũmanyi:

² Nũndũ nĩngũmũnenga ũmanyĩsyo mũseo; Mũtikatie mĩao yakwa.

³ Nũndũ naĩ mwana kwa ĩthe wakwa, Mwololo na ũla mwende methonĩ ma mwaitũ.

⁴ Na amanyĩisye, na ambĩa: Ngoo yaku yĩkale na ndeto syakwa; Kwata mĩao yakwa, na ĩthĩwa thayũ;

⁵ Ĩyosee ũĩ, ĩyosee ũmanyi; Ndũkolwe, ndũkatiũũke kuma ndetonĩ sya kanyw’a wakwa;

⁶ Ndũkaotie, na ũkakwĩkalasya; Wende, na ũkakũsũvĩaa.

⁷ Ũĩ nĩ ũndũ ũnene mbee; kwondũ wa ũu ĩyosee ũĩ; Ĩĩ, na vamwe na kwosa kwaku kw’onthe ĩyosee ũmanyi.

⁸ Ũnenevye, naw’o ũkakũnenevya; Ũkakũete ndaĩanĩ, yĩla wĩwĩvĩtĩĩsya.

⁹ Ũkanenga mũtwe waku ngovia ya mumo; Ngovia ya ũsumbĩ ya ũseo ũkakũnenga.

¹⁰ Ĩw’a, we mwana wakwa, na osa ndeto syakwa; Na myaka ya thayũ waku ĩkeethĩwa mingĩ.

¹¹ Nĩnaũmanyĩsya nzĩanĩ ya ũĩ; Nĩnaũtongoesya nzĩanĩ sya ũlũngalu.

¹² Yĩla wĩendeeaa, matambya maku matikavivinyawa; Na ethĩwa nũkũsemba, ndũkalulutĩka.

¹³ Kwata ũlũmye ũmanyĩsyo; ndũkaeke ũthi: Ũsũvĩe; nũndũ nĩ thayũ waku.

¹⁴ Ndũkalike nzĩanĩ ya ala athũku, Na ndũkathi mũendelenĩ wa andũ athũku.

¹⁵ Myathũkĩe, ndũkamĩvĩtĩle; Ĩthyũũe kũmyuma, na endeea na mbee.

¹⁶ Nũndũ matikoma, ate o kwĩka ũthũku; Na too woo nũvetawa, ethĩwa mativalũkasya amwe.

¹⁷ Nũndũ maĩsaa lĩu wa ũthũku, Na kũnyw’a mbinyu ya ũng’endu.

¹⁸ Ĩndĩ nzĩa ya alũngalu nĩ ta kyeni kya kũikya, Kĩla kĩkenaa mbee na mbee kũvika mũthenya mwĩanĩu.

¹⁹ Mũendele wa ũthũku nĩ ta kĩvindu: Matyĩsĩ kĩla kĩmalulutĩkasya.

²⁰ Mwana wakwa, ĩthukĩĩsye ndeto syakwa; Tea kũtũ kwaku wĩw’e ndeto syakwa.

²¹ Itikaaume methonĩ maku; Syĩkalye ngoonĩ yaku nthĩnĩ.

²² Nũndũ nĩsyo thayũ kwa ala masyonaa, Na vinya wa mĩĩ yoo yonthe.

²³ Ĩkalya ngoo yaku na ũthangaau w’onthe; Nũndũ maũndũ ma thayũ maumaa kwayo.

²⁴ Veta kwaku kanyw’a wĩ ũng’endu, Na ilomo syĩ ngũlũ veta kũasa naku.

²⁵ Metho maku masisye o mbee ki, Na ilomo sya itho yaku ikĩsisya syelekele mbee waku.

²⁶ Tindimalya nzĩa ya nyaĩĩ syaku, Na mĩendele yaku yonthe ĩthĩwe ĩmĩlũlũmĩlye.

²⁷ Ndũkaaĩthyũũe ngalĩ ya kw’oko kwa aũme kana kwa aka: Umya kũũ kwaku ũthũkunĩ.